台灣有一句俗語，講：「三人五目，日後無長短話」，是咧提醒人做伙做代誌時，愛當場看明瞭、講清楚，毋通日後才來反悔。這句俗語有一个真趣味的故事。
古早以前，佇咱台灣某一个所在，有一个真媠的獨眼姑娘想欲嫁緣投翁，另外有一个跛跤的少年人想欲娶媠某。真拄好，兩个人攏揣仝一个媒人婆。這个媒人婆真出名，庄裡予伊牽成的婚姻，不計其數。伊人真機巧，講親情時，總是有辦法共各方的優點，盡量突顯出來，針對各方的缺點，就用較委婉的話點出來，予人日後無法度反悔。
這改，媒人婆佇了解雙方的優缺點了後，感覺會使共牽成。伊首先交代女方：「相親彼工，你愛覕踮房間內，攑一枝葵扇，共彼蕊毋正常的目睭閘起來，裝作嬌滴滴的模樣，干焦會使用彼蕊正常的目睭看人。」伊閣交代男方：「相親彼工，你踏入女方兜，愛盡量坐咧，需要徛起來抑是行路的時，著用長跤踏塗跤，共短跤囥踮戶橂頂，按呢女方就袂看出你跛跤。」
彼天相親的結果，雙方攏非常滿意，馬上答應婚事，媒人婆為著預防雙方事後反悔，特別交代講：「這馬男女雙方三人五目，日後無長短話。」當事人攏當佇喜頭，無人特別去注意這句話的意思。
這件婚事，雙方後來攏有咧怨嘆，毋過，媒人婆在理講：「我毋是講過『三人五目』，當然其中有一个是獨眼的，我閣講過『日後無長短話』，就是說日後袂使閣提起跛跤的代誌。彼陣恁攏在場，攏有聽著，也攏無意見，這馬欲埋怨誰？」
後來，台灣人佇咧做伙做決定、簽約時，要求對方愛照品照行，袂使反悔，就會用著這句俗語。
沒有留言:
張貼留言