這个好鼻師，號做阿明，蹛佇咱台灣中部的一个庄跤。伊腦筋靈活，可惜貧惰作穡、愛食甜、閣愛跋筊。伊生做普通，有一个㾀勢就是有一肢紅閣光的大鼻仔，庄內的人無共叫伊「阿明」，攏叫伊「紅鼻仔」。
紅鼻仔厝裡原來猶小可有錢，爸母過身了後，留一寡田地，但是袂堪得伊放蕩閣愛跋的歹習慣，無幾冬就敗了了。太太看伊規工毋作穡、閣愛跋，毋是辦法，就窮一筆錢交給伊，叫伊去城裡學趁錢的工夫。紅鼻仔歡歡喜喜提著錢離開厝裡欲去縣城，一離開，想講無人管矣，身軀閣有錢，規个人若像無鼻圈的牛仝款，無去學工夫無打緊，閣四界買甜物仔來食，像李仔攕、鹹酸甜，攏貯貯入去腹肚，最後免不了閣去跋筊，輸甲賰幾仙銀角仔，甚至共最後的幾仙錢也去買甜酒啉。
伊那啉甜酒，那咧想，這馬身軀無半仙，無地好去，干焦會當轉去厝，但是想著某予伊一筆錢，是欲予伊來城裡學趁錢的工夫，這馬錢開了了，啥物都無學著，轉去一定會予伊詈，但是閣較按怎講，厝總是愛轉去。紅鼻仔啉甲醉茫茫，蹁一下蹁一下對厝行去，行到庄仔頭的菜園仔，已經三更半夜矣，突然間，一隻規身軀全毛的怪物對面前走過，他驚一趒，大聲叫：「阿娘喂！」酒醒一半。那隻怪物也驚一趒，一下無細膩，煞跋落屎礐仔底，紅鼻仔斟酌共繩，原來是一隻肥朒朒的豬母，伊喘一口氣，手搭佇心頭那唸：「無驚無代誌」，才若無事人轉去厝。
轉到厝裡，紅鼻仔驚某罵，毋敢對大門入去，伊先旋去後尾埕，起去一欉大樹頂，對灶跤的窗仔門，偷看某煮菜，看某今仔日中晝食啥，伊忍著枵，一直到某食了，共賰的飯菜收好，才轉對大門大搖大擺入去。紅鼻仔一踏入門，某開喙就罵：「你才出去幾天就轉來，有學著趁錢的工夫無？」紅鼻仔靈機一動應講：「有矣，我學著一套專門鼻物件的本事，啥物物件，我一下鼻就知影。」某半信半疑：「遐厲害，曷無你鼻看我今仔日中晝食啥？」，紅鼻仔裝模作樣，四界鼻鼻咧，就共菜單一項一項照順序講出來；炒蕹菜，煎一尾鯽仔魚、茈薑炒豬肉。某聽伊攏講著，就喙笑目笑，歡喜翁有學著工夫。
這時紅鼻仔兜來一大群人，模糊中有聽著一个婦人人咧哭：「欲暗時，佇豬牢內，我猶閣共飼咧，哪知影目一𥍉就無看？真煩惱！」逐家共安慰：「劉大嫂，你先莫著急，咱分頭幫你去揣，一定會當共你的豬母揣轉來。」紅鼻仔才知影原來菜園仔內的豬母是劉大嫂拍毋見的。某聽了真歡喜，想講阮翁拄學著鼻物件的工夫，這馬劉大嫂的豬母拍毋見，拄好予伊有機會展工夫，叫伊鼻看覓，無的確會揣轉來。伊就向眾人講：「阮明仔的鼻仔會當鼻出拍毋見的物件，予伊揣看覓！」
紅鼻仔就行出門口：「劉大嫂，我的鼻仔鼻物件上靈，我已經鼻出，你的豬母走佗去矣！」我𤆬你來看。規陣人好玄嘛綴後壁，一路干焦看著紅鼻仔東爿鼻、西爿鼻，一副信心十足的模樣，行到菜園仔內，紅鼻仔突然間大聲叫：「佇遮，佇遮！我鼻著矣，是落落去園仔裡的屎礐仔。」逐家半信半疑行到屎礐仔一看，聖拄聖，豬母就浸佇內底，袂出來。
