2020年5月26日 星期二

台灣童話故事:石頭公


佇咱台灣的民間信仰中,拜「石頭公」表現出人對天地萬物的敬仰,共石頭公轉化做人的守護神,希望伊會當保護逐家身體健康、平安順序。誠濟人也共家己的囡仔予石頭公做契囝,拜伊做義父,祈求伊保護。新竹縣關西鎮南雄里的「石爺亭」,聽講有上萬个「契囝」。小漢的時,定定問爸母講:「我是對佗位來?」阿爸總是應講:「你是對石頭煏出來的。」台灣四界攏有石頭公,比論苗栗縣的南庄鄉,就有一座天然大石頭做成的石爺廟,供奉著清末抗日烈士楊再雲,鄉民攏尊稱伊石爺將軍。這馬咱就來講台灣桃園「石爺」的一段趣味的故事

這个「石爺」徛佇桃園中壢的東北角,一个叫做興南的所在。這搭古早有一條大河,這馬已經變做田園,田園內有一塊大石頭,懸大概八尺左右,彼就是「石爺」。

一百外年前,中壢附近時常有匪賊出沒。有一个人叫做「張仁潔」,蹛佇興南,做雜貨仔生理,逐工捒著雜貨仔擔沿街喝玲瑯叫賣。伊雖然家境無富裕,毋過誠老實,某也真骨力,閣有一个十二歲的查埔囝叫做「信乾」,真聰明、有孝,規厝內不時充滿著幸福快樂的氣氛。
  
有一工,天拄好光,一隻烏鴉歇佇厝頂噶噶叫。張仁潔認為這毋是吉兆,就決定無欲出門做生意,留踮厝裡教後生信乾拍算盤,某去河邊洗衫仔褲。過一時仔,門口有人拍門,拍甲誠厲害,仁潔猜想是土匪來矣,就把信乾藏踮米桶內,然後開門共看,果然是一个橫霸霸的土匪,夯著大刀行入來。仁潔問伊講:「有啥物貴事?」土匪大聲喝講:「共恁兜所有的錢,攏總提出來予我!」仁潔應講:「阮厝遮散,無啥物錢。」土匪閣大聲喝:「若無錢就提你的頭準數。」「大王!饒命!」仁潔跪落去哀求。「一定愛鏨你的頭才會使!」土匪歹歹叫共拒絕。

這時覕佇米桶內的信乾,聽著老爸欲予人刣,就跳出來向匪賊求情講:「莫刣阮老爸!你若欲挃人頭,請你鏨我的頭!」「袂使刣囡仔,我老伙仔予你刣啦!」仁傑講。「請你刣我!」信乾搶咧講。「袂使!猶是愛鏨我的頭才著。」仁潔又閣講。爸仔囝相爭佮真激烈。

兇惡的土匪看著信乾的哀求,敢彩是良心猶無全失,心肝落軟,就講:「我也是人,毋是冷血的動物,囡仔,我不忍心刣你。」就共仁潔的頭鏨落來紮倒轉去。信乾𢯾著老爸的屍體,大聲哭。無偌久,老母轉來,看著這種慘景,嘛大聲吼。

失去老爸了後,信乾過了愈艱苦。老母逐工替人洗衫,信乾也逐工去河裡抾螺仔殼,提去街仔賣,才會當勉強維持清苦的生活。

三年後,興南因為真久無落雨,田裡的稻仔攏欲焦死矣。興南村長佮地方人士,就去廟裡求雨,第二工果然落大雨,幾个河攏是濁水。雨停了後,信乾就想欲去河邊抾螺仔殼,老母講:「信乾,河水當掣流,較危險,今仔日就莫去抾螺仔殼矣。」「曷無,我來起岸邊釣一寡魚轉來,好無。」信乾應講。母親想想咧講: 「釣魚是較安全,但我猶是袂放心得,我佮你做伙去!」「按呢上好矣。」信乾講。

