2021年12月13日 星期一

台灣民間故事:野柳的傳說

佇咱台灣北部海岸中,新北市萬里區的「野柳」是大屯山脈伸入去海裡的海鼻,對金山遠遠看,若像藏佇海中的大隻龜,所以又號做「野柳龜」。野柳因為受著海浪侵蝕、岩石風化佮地殼運動的影響,生成海蝕洞溝、燭台石、蕈狀岩、豆腐岩、蜂岫岩、壺穴、溶蝕盤等種種奇觀,其中女王頭、仙女鞋、扛轎嶼佮燭台石等,更聞名國際。今仔日咱就來講有關野柳的傳說。

真久以前,萬里是一个小王國,王國的女王,真照顧伊的百姓,也真受著百姓的敬愛。彼時,萬里的野柳龜是一隻母的龜精,宜蘭的龜山島卻是一隻公的龜精,因為互相相意愛,就求東海龍王予伊成親。東海龍王真歡喜,除了請女王做的媒人,閣派蟹兵蝦將做先鋒,𤆬一陣陣頭,扛著兩頂轎,帶著迎親的物件:燭台、仙桃、金銀財寶、真珠瑪瑙等,趁天光的時,對宜蘭出發來萬里娶親,一路鑼鼓響亮,鬧熱𩑾𩑾。來到萬里的時,女王親身𤆬著一陣伴嫁的仙女,欲陪綴新娘嫁去宜蘭。

彼時,佇萬里外界一角海角,蹛著一个巨人,伊一向就對野柳龜有意思,彼工看著來娶親的陣頭,感覺非常怨惱,就等野柳龜咧欲上花轎的時,抾著一粒大石頭,相真真對花轎掔去,佳哉,掔歪去,但是眾人已經驚甲亂操操、亂亂傱,扛轎的也走了了。

女王誠鎮靜,馬上帶領眾仙女佮蟹兵蝦將佮巨人捙拚。巨人那傱倚來,那抾大石頭擲眾人,女王佮眾兵也無咧驚惶,攑出弓箭,一直共射。不而過,巨人若像無啥顫璺著,猶是一直衝過來。女王看看毋是範勢,就抽出伊的寶貝金光剪,祭起去空中,對巨人的頭殼剪落去,巨人袂赴閃避,頷頸仔予剪著,受傷嘛嘛吼,無法度閣進攻,只好越頭走轉去。

戰鬥結束,女王看看這个親情結袂成矣,就吩咐眾人轉去,並且開始檢點嫁娶的物件,煞發覺攏散甲規四界。伊為著欲保護野柳龜,袂閣受著巨人的騷擾,就決定永遠徛踮遐,目睭也一直掠向巨人蹛的所在。

這馬咱若去野柳耍,就會當看著女王頭,彼就是守佇遐的女王,經過年久月深的風化,所賰落來的頭;咱也會當看著這場戰鬥的遺跡,包括戰鬥時仙女落落的仙女鞋、猶停佇野柳港外一浬外的扛轎嶼、落佇金山海面的燭台石、以及散佈佇海灘上的仙桃、瑪瑙等等的珠石了。

 

2021年12月3日 星期五

台灣民間故事:劍潭的傳說

劍潭,是臺北市中山區、士林區的一个地名。原來是基隆河流到這馬的圓山仔附近(彼段河流早前叫做大浪沙河),佇遐轉斡,河面變闊,看起來若像一个「潭」。這馬基隆河已經掠彎做直,所謂的「潭」也已經消失。這馬的劍潭,實際上是基隆河對承德橋到中山橋中間的這段河道。明末,閩南人來遮開墾,佇潭邊有起一間劍潭寺,寺裡奉祀觀音菩薩。關於劍潭有一段傳說:

大約佇三百年前,鄭成功率領軍隊,登陸台南安平,共彼當時占領台灣的荷蘭人趕轉去。鄭成功一面建設台灣南部,一面向台灣北部進軍。

 這工天氣炎熱,軍隊行到大浪沙河,逐个兵仔攏汗㴙㴙滴,閣喙焦喉渴,規隊行甲無攬無拈。突然間平地絞起一陣大風,飛砂走石,軍隊煞無法度閣前行。鄭成功佇馬頂,予風飛沙坱甲目睭攏擘袂金,嘛毋知影頭前是發生啥物代誌。一直等甲風較恬矣,伊才指揮軍隊繼續前進。這時,一个部下傱來報吿講:河裡起大湧,一直湧對遮來矣。鄭成功聽煞,催馬衝到河邊,煞看著一隻真大隻的魚精佇河裡滾絞,鼓起一大片足懸的水湧,強欲甲行佇頭前的士兵攏捲落去河裡。

 鄭成功看看毋是範勢,即時拔出掛佇褲頭的寶劍,相真真對魚精擲過去,魚精著劍,鮮血直流,毋過猶是滾袂煞,最終無體力矣,才恬靜落來,撐死佇河裡,水湧也就按呢漸漸平息。鄭成功的軍隊也總算會當安全渡過大浪沙河。這段大浪沙河,因為河面曠闊,看起來真像一个「潭」,這馬閣有鄭成功的寶劍沉佇遐,就按呢予人號做「劍潭」。

 聽老大人講,農曆逐個月十五暗,月娘當明的時,鄭成功擲落的寶劍攏會浮出水面來,映著月色,光芒四射,非常美麗。毋過,若有人想欲伸手去撈,伊就沉落去,誠神奇。

改寫自:名相伊尹:民間故事—劍潭的傳說

2021年12月2日 星期四

台灣民間故事:白米仙洞的傳說

佇這馬的基隆碼頭附近,有一个真有名的所在,叫做「白米仙洞」,相傳這个仙洞以前曾經流出白米來!

原來,真久真久進前,佇基隆碼頭附近,有一間細細間仔廟寺,寺裡蹛著一大一小兩个和尚。因為所在偏僻,來拜拜的香客無濟,會當收著的香火錢也無濟,毋但無法度修整廟寺,定定連腹肚嘛飼袂飽,瘦甲干焦賰一層皮,最後只好佇廟邊空地種一寡菜,靠賣菜的收入度日子。

有一工,突然落起大雨,嘩啦嘩啦一睏落欲三四工,誠無簡單才停。兩个和尚行出廟口,小和尚一看就喝起來:「哎呀!害囉,咱的菜攏予雨沃甲爛了了,這聲無菜通賣,愛閣吊鼎矣!」大和尚氣怫怫紲落去講:「就是嘛!燒香拜佛拜十外冬,菩薩猶予咱咧枵飢失頓,真了然!」小和尚緊共擋講:「毋當按呢講!菩薩是上仁慈、上公平的,無定著伊早就想好辦法欲幫贊咱!」

講也奇怪,彼暗,小和尚就做一个夢,夢著家己佇大殿掃地時,菩薩突然開喙講話:「小和尚啊,恁毋是咧煩惱會枵著?來,我共你講,咱們廟後的山壁頂有一跡石縫,明仔載你去遐,攑手踮石縫邊拍三下,就會有食的啦!」小和尚醒來了後,愈想愈稀奇,天猶未光,就趕緊走去共大和尚拹醒,搝伊向廟後的山壁彼爿行去。

這時,日頭猶未起來,草葉仔頂全是閃閃爍爍的水珠,衝衝碰碰穿軁來軁去,褲佮鞋仔煞攏予水珠滒澹去。「是咧創啥!透早毋睏,搝我來拍山壁!害我的褲佮鞋仔攏澹去。」大和尚規腹火無地出,宛那挼目睭,宛那詬詬唸。閣過一陣仔,總算看著山壁,大和尚緊揣一粒大石頭,一个尻川就頓落,心頭猶咧喘咇怦。小和尚卻是興𩑾𩑾,攑頭佇山壁四界揣。

