誠早以前台灣有一戶「鄭」姓人家，蹛兩个兄弟，阿兄叫做「阿弘」，做人詭計多端，小弟叫做「阿毅」，做人老實條直。阿弘結婚了，就佇某的使弄下，欲佮阿毅分家。阿弘因為成家矣，就分予家己較濟的土地佮田園，阿毅是獨身仔，就干焦分予伊一屑仔的田地佮一間草厝仔。
最後，猶賰一隻牛。奸巧的阿弘想欲共這隻牛佔為所有，就想出一个計謀，騙阿毅講：「小弟，這隻牛欲按怎分，總袂使共伊破做兩爿。我有想著一个好辦法，就是予牛徛中央，咱一个人搝牛頭，一个人搝牛尾，看佗一个人共牛搝過去，就算分著彼隻牛。」「這也是無辦法中的一个方法，好矣！好矣！」阿毅一喙答應。阿弘講：「我是阿兄，當然愛徛踮牛頭前，你是小弟就徛踮牛後爿。」阿毅應好。
徛佇邊的阿嫂攑起正手，講：「我來做裁判，逐家準備好矣，就開始！」講完，就共正手放落，比一个開始的手勢，並順手拍牛的尻川。阿弘聽著開始，就拚命搝著牛鼻圈，阿毅也拚命搝牛尾，毋過牛的牛鼻圈予人搦咧，當然會疼，只好順著牛鼻圈的方向行，也就是順著牛頭的方向行！無偌久，牛已經向頭前行一段距離，阿毅閣較拚性命搝，嘛無效。結果算阿弘贏，阿毅輸。阿弘贏了，閣假好心，對稻田裡掠一隻烏龍仔，說：「小弟，你輸矣，毋閣免傷心，你猶有這隻烏龍仔佮你做伴。」
阿弘共牛牽走，阿毅看著手中的烏龍仔講：「彼隻牛，恐驚佮我無緣，你這个小動物，佮我較有緣。」賭牛的代誌一下過去，阿毅也就共伊放袂記，只是一心疼惜這隻烏龍仔。
有一工，庄裡有人辦喜事，阿毅予人請去，伊也共烏龍仔紮去。咧食喜酒時，伊共烏龍仔囥踮身邊的椅頭仔頂。這時拄好一隻雞鵤傱出來，看著烏龍仔，「啄」一下，一喙就共伊食去。阿毅真傷心，大聲吼，喜事的主人無辦法，只好講：「你莫哭，這隻雞鵤賠你就是。」條直的阿毅，聽著主人按呢講，就目屎拭拭咧，無閣吼矣。等喜酒食完，就掠著彼隻雞鵤轉去。
閣過幾个禮拜，隔壁庄有喜事，請阿毅食飯，阿毅帶著伊的雞鵤做伙去。咧食菜的時陣，伊攏共雞鵤用索仔縛踮桌跤。忽然間，一隻狗仔傱出來抾桌跤的菜尾，雞鵤共伊爭，兩隻就相拍起來，彼隻狗仔一受氣就共雞鵤咬死。阿毅看著雞鵤予狗咬死，忍袂牢閣大聲哭起來。主人一看，也同情阿毅的遭遇，就共彼隻狗仔送予伊。阿毅共狗仔牽轉厝，對待伊若像對待家己仝款，兩人相依為命，伊就共狗仔號做「來富」。
阿毅分的彼寡田地是瘦地，毋過種蕃薯猶會使，只是一直苦無牛通犁田，無法度種作。彼工，看著來富咧田裡耍，突然靈光一閃，歡喜甲大叫一聲，講：「著著著，就按呢辦！」伊馬上傱轉去厝共牛犁夯來田裡，共牛犁索仔縛踮來富的肩胛，準備欲犁田。
這時，拄好有一个生理人行過來，看著這个情形，問阿毅講：「喂！你是毋是欲叫你的狗仔犁田？」「是矣。」阿毅應。「狗仔敢會曉拖犁？」生理人毋敢相信問。「會矣！會矣！」阿毅應。「敢有可能！按呢，我共你相輸，若這隻狗仔會曉犁田，我就共身上所有的物件攏送你，另外閣予你五兩銀，按怎？」生理人講。「好矣，你一定會共你的物件佮五兩銀輸予我。」阿毅講。「你干焦想欲贏別人的物件，但是若是你輸，欲按怎？」生理人回問。「若是我輸，我就共這隻狗仔送你。」阿毅講。「好，一言為定。」生理人講。
