台灣有一句俗語，講：「周百萬用銀免用錢」，講的是台北人「周金龍」，供體伊用錢傷冗剩。伊會遮爾討債，佮老爸「周百萬」有關，這馬咱就來講這段因緣。
古早台北算是咱台灣開發較慢的所在，二百外年前，除了艋舺以外，其他所在攏是荒地。彼時一批一批佇中國算同鄉或者是同宗、仝姓的移民攏過來開發。比論這馬的古亭區一帶，當時就是由姓周的開墾的，因此彼搭的居民上濟姓周。
「周廷部」是福建泉州安溪縣人，也綴著族人遷徙來台，蹛在古亭庄。起初替人耕作，因為伊骨力閣勤儉，無偌久就粒積一寡錢，就開始自立門戶，開一間庄跤𥴊仔店，賣寡日常的生活用品，兼耕作一寡田地。一年了後，伊看基礎在矣，就接某囝來台灣。某賢慧，廷部聰明，兩人對人攏親切，經營的彼間𥴊仔店，生理也漸漸興旺起來。
有一改，伊去共人批三籠麵線，搬轉到厝，才發現前兩籠下面攏藏有幾百兩銀，第三籠卻無。伊等三工，一直無人來討，認為是上天送予伊的橫財，就共彼筆財富，提來經營船隻的貿易。無想到船隻的生理非常順序，趁了袂少，無幾冬，就共店頭擴大到各地，並且佇古亭、大安、新店、松山以及中和地帶，買真濟土地，變成台北數一數二的富豪，逐家就按呢叫伊「周百萬」。
事業發達了後，伊上遺憾的，是翁仔某結婚十外冬，攏無生一男半女，毋但後嗣無向望，生活也較寂寞，見想著這層代誌，伊就心慒慒。兩个翁仔某嘛有四界去求神拜佛，求看有後代無，但一點仔效果都無。
有一工，一个田佃共周百萬講：「我佇新店溪獅仔山邊的大潭掠魚時，看著潭裡，有一隻真大隻的鱸鰻，身圍若水桶遐粗，有一丈外長，目睭光閃閃，若像一尾龍。」周百萬是有錢人，知影大鱸鰻是上好的補品，食了對身體真好，無定著身體勇壯了後，會當生幾个後生。因此伊就出八兩銀，叫彼个人去掠。
第二工欲暗仔，周百萬當佇店裡無閒的時，店口突然來了一个和尚，手攑蠓捽仔，雙手合掌，口唸「阿彌陀佛」，共夥計問：「請問周員外有佇店裡無?」夥計以為是化緣的和尚，就反問講：「你揣員外有啥物代誌?」「我有一點仔代誌欲佮伊參詳。」和尚講。周百萬佇數房，看彼个和尚滿面莊嚴，就大聲叫講：「我佇遮，請入來!」和尚踏入店內，先向周百萬行一个禮才坐落，講家己是附近某寺院的住持，問講：「貧僧聽人咧傳，講員外為著一時的口福，受人使弄，出錢叫人去掠獅仔山邊大潭的大鱸鰻，毋知影有這層代誌無？」「啊！有是有啦。」周百萬含含糊糊按呢回答。和尚繼續講：「貧僧知影彼隻鰻魚已經修練幾若百年矣，聽講無偌久就會當修成正果，升天成仙。所以，特別來懇求員外，體念上天有好生之德，欲食滋養品，別項猶真濟，毋好去傷害著無辜的生命。」
周百萬心想：「我欲食啥物，就食啥物！是我家己的代誌，佮你有啥代。」毋過，伊猶是笑笑應講：「我知影聖僧的意思，多謝你。」和尚聽著周百萬的回答，以為伊有聽落去，就紲落去講：「若按呢，貧僧千拜託萬拜託，請員外趕緊派人去共阻止，毋但貧僧佇遮感謝你的恩德，彼尾鰻魚也一定會報答你不殺之恩。若是員外為著貪一時的口福，彼尾鱸鰻死了也袂甘心，若想欲報仇，對員外就無好囉。請員外加積陰德，通好保佑囝孫仔平安順序！」周百萬雖然毋甘放棄彼尾鱸鰻，但又驚因果報應，就講：「好啦！我莫刣鱸鰻就是！」講了就請和尚留落來，叫廚子煮一大碗豆芽麵線請伊，和尚看目的達成，也無推辭，大聲說多謝。食飽了後，又閣再三叮嚀，才離開。