信乾就提著魚釣仔佮魚籠仔,佮阿母做伙來到河邊。母仔囝兩人坐佇河岸的樹跤,共魚餌鉤踮釣鉤頂,幌落去河裡。一時仔浮動開始振動,信乾馬上大力欲共魚釣仔搝起來,一時無小心,煞跋落去河裡,阿母驚一趒,大聲喝:「救人喔!救人喔!快來救人!」

毋過這時田裡、路頂攏無人,著急的阿母喝一站,攏無人來,想講只好家己救囉。伊拄準備欲跳落去河裡的時,後壁有人喝講:「小等咧!」越頭一看,是附近的少年人。少年人共伊搝離岸邊。問講:「嫂仔,是啥物代誌?」「信,信,信乾,我的囝,跋落去河裡!」少年人向河裡斟酌看,看著信乾𢯾著河裡的一粒大石頭,佇遐浮浮沉沉。少年人馬上跳落去河裡,泅到大石頭邊,共信乾救轉來,踮岸邊急救,信乾吐了幾喙水,才漸漸精神過來。

信乾母仔囝攏平安,就對少年人說多謝,講:「你真勇敢,是阮的救命恩人,阮母仔囝一世人攏毋敢袂記你的大恩大德。」「無啦!無啦!救你的毋是我,是河裡的大石頭。若是無伊,信乾毋知影予沖去佗位囉,彼粒石頭恐驚是你老爸的化身喔?」「敢真的?」「是毋是真的,我也毋知,但是彼粒大石頭救你的命卻是千真萬確的。」「我知矣,除了感謝你的大恩大德外,我也欲感謝伊,逐冬的七月初七,我一定會準備牲醴來祭拜伊,報答伊今仔日救命的恩情。」

以後信乾對那粒大石頭,就若像對待老爸遐爾尊敬,叫伊「石爺」,或是「石頭公」。因為這粒大石頭誠靈聖,所以興南地區的人,逐冬的七月切七,攏誠鬧熱來祭拜伊,請伊保庇五穀豐收、風調雨順、逐家順序。

2020年5月24日 星期日

台灣俗語故事:一个某較贏三个天公祖


台灣有一句俗語,講:「一个某較贏三个天公祖」,是咧講若是會當娶著一个賢慧勥跤的某,比干焦靠祖仙留落來的財產,閣較可靠,閣較有出脫。這句俗語有一个真趣味的故事。

古早以前,台灣彰化有一个姓張的員外,毋但有錢,閣精通易經佮算命。伊干焦生一个查埔囝,因為難得,特別共號做「天賜」。張天賜雖然毋是天才,但是冊也讀了毋䆀。因為張員外精通算命,就想講共天賜未來的命運,算看覓。一下算了,伊大驚一著,因為按命書來看,天賜將來會做乞食。張員外自按呢逐工為著天賜的歹命運咧煩惱,煩惱伊若死,無人共伊管教,厝內遮爾濟的財產會予伊敗了了,最後若淪落到變乞食,毋知會變按怎?

有一工,伊共一个當地上出名的算命先生請來兜,請伊共天賜的命運詳細算看覓。這个先生毋但會曉算命,也會曉看相。張員外叫查某𡢃仔「阿香」捀茶出來,請相命先生啉茶。相命先生喝了,張員外就共天賜的生辰八字,提予算命先生。相命先生詳細推算了後,一句話也毋敢說。

張員外看了,心內有數,就共伊講:「先生,毋免客氣,好䆀攏請你直接講!」「嗯…………」,算命先生猶是毋敢講。「阮囝是毋是將來會做乞食?」張員外直接問。「員外,你也是巷仔內的,何必閣問我?」算命先生答。「我干焦知影阮囝是乞食命,但是毋知影有補救的方法無?若有,請你教我!」張員外懇求講。「辦法是有啦,只是驚你無願意!」算命先生應。「無要緊,你講,為著阮囝將來的幸福,我一定會照做!」張員外趕伊講。

「拄才彼个捀茶的查某𡢃仔,看伊的面相佮行路的姿態,有萬貫家產的命運,將來會做有錢人的家後。若共伊匹配予恁公子,恁公子雖然有一時會做乞丐,可是受著伊的致蔭,財產猶是會恢復轉來,你敢欲試看覓?」算命先生共詳細的解法,講予張員外聽,張員外那聽那頕頭講:「有道理,就按呢做。」