雙方約定好矣，阿毅佮來富的表演就欲開始了。阿毅共一枝準備好的骨頭擲佇離來富三十尺遠的頭前，來富一看著骨頭就拚命傱過去，一傱就把牛犁拖咧行，一步一步拖到骨頭的所在，這時阿毅閣抾起骨頭，擲對倒反的方向，來富就回頭共牛犁拖對倒反的方向。就按呢來回幾若擺，竟然共田犁好矣，會使種蕃薯囉。生理人看了認輸，只好共伊身上的物件佮五兩銀送予阿毅。阿毅得著遐的物件佮五兩銀後，生活總算慢慢富裕起來。
話講彼个奸巧的阿宏聽著阿毅發財矣，真欣羨，嘛想欲發財，就去佮阿毅參詳，欲借來富。伊佮來富來到原來阿毅發財的所在，專心等好額的生理人經過，來佮伊相輸。
按呢等規若工，果然予伊等著。這一工來了一个賣布的生理人。阿宏拍算欲共伊的布攏贏過來，就對賣布的生理人講：「我這一隻狗仔會曉犁田，你相信無？」「我才毋相信，狗仔哪會犁田？」生理人反駁講。「你毋相信？曷無你敢敢用你的布佮我相輸？」「好矣，毋過，狗仔若袂會犁田，這隻狗就算我的。」生理人應講。
阿宏就佮阿毅仝款，把牛犁索仔縛踮來富身上，擲一枝骨頭佇來富的頭前，毋過來富一點仔都無振動，阿宏著急起來，就對來富動跤動手，但是來富猶是無愛拖犁。最後生理人講：「已經過遮久矣，這隻狗仔連動都毋動，看起來，伊是袂曉犁田，你輸矣，這隻狗是我的。」
彼个生理人牽著來富欲起行，毋過來富毋綴伊行，生理人硬共搝，來富喈喈叫，生理人受氣，攑棍仔摃來富，無張持煞共摃死。阿毅聽著狗的哀叫聲，走來到田裡一看，來富已經死矣。伊想著閣失去伊心愛的動物，忍袂牢就放聲大哭。伊回想著來富予伊生活富裕，佮伊做伴，閣共伊彼塊瘦土，耕作甲會當種番薯！這馬突然死去，愈想愈傷心。最後伊共來富的屍體埋踮厝邊，閣共伊做一个真媠的墓，伊想講按呢就會當逐工看著伊。
經過無偌久，狗墓邊生出一欉樹仔，愈大愈懸，樹椏湠誠闊，樹葉密喌喌，阿毅逐改佇樹蔭歇涼，攏會想起著來富。有一工，阿毅發現這欉樹仔生出一堆黑豆仔，伊就起去樹頂挽一寡落來，提轉去厝炒，芳絳絳，食了後，煞一直放屁，毋過普通人放的屁是臭的，阿毅食遐的黑豆，所放出來的屁卻是清芳的，敢若蘭花芳仝款。阿毅想：「這屁遮爾芳，一定是上天，疼惜我，才會送予我，敢彩會當提來賣，趁寡錢。」伊想了，就加食一寡黑豆，通好來放屁賣錢。伊行佇路頂，沿路喝：「賣芳屁！賣芳屁！人間罕有的芳屁喔，囡仔鼻了好育飼，老人鼻了袂破病！」
話講庄裡有一个好額的張員外，得著一種怪病，真濟大夫看無法得，最後一个唐山師傅共伊講：「你這个病，只有一个方法通會當醫，彼就是鼻芳屁。」張員外起初毋敢相信，天下間有人會賣芳屁。拄好彼時，厝裡的下跤手人來報講：「街仔有人咧賣芳屁，敢欲揣伊來試看覓？」張員外應講；「嘛好，請彼个賣芳屁的入來。」