從此以後，逐家攏真欽服紅鼻仔，就尊稱伊做「好鼻師」，見若有物件拍毋見，攏來揣好鼻師鬥相共。好鼻師也真巧，除非伊拄好知影物件落佇佗位，若無伊袂凊彩答應。甚至有時陣，伊會故意偷提別人的物件去藏，等到失主來求伊相共時，閣裝做誠無願意的模樣，一直到失主千拜託萬拜託，才勉強答應，然後用鼻仔四界去鼻，共藏物件的所在共失主講。就按呢，伊的名聲愈來愈響亮，逐家佇揣著物件了後，攏會送伊一屑仔銀兩抑是禮物，伊也按呢趁一寡錢，生活也愈過愈好，某也無閣隨便共伊詈囉。
有一工，伊覕入去姓張的大財主厝，偷提伊的寶劍，共擲落去一个鼓井。第二工，張員外發現寶劍無去，急甲要死，忽然間想起好鼻師會當鼻出物件佇佗，就趕緊叫人請伊來。好鼻師假仙講無法度相共：「這是伊拄著上歹扭搦的代誌，因為寶劍無臭無味，誠歹鼻會出來。」張員外苦苦衷求：「寶劍是伊的心肝寶貝，請好鼻師一定愛相共。」好鼻師假仙勉強答應。張員外的人，攏綴踮好鼻師後壁，好鼻師這爿鼻鼻咧，彼爿鼻鼻咧，鼻到鼓井邊，突然大聲喝：「鼻著矣，佇遮啦！寶劍就落落去鼓井啦。」張員外趕緊叫人落去井底撈，無偌久就撈著寶劍。從此，張員外對好鼻師的本領非常佩服，逐家也就更加相信好鼻師的鼻覺囉。
好鼻師的名聲最後傳到皇宮裡。彼陣拄好皇上的一粒珍貴的金印拍毋見，宮內的人四界搜揣，攏一直揣無。伊聽著好鼻師的大名，就派人去請伊來皇宮，叫伊無論按怎愛共印仔揣出來。好鼻師接著皇上的命令，驚甲大汗㴙㴙流，但是皇上派來接伊的轎，早就等佇兜門口，欲走嘛袂赴矣，只好牙根咬咧，坐起去轎頂，扛轎仔那行，伊那想：「今這改隱死矣，揣無皇上的印仔，恐驚連這條老命也保袂牢矣！」
好鼻師予人扛到京城，入去皇宮，皇上真歡喜，叫人幫伊準備上好的食物佮房間，然後請左、右丞相陪伊去揣印仔。好鼻師無辦法可想，只好綴這兩个丞相踮皇宮行來行去四界鼻，行甲跤攏酸矣，也揣無啥物物件，伊想講到這个地步矣，只有死路一條，就停落來，吐一口大氣：「唉，左也死，右也死，橫直攏愛死！」左、右丞相看伊咧鼻的時陣，忽然間停落來，已經知影不妙矣，閣聽伊講彼句話，驚甲規身軀咇咇掣，凊汗㴙㴙流。原來金印就是左、右丞相共藏佇御花園的樹跤，準備揣機會篡位後使用。遮拄好，這个左丞相號做張橫，右丞相號做王直，所以聽著好鼻師講橫直攏愛死，誤會是好鼻師已經知影矣，所以驚甲半小死。