張員外按照算命先生的話,選一个良辰吉日,欲予天賜佮阿香結婚。天賜本來希望會當娶一个千金小姐,煞去娶著一个查某𡢃做某,誠無歡喜,但是伊毋敢違背伊老爸的命令,只好勉強答應。

有一工,張員外趁天賜去外媽兜蹛二、三工,無佇咧厝內時,去買一具棺柴,共厝所有的金銀財寶,攏囥入去棺柴內,然後共棺柴踮祖先的墓園裡,閣交代新婦家己死了後愛按怎處理。

張天賜對外媽兜轉來厝裡無偌久,張員外就破病,請醫生、食藥仔攏無效,最後猶是死去。張員外一死,天賜失去嚴父的管教,就嫌某出身卑賤,共伊趕出去。自按呢逐天花天酒地、嫖賭飲三字全,過著誠無正常的生活,幾冬後就共老爸所留落來的動產、不動產攏賣了了、開了了,最後真正變成一个乞食。

阿香予翁趕出門時,紮著幾兩銀,騎著一隻伊平時飼的驢仔,共驢仔講:「咱這馬予人趕出門矣,我毋知影欲對佗位去?請你帶我去該去的所在!」驢仔就載著伊,盤過幾若个田庄,最後佇欲暗仔時,停踮一粒細粒山跤的一間房屋頭前。阿香想講這或者是上天的安排,愛伊蹛踮遮。伊行入去彼間厝裡,發現內面蹛著一對老翁某,就墾求予伊蹛落來,老翁某看伊誠誠懇,就答應伊。

阿香蹛踮老翁某的厝內,用伊紮來的一寡銀兩,開一間𥴊仔店。阿香果然是一个真有福氣的查某囡仔,伊的生理愈做愈興旺,老翁某的厝也愈起愈大,閣加起幾若間倉庫,通好做糧食的買賣。有一冬,附近地區著飢荒,阿香就共倉庫拍開,救濟鄉里,別村的人來買糧食,也按平時無飢荒的價數賣出,趁了一筆錢,閣贏著大善人的封號。無偌久,阿香就變成鄉里內上有名的好額人。鄉里的人知影伊無翁,攏想欲來結親情,媒人婆逐天傱來阿香的厝裡欲提親,但是伊敢若有心事,總是吐大氣回絕。

又過一冬,村裡閣發生飢荒,阿香想講頂改干焦分糧食,這馬家己有錢矣,除了分糧食外,閣會當分予逐家兩个紅龜粿佮兩箍銀。村裡佮附近鄉鎮的人,攏爭來排隊等欲領糧佮錢。張天賜變成乞食後,四界討食,這時,拄好來到阿香的庄頭,也參咧排隊等欲領糧食佮銀兩。但是排隊的人實在太濟咧,張天賜自透早排到中晝,閣對中晝排到欲暗,規工無食半粒米,體力不支,都猶未輪到伊就昏過去矣。阿香的下跤手人看著伊可憐,就共伊扶入去灶跤,先予伊啉一碗薑湯,閣準備欲請伊食飯。

當張天賜予人扶入來灶跤時,拄好阿香也來灶跤,欲吩咐廚子晚頓愛準備的菜。伊看到人,就認出是前夫,看著伊面色黃酸、消瘦落肉、衣衫襤褸,驚一趒,心想:「張公子哪會落難到這種地步?」伊就大聲喝翁的名,張天賜起先猶以為是咧做夢,毋敢認面前這个貴夫人,等到斟酌看了,閣聽著阿香的解釋,才知影確實就是予伊放捒的家後。兩个人情不自禁𢯾做伙大聲吼。

張天賜從此以後,改過自新,佮阿香做伙轉去張員外的祖先墓園,共假棺柴拍開,提出所有的金銀財寶。翁仔某兩人閣認真拍拚,財產趁甲比張員外在世時,毋知加偌濟倍。這就是咱台灣俗語:「一个某較贏三个天公祖」的由來。