阿毅一入來張員外厝，張員外就問講：「你真正有芳屁通賣？我得著怪病，師傅講愛鼻芳屁才會好，你若會當共我治好，我一定大大賞你！」「真的？」阿毅講。「我袂騙你！」張員外應講。「好，就按呢決定。我這馬共我的跤川向你的面，放屁予你鼻！」阿毅講。張員外聽一下著急講；「直接佇我的面前放，傷危險，若是臭屁，就麻煩。我想猶是離較開一下，較安全。」阿毅應講：「嘛好！」
阿毅就行離開張員外五尺外，等伊講會使放矣，伊才「噗、噗、噗」連放三聲，張員外也開始大力欶，雖然距離有較遠，芳味無遐夠，張員外欶無蓋濟，毋過伊猶是有感覺病好一大半。張員外真歡喜，就按照約束，提五百兩銀予阿毅。阿毅有五百兩銀，一時仔就變成地方上的好額人，伊就去共來富的狗墓閣修整一下，三頓攏去共默拜。
阿毅有錢的消息閣傳到阿宏遐，阿宏心內又閣咧數想欲發財。伊來到阿毅厝裡，向阿毅哀求，予伊一寡黑豆，阿毅講：「黑豆生踮樹頂，你欲愛偌濟，就挽偌濟。」阿宏起去樹頂，共樹頂的黑豆攏挽了了，提轉去炒一大鍋，食甲腹肚脹甲若四跤仔，就趕緊走去張員外兜，踮外口大聲喝講：「賣芳屁的人來了！」
張員外頂改鼻芳屁，鼻無夠氣，怪病還未好離，心想：「頂改鼻無過癮，今仔日就愛好好仔共鼻，共病治予好。」張員外就叫阿宏入來，對伊講：「頂改那個賣芳屁的人徛了傷遠，這改你徛較近咧，直接向我的面放。」阿宏講：「好矣，好矣。」
阿宏就行到張員外面前，腹肚一下沉，丹田用一下力，就「噗」一聲放屁出來，毋過這个屁，並毋是像蘭花的芳味，卻是若放屎仝款的臭味，張員外鼻一下共拄才食落的山珍海味攏吐吐出來。這時阿宏的臭屁猶繼續咧放，張員外鼻仔掩咧，大聲喝講：「來人啊！緊共放屁的彼的跤川，用窒仔窒起來，摃五十下大棍。」張員外的下跤手人，馬上共阿宏的尻川窒起來，而且共伊拍五十大板，才共趕出去。
阿宏忍著疼，傱轉來到厝，一入門就喝某講：「緊！緊！，共我跤川的窒仔拔掉。」「是啥物代誌啊！錢有趁著無？」某問。「無啦，無啦，緊共我跤川的窒仔拔出來，哎呀！疼死我！」某只好共阿宏轉一下身，出力共伊尻川的窒仔拔出來，賰佇尻川內的屁就「噗、噗、噗」連紲噴噴出來，猶是仝款臭死人，某擋袂牢也共中晝所食的飯菜，攏吐了了。
怪病好未離的張員外，閣派人去請阿毅來兜治療伊的怪病，張員外仝款送予阿毅真濟賞賜，閣因為看伊老實條直，生做嘛算一表人才，就共查某囝嫁予阿毅。
阿毅阿兄阿宏逐工花天酒地，真緊就共厝內所有的田地攏變賣了了，變成散赤人，過著三頓難度的日子。阿毅看袂過，就提著五百兩銀去阿宏厝，送予阿宏，閣勸伊毋通閣花天酒地，愛勤儉過日才有底。阿宏感受著阿毅的真情，激動甲目屎流滿面，共阿毅的手搝絚絚講：「小弟，過去是我毋著！我一定會改邪歸正，重新做人。」
沒有留言:
張貼留言