兩人馬上跪落塗跤，苦苦哀求好鼻師：「好鼻師，你的鼻仔誠靈，印仔確實是阮偷提的，請你毋當共皇上講，阮就共藏金印的所在共你講。」好鼻師看著兩个大臣招認，一時煞愣去，但是隨回神，故意講：「恁欲講毋講，攏無要緊，橫直我嘛鼻會出來。」二位丞相聽了，連忙請求：「只要你無欲共皇上講是阮做的，你就毋免閣鼻矣，阮直接共你講，金印就埋佇御花園正爿的桃花樹跤。」好鼻師即刻向御花園正爿行去，行到桃花樹，假仙東爿鼻鼻、西爿鼻鼻，才大聲喝：「啊！揣著仔！金印就埋佇這下面。」皇宮裡的太監即時攑出鋤頭來挖，挖一睏仔，果然看著一包黃色的包袱仔，共包袱仔拍開一看，金光閃閃的金印出現矣，逐家攏歡喜甲跳起來。
好鼻師親自共金印呈予皇上，皇帝龍心大喜，就當場欲封伊做官，好鼻師再三推辭：「我毋捌字，無學問，無法度做官。」皇帝就賞賜伊黃金百兩、白銀千兩，問伊猶需要啥物？好鼻師鼻仔摸摸咧，喙脣舐舐咧，共皇帝應講：「我上佮意食甜，希望會當好好食一頓皇宮的甜食。」講完，水瀾流甲規四界，皇帝看一下哈哈大笑，即刻派人送來上可口的甜食。好鼻師看著一盤一盤芳閣甜的食物，鼻仔鼻鼻咧，就倒手提蜂蜜糕仔，正手拈麥芽糖，閣大喙大喙啉葡萄酒，無限爽快。
過一時仔，好鼻師煞那食那吐大氣，皇帝感覺奇怪，就問伊：「好鼻師，你是按怎吐氣？敢是遮的甜食無好食？」好鼻師搖頭：「毋是，毋是！我只是咧想，皇宮裡遮的甜食今仔日我也食著了，但是聽講天頂的甜食閣較好食，我若會當起去天頂，食著遐的甜食，我這世人就心滿意足矣。」皇帝目睭褫甲大大蕊，著驚講：「天頂有美食？曷欲按怎起去？」這時陣，皇帝身邊，一位白喙鬚的大臣，突然間笑咪咪講：「上天，其實並無難。我聽講只要用真濟的蝦仔鬚，共編做天梯，就會當起去矣。」好鼻師聽一下真歡喜：「唉喲！皇帝，就請你賜予我一个天梯！」
皇帝隨時答應，即時下令，叫全國的討海人去掠蝦仔，共蝦仔鬚鉸落來集做伙，閣叫誠濟手路幼秀的女工，共遐的蝦仔鬚，編做一條天梯。講也奇怪，蝦仔鬚的天梯一下編好，一頭就自動對天頂飛去，愈飛愈懸，軁入去雲裡，消失去。全國上千上萬的老百姓攏攑頭準備，皇上也率領文武百官，欲看好鼻師按怎天梯上天宮。好鼻師開始矣，毋過蝦仔鬚的天梯幼閣軟，真歹。好鼻師頭殼內全是天頂的甜食，就毋顧一切一直，愈愈懸，伊頕頭一看，塗跤的厝攏變甲細細間仔，而人攏親像麻仔遐細粒。
好鼻師終算爬到天頂，伊的頭一下軁入去雲裡，就拄著雷公出巡。雷公看著好鼻師，大喝一聲：「佗位來的紅鼻仔，竟然敢大膽走來天頂！看槌！」雷公用力霆一聲大雷，「轟隆！轟隆！」，彼條幼閣軟的天梯一下就予雷聲震斷，好鼻師也驚一下一頭對雲頂跋落來。
可憐的好鼻師對遐懸的天頂栽落來，身軀摔一下煞變做散埃埃的拊粉，傳說講，遐的拊粉，後來就變成了無數咧塗跤爬的狗蟻，咱這馬講狗蟻的鼻仔上靈，四界爬四界鼻去揣甜食，就是因為是好鼻師的化身，鼻仔才會遐靈！
註：故事脫胎自本原稿
註：故事脫胎自本原稿