「啊,佇遮啦!」小和尚總算佇山壁頂揣著一跡細細的石縫。伊一歡喜,就攑手佇縫邊用力拍三下。「啪!啪!啪!」無想到第三下拄拍煞,一陣離離落落的聲音後,就看著一粒一粒的白米連做伙,若像一逝細逝的水沖仝款,對石縫內流出來,落甲規塗跤。這時,日頭拄出來,白皙皙的米粒閃爍佇日頭光內底,就若像珍珠仝款,有夠媠。

「菩薩啊,真正有白米呢!」原來佇山壁邊仔盹龜的大和尚歡喜甲對石頭仔頂跳起來,喙笑目笑傱來看,小和尚更加歡喜。兩人緊搝著衫仔裾尾,跍落去塗跤,共米抾抾包包帶衫裡。講嘛奇怪,抾了無偌久,石縫就無閣流白米出來。

「拍山壁就有米通食,是真好啦,可惜無蓋濟。」大和尚看著抾起來的米,蓋成拄好有夠兩人食一頓,煞有一屑仔失望。毋過小和尚卻心滿意足講:「哎喲!你莫遐爾貪心啦!遮攏是菩薩賜予咱的,菩薩都欲共咱鬥相共矣,無的確以後猶有呢!你莫想遐濟?」果然,以後若需要米的時,只要到石縫邊拍山壁,石縫就會流出白米,毋過逐擺攏無濟,攏拄好有夠兩人食飽。

這一工,天氣真好,廟裡來了幾若个燒香拜拜的人,添了袂少香火錢,想欲留落來食中晝。大和尚面憂面結對小和尚講:「害囉,石縫逐擺流出來的白米攏干焦有夠咱兩人食,今仔日來遮濟人,欲按怎?」小和尚應講:「無要緊,我來去看覓,無的確菩薩嘛知影今仔日香客較濟呢!」

煮飯前,小和尚擔著米籮行到廟後的山壁,伊那拍山壁,喙那唸講:「菩薩啊菩薩,今仔日來寺裡燒香的人較濟,請您加流寡米予我!」話拄講完,石縫裡就開始離離落落流出米來,毋過這改的白米,流著真緊,份量嘛是以往的幾若倍。小和尚歡頭喜面共白米貯踮米籮,擔轉來寺裡。講嘛奇怪,煮出來的飯就拄仔好予所有的人食飽。從此以後,若無香客,石縫流出來的米,就恢復以前的份量,曷若有香客,不管有偌濟人,石縫裡流出來的米攏會有夠食。

石壁的白米親像永遠流袂了仝款,而且逐改流出來的份量也攏拄好有夠逐家食飽,真是神奇。這个消息一傳十、十傳百,善男信女認為是菩薩顯靈,就相爭來拜拜,寺裡的香火也變甲真興旺,毋但有錢通修整廟寺,嘛愈修愈媠,兩个和尚的日子也愈過愈好,飼甲若像大腹肚桶仔。

這一工下晡,突然間又閣落著大雨,寺裡無香客,大小和尚拄食飯飽,坐佇大殿裡開講。大和尚那拭油朒朒的喙脣,那拍圓滾滾的腹肚講:「咱廟後的彼个石縫實在傷細空,逐改流出來的白米攏干焦有夠咱食。我想欲共伊挖較闊咧,予伊會當流出來較濟白米,按呢咱就會當共食賰的白米提去賣,生活嘛會較快活」

小和尚一聽,心肝嚓一趒,連鞭講:「毋通遐貪心啦,菩薩若知影會受氣!」大和尚共小和睨一下,講:「你捌啥物,趁這馬閒閒,我就來去!」講了,錘仔攑咧,就欲向後山去。「袂使啦,毋通挖啦!」小和尚趕緊仆起去共阻止,但是身體較勇壯的大和尚卻一手將伊捒入去兩爿的禪房,閣共房門鎖起來。不管小和尚佇內面按怎大聲喊,大和尚搦著錘仔,一下越頭就向廟後的山壁行去。

無一觸久仔,大和尚來到山壁,伊攑起槌仔就相真真對石縫共大力摃落去,紲落就聽著吭吭吭吭,一聲一聲對山壁響起,壁頂的石縫也慢慢楦成一个石洞。大和尚真歡喜,即時攑手大力拍山壁—「啪!啪——」無想著第三下猶未拍落去,就聽見隆隆隆隆大聲響,一大堆塗沙摻著大石頭,突然對洞裡輾出來,若像雷公爍爁仝款掔對大和尚的頭殼頂。大和尚大叫一聲,就昏倒在地。佳哉,這時陣,小和尚已經對禪房的窗仔爬出來,趕到洞邊,才共大和尚救轉去。

從此了後,不管按怎用力拍山壁,彼个石洞卻無閣再流出白米囉!這个消息閣一傳十,十傳百,真緊逐家攏想講菩薩無欲顯靈矣,也就毋願閣去寺裡燒香拜拜了。無香火錢,兩个和尚的大腹肚桶仔就漸漸消落去,尾仔瘦甲賰一重皮,廟寺也漸漸落衰落去。只好閣佮以前仝款,過著去菜園仔種菜、賣菜的艱苦日子。

這个會當流白米飼和尚的石洞的故事就按呢以「白米仙洞」的名傳落來。

改寫自:講古人:仙洞裡的白米

2021年11月7日 星期日

記持中的囡仔時代

***揤遮就會當看著無亂碼的文章

我的囡仔時代欲對當時開始講咧?抑無,就對我出生彼一冬好啦!時間:一九五四年,地點:嘉義縣民雄鄉東湖村。一九五四年是一个啥物款的年代?一九五四年是日本人收拾著的驕傲離開台灣後九冬,是二二八事件後七冬,彼當時,台灣的經濟無捨無施,農村是社會的主體,農業是最要緊的命根。「嘉義」,以往叫豬羅,是雲嘉南平原的中心,是標準的農業大縣。「民雄」,以早叫打貓,是嘉義上北爿的幾个鄉鎮之一。民雄的農作物主要有稻仔、番薯、甘蔗、王梨。「東湖」,也叫東勢湖,徛佇民雄的東爿,閣向東去,過北勢仔,就連到山裡。山裡有一間佛寺,叫「寶林寺」,香火真興,過年時,定定看著男男女女,穿佮五花十色,挨挨𤲍𤲍,相招去寶林寺拜拜。

對貫迵過民雄的縱貫公路向東,無到一公里,就到東湖村的庄頭。庄頭有一條橋,橋前有一間萬應公廟,簾簷掛一幅橫扁,頂懸寫著「有求必應」。聽講廟裡祀的是戰爭的時,死佇荒郊野外無人收埋的白骨。到了暗時,廟前彼葩細粒電火球仔會點著,毋過,閃一下爍一下,若像恐怖電影咧,有一點仔驚人。囡仔放學若較晏,規路無電火,本成就有一點仔搭嚇,行到橋頭,看著電火,心頭才拄仔燒烙起來,閣想著廟內的白骨,煞愈驚惶,愈行愈緊,趕欲入庄。入到庄頭,最顯場的就是三官大帝廟,廟無蓋大,但是伊前後的廟埕加起來算誠闊。暗頭仔,涼風吹來,囡仔上佮意佇遐耍。庄裡上大的祭典是上元暝,想欲拜求三官大帝的、下願的、還願的,倩幾若團的布袋戲佮歌仔戲,佇廟前廟後搬演,鑼鼓聲鬧熱𩑾𩑾,規个廟埕攏是看戲的人。戲定定一搬就連幾若暗,廟埕邊的攤仔嘛定定連來幾若暗。攤仔賣的有食、有啉、有耍的,我上懷念的就是「燒酒螺」佮「豉菝仔」,細漢的時,那看戲那欶燒酒螺的滋味,想起來猶閣會流喙瀾。

阮老厝就踮三官大帝的廟後,過一个路就到,是一落用紅磚烏瓦起的、坐北向南的五間厝,厝佮路中央,是一个大門口埕。門口埕的東爿種過菜瓜、木瓜;西爿種過籃仔花、番仔桃;上頭前倚路邊種規排的七里香矮欉,遐的七里香每到開花的時,真正是芳甲七里外攏鼻會著。會記得讀大學歇熱的時,坐慢車對台北硞轉來到故鄉,已經半暝,月色當媠,猶袂行到厝,就鼻著彼个熟似的芳味,心情也規个歡喜起來。門口埕是歇睏、曝粟仔、辦喜事喪事、佮放烏白電影的好所在:樊梨花移山倒海、白娘子水漫金山、王寶川孤守寒窯,袂少的民間傳奇,就按呢深深印入去細漢囡仔的心靈。庄跤囡仔真早就愛學騎跤踏車,門口埕是上好的訓練場。佮這馬無仝的是,早期為著欲幫贊穡頭,買的大多數是「武車」,後坐是一个大鐵架,通好載農作物、肥料、或家私。武車骨架重閣懸,囡仔人細漢若坐起去椅苴仔,根本踏袂著跤踏仔,只好倒跤踏踮倒爿的跤踏仔,正跤囊過固定車身的三角架的空縫,去踏正爿的跤踏仔,就按呢歪著腰身,掠好手扞仔,一輾閣一輾,踅門口埕學騎車,阮共這種騎車的姿勢叫做「騎囊空」。騎囊空愛有真懸的平衡技術,摔倒是四常的代誌,但是武車遐爾重,若摔倒去硩著囡仔就害囉,所以序大人攏會佇後坐縛一枝長長的竹棍仔,萬一跋倒,竹棍會先撞著塗跤,車就敧一爿倒落來,按呢囡仔就會使勻勻仔共正跤囊倒轉來,溜旋出來!

暗頭仔的時,較無遐熱,門口埕就變成大人歇忝的所在。阮會共厝內的竹椅仔攏搬出來,大人攏坐踮椅仔頂,那擛葵扇那開講咧消磨一工的疲勞。囡仔就佇埕中央耍,有時會綴著蠓仔、日婆跳舞。聽講為著欲揣某,欲暗仔時,你若恬恬徛咧,就會有一大堆蠓仔公飛踮你的頭殼頂,若像一港烏煙,對頭殼頂一直衝去天頂,你按怎振動,烏煙就按怎徙動。趣味的是,日婆這時會扮做救難者的角色,用「之」字形的舞型替你除害。庄跤的日婆平時攏蹛佇簾簷下面,日時你會看著倒頭栽掛佇橫樑睏甲恬喌喌,一到欲暗仔,就活過來。庄跤猶閣會定定看著燕仔,也四常佇橫樑做岫。欲暗仔時,捽一下對門口埕的西南角飛掠到東北角,佇空中劃出一道有夠媠氣的圓弧,遐爾輕可的舞姿袂輸上偉大的芭蕾舞星。一到月娘出來,門口埕又閣變成另外一个景象,徛佇埕中央,攑頭看天,規个天頂若像一幅畫布,烏暗的背景嵌著大大細細、閃閃爍爍的星,根本就是一幅星斗圖的說明書:看著正北的子午星,伊永遠遐爾光,可惜佇銀河頂煞揣無牛郎織女相會的鵲橋;一年到矣,北斗星的匏桸攏袂失信,一定會比轉來東爿。

大埕的東南角,栽著一欉老龍眼樹。無人知影老龍眼樹有偌濟歲數,橫直從捌代誌以來,伊就是彼个老硞硞的款。老龍眼樹就像美國的老忠實噴泉仝款,真忠實佇七月半欲到進前,準時結出大粒閣甜的龍眼,拄好會當提來中元普渡。這時,囡仔上歡喜,相爭起去樹頂,有人學孫悟空佇遐幌樹椏、挽龍眼,有人恬恬䖙佇較大枝的樹椏頂,欣賞著規把規把粒粒飽滿的龍眼,耍規半工都毋落來。老龍眼樹毋但是囡仔上親密的耍伴,也教規身的攀功夫。七里香成做的籬笆是另外一个遊樂場。熱天時,七里香白花當開,芳氣當厚,蜜蜂就會是的主顧客。細漢的時,愛共蜜蜂創治,看著蜜蜂當咧無閒採蜜,大拇翁佮指指就恬恬攑懸,偷偷仔徙倚去蜜蜂的翼後,等雙翼合起來的瞬間,捏牢的雙翼,共掠懸囥入去豆油矸仔,斟酌欣賞,看𤺪矣才放飛走。一開始,欲會當掠著蜜蜂而無予叮著,無遐簡單,毋過,加掠幾擺,尾仔欲佮蜜蜂耍「七擒七縱」,就誠順手囉。

老厝後壁,種一欉楊桃,樹絡粗閣勇,樹蔭闊閬閬,逐冬攏生真濟楊桃,我上佮意伊的花,細細蕊仔,茄紅仔色,共規欉樹仔妝甲親像欲出嫁的姑娘仔,誠有喜氣。毋過年久月深來,楊桃煞愈生愈細粒,愈來愈酸,袂食得咧,但是就是毋甘共剉掉。樹後隔一个後埕蹛著兩戶塗墼厝,分別是兩个阿叔的厝,閣再後壁種著蓮霧、龍眼、檨仔、柚仔,宛然是一片果園。細漢時庄跤水果攏家己種的,食較濟嘛毋免錢,大漢了後,到台北讀冊,初次看著水果愛用錢買,真正毋敢相信。果園後面,就是一條一、兩丈闊的河溝,阮叫伊「後溝」,佇遐就會當看著岸邊植物黃目子(ba-bui-tsí)佮麻竹。佇彼个經濟無好的時代,黃目子的果皮是真好的雪文代用品,麻竹閣較是重要的經濟作物,伊除了提供新鮮的竹筍、曝豉的筍乾外,麻竹葉仔會使提來包肉粽,竹仔會使取來起厝、圍籬笆、編竹籠,是製作所有家具的主要材料。後溝是規个庄的主要水源,水真清氣,有魚有蝦。厝內用的水,是一桶一桶用扁擔對後溝擔轉去的,囡仔細漢,一个人擔袂起,就兩个人攑竹棍仔扛。扛轉厝的水愛共倒入去大水缸,佇水缸內囥明礬,予水坐清了後,煮飯、煮菜、燃滾水就用遮的水。曷若欲洗身軀、洗衫仔褲就無遐好命,干焦會當去溝仔邊洗!

彼當時用紅磚仔起的厝,佇庄跤算是較好的厝,大多數人蹛的攏是佮阿叔仝款的塗墼厝,就是用大塊塗墼鞏起來的彼種。講是紅磚仔起的,也只是外牆的部份,厝內用來隔做五間房間的,猶是用竹篦仔糊紅毛塗的塗竹牆。除了愛接力的柱仔是木材外,多數的樑柱猶是竹仔。塗跤就是佮門口埕仝款的塗,無鋪半點石仔。厝頂崁的是紅瓦片,一排凹一排凸扣做伙,凸排的瓦片兩爿另外用紅毛塗共糊牢咧,驚去予風颱捲去。雖然講隔有五間房間,欲蹛兩家代,論真是無夠的。正中央彼間是大廳,大門是雙扇門佮一个門閂,正對大門的壁囥一張尪架桌,奉祀神明佮祖先,下面囥一張八仙桌。大廳左右兩爿各排兩隻竹椅仔,中間挾一隻竹桌,共遮的物件扣掉,就賰無偌濟空地。接佇大廳兩爿的是兩間睏房,分予阿伯佮阮兜兩家代,睏房攏是總鋪。彼陣庄跤穡頭濟,逐項攏愛跤手,一家代生半打一打的囡仔算誠平常。阮兜七个人,算是標準的,毋過,欲共七个人櫼入去一頂總舖,也毋是遐簡單。上東爿的是灶跤,兩个大灶,一壁菜廚,一張食飯桌,幾張椅條頓落去,會當順利提物件進出就算袂䆀。上西爿的是五間尾,做倉庫用,農作物、農具、肥料窒甲規四界,嘛賰一條細條仔路通好過路。早期庄跤上對重過年過節,過年過節著愛做粿,親像甜粿、油蔥粿、芋粿、菜頭粿、發粿、紅龜粿、芋粿曲、米篩目、紅圓仔等等。做粿著愛用石磨磨米,灶跤無夠闊,阿爸就佇灶跤東爿搭一个棚仔,囥一个大石磨。磨米愛兩个人,一人挨石磨,一人共浸了一暝的秫米𣁳入去石磨靠邊的空,磨出來的米漿用拔桶來承,磨好了後,才規桶倒落去米袋仔袋好,佇頂頭硩一粒大石頭,隔轉工變做粿粞後,就會使提來做十花五色的粿。挨石磨是大人的代誌,囡仔上愛搶𣁳米,看著米漿㴙㴙滴流落去拔桶,聽大人講天講地,是記持中上趣味的代誌。

一九五九年的八七水災,聽講真恐怖,毋過做囡仔時的記持無講蓋特別,因為記持中逐年攏有真「好耍」的風颱。彼時的氣象報告,無這馬遮爾準,佳哉,暗頭仔的彩雲,會漏洩一寡消息。風颱欲來進前,西半爿的天頂往往紅雲密佈,夕陽的光線對較薄的彩雲後壁射出萬道金光,這个光景用來形容布袋戲裡,武功高手初現武林的「金光閃閃,瑞氣千條」,上適當。風雨欲來進前,阿爸一定會小心檢查門窗,閣起去厝尾頂修理破瓦。有一改,風較大,伊驚厝頂予風捲反過,就踮凸排瓦頂頭閣硩紅磚仔。毋過,干焦硩起去的紅磚若擋袂牢風颱,予風吹振動,去摃著厝瓦顛倒食力,最後就規氣滒紅毛塗共黏牢佇瓦頂。平常時看著厝頂的紅磚仔遮一塊遐一塊,無蓋好看,有風颱來的時,心內卻是較安心。窮實,大風大雨是真歹擋的,紅磚仔外牆雖然風雨透袂入來,但是窗縫就擋袂牢囉,風對窗縫貫入來莫講,雨水嘛洩甲規片窗仔下面若水沖咧。客廳的雙扇大門下面嘛相,兩扇門對關的時本成就無啥峇,門跤佮戶橂中間的空隙閣較密過米篩,對遐透入來的風、流落來的雨,一目𥍉仔就共塗跤淋成漉糊仔糜。規暗,大人面憂面結捾著面桶、拔桶四界承水。囡仔人也無咧閒,褪赤跤,雙跤趨來趨去,四界鬥相共,「耍」甲喙笑目笑。一到暗時,情況愈危險。山頂的雨水直衝落來,一時仔就共後溝的水位衝懸,強欲崩墘,大人煩惱隨時需要趕去共溝墘坌懸;厝外風繏繏叫,攏無停歇,又閣操煩厝頂予風掀反過;厝內嘛逃袂過貫入來的風神的𧿬踏,內牆咇擗響、若欲抨落去,細細葩的蠟燭火嘛綴咧搖、爍一下爍一下,強欲化去(彼時蠟燭以外,就是番仔油火,少有電塗,電火就愈毋免數想囉),此情此景豈是一个憂字講會了?囡仔規頭殼攏放袂掉予蠟燭火印佇壁頂搖搖幌幌的烏人影,家己嚇家己,煞睏袂落眠。辛苦撐到天光,風颱較細矣,就看著三五人群挨挨櫼櫼衝對後溝去。因為後溝的溝水已經變成一大港的濁掣流,水聲挵挵叫。綴著掣流佇溝裡絞滾的,攏是予大水對山頂沖落來的一橛一橛的杉仔佮竹仔,只看見大人囡仔,無顧危險、瀳倚去溝仔邊,相爭搶搝幾橛仔衫仔、竹仔通好提轉去燃火。風颱過了的清理才是食力,干焦一个門口埕,就積半吋懸的漉糊仔糜,上少著愛摒兩三工才會清氣。

庄內的人大多數攏種稻仔,囡仔對掖秧仔、犁田、耙田、播稻仔、巡田水、掖肥料、澍藥仔、挲草,到攑鐮歷仔割稻仔、用摔桶摔米、佇稻埕曝粟仔、絞風鼓鼓冇粟仔、載粟仔去米絞絞米,遮的穡頭,攏袂生疏。印象上深的是稻仔飽膭的時,欲暗仔,徛佇田岸邊遠遠看去,規片金黃色的稻仔穗,綴著涼風湧來湧去,若海湧咧,誠媠。電火柱頂掛著予夕陽照成金黃色的電線,歇佇頂頭的一陣粟仔鳥佇遐嘻嘻嘩嘩,敢若開講甲真趣味。越頭看入去庄內,草仔厝、塗墼厝、紅磚仔厝的煙筒攏咧衝煙,是家家戶戶煮飯的時陣;水牛忝規工,一浸著溝仔水,就牽袂起來;細漢囡佇溝裡耍水,有時會用澹沙仔滴出一座城堡,有時會挖岸壁的紅潤塗捏塗尪仔,水聲、笑聲、水牛的哞哞聲,真正是聲聲透濫!這款的庄跤景緻,平靜中摻著禪機,彼時年歲較少,面對此景,猶是會感觸沈醉。稻仔割了,田裡的變化上大。金黃色的稻仔穗無去矣,賰落來的是一簇一簇矮矮的稻草頭,猶有加出來幾座筍形的大草垺,佮紩好喙口、櫼甲飽飽、徛規排的布袋,最後就是規群飛落來田裡揣落穗食的粟鳥仔,遮的物件親像咧提醒彼个拄仔才失去的風華。割稻仔是大代誌,大多數攏愛倩人相共,這時就有我上愛食的割稻仔飯通食囉。割稻仔飯是欲予割稻仔工人食的點心,若像飯湯:飯泡佇湯裡,會使止喙焦,也較好吞落喉。毋過,毋是糜,因為割稻仔愛出力,食糜擋袂久。割稻仔飯內底摻有滷肉佮竹筍,滷肉彼時毋是四常食會著的,所以食起來除了甘、脆、油、芳外,也特別珍惜。檢采是彼份油芳味的記持,這馬想起來,猶閣會流喙瀾!

佮年歲差無偌濟的仝庄的囡仔比起來,我可能是較幸福的。當逐家攏猶佇蹛塗墼厝、提番薯簽攪鹽做飯食的時陣,我就蹛紅磚仔厝、食「番薯箍飯」囉。番薯簽是共新鮮的番薯礤簽、曝焦後收起來,留咧後擺好食的物件。稻仔收成後若毋甘留落來家己食,攏總賣予米絞,食飯時,規碗就干焦看著番薯簽。番薯箍飯就好濟咧,碗裡毋但有白米飯,猶有一箍一箍新鮮的番薯。彼時的庄跤囡仔,新鮮的、抑是曝乾的,攏捌食過番薯,大漢後經濟較好矣,往往看著番薯就厭氣,想講會當減食就減食寡。哪知影風水輪流轉,這馬番薯飯卻是高級餐廳的上頂料理呢!彼時的囡仔檢采自細漢就作穡作甲驚著,攏著急欲緊入學,若拄著穡頭較閒,幾个囡仔就拑做伙,佇開過花的起痟竹仔下面,假影上課。大概是我較閒,也較早學過注音符號,因此四常扮做老師,攑著竹枝,指揮囡仔唸「ㄅㄆㄇㄈ」,一副春風化雨、作育英才的專業範勢!檢采冥冥之中,早就劃下了未來做老師的路。就佇滿六歲彼年,當咧專心教囡仔唸書的時,突然接著「入學通知單」:一心歡喜,一心憂愁,我的囡仔時代就按呢行入了歷史。

~~~~~~~~~~~~~~~~~~~~~~~~~~~~~~~~~

2002 何正信 誌於台北-我的第二個故鄉

2021 何正信 改寫為台語文

~~~~~~~~~~~~~~~~~~~~~~~~~~~~~~~~~