第二工，周員外派人去叫田佃莫掠鱸鰻，啥知已經傷慢矣，彼尾鱸鰻已經掠著，載來古亭庄。當一尾肥閣媠的大鱸鰻予人扛來周百萬府上時，周百萬只好將錯就錯，準備欲共大鱸鰻刣掉，燉來食。不料破開鱸鰻腹肚時，發現腹肚內猶有豆芽，才知影和尚是大鱸鰻的化身，但後悔已經袂赴矣，只好共大鱸鰻提去河邊埋掉。
奇怪的是，這件代誌過了，周百萬某煞有身，過了十個月生一个查埔囡仔。中年得子，周百萬歡天喜地，早就共和尚講的因果報應袂記得了了。伊共這个囡仔號做「金龍」。周百萬久年抱子的心願總算完成，伊的貿易生理也愈做愈大，財產愈積愈濟，伊就想欲起一間華麗的厝宅，通好安享晚年。
有一工，一个朋友𤆬一个唐山的地理師來周百萬兜，周百萬好禮款待。隔轉工開始，逐工去台北各地走揣好風水，幾個月後，總算佇這馬的華山園區附近揣著一个「烏鴉孵卵穴」的好地理。地理師：「若佇遐起大厝，保證大富大貴，金杯、銀碗、玉箸一定是有的。」
周百萬就選一个吉日開始佇遐起大厝，真緊，一間富麗堂皇的大樓就起好矣。入厝時，伊備辦豐沛的酒菜，請親情好友。啉酒時，周百萬雙手捀著酒杯，向彼个唐山師父講：「這个地理，逐家攏講好，這攏是先生的功勞，我敬先生一杯。」「哪有！哪有！俗語講「福地福人居」，這是先生福份有到，才會當徛這个好所在。」地理師客氣回敬一杯。「我周某後日，若果然照先生的預言，大富大貴，會當使用金杯、銀碗、玉箸，一定送你一萬碇銀做謝禮！」周百萬足確定講。「好！好！有夠豪爽。」地理師感激講。過了幾天，地理師就轉去唐山。
周百萬大厝起好了後，萬事更加順序，做啥物生理攏大趁。兩、三年後，果然好額甲驚人，田園厝宅四界蓄，厝裡也開始用金杯、銀碗、玉箸，佇台北已經是數一數二的大好額人。毋過伊雖然是遮好額，卻佮以前仝款，真凍霜、真苛頭，講著欲救災濟貧的錢，一點仔都袂出得。
有一工，彼个地理師突然來拜訪。周百萬毋敢怠慢，馬上令人備辦酒菜，但金杯、銀碗、玉箸攏藏起來。雙方坐好，酒斟好，乾杯時，地理師問講：「周先生，我看的地理應該袂䆀，哪會無看著你咧用金杯、銀碗、玉箸？」周百萬聽了，知影伊是欲來討彼一萬碇銀的謝禮，凍霜的心性閣夯起來，心想；「家己這二年外來，雖然有像伊講的真發達，但是一萬碇銀毋是小數目，哪當白白予伊。」周百萬起了賴數的心，講：「這兩、三年來，是有趁寡，但猶未到會當用金杯、銀碗、玉箸的地步。」
「喔！是按呢喔？」地理師知影周百萬想欲賴謝禮，毋過無佮伊點破，只講：「這个風水好是好，但久來嘛愛按照地形地勢隨時間的變化，配合整修才會使，曷無你的財富，恐驚會守袂牢。」「先生，這是按怎講?」周百萬有一點懷疑問。地理師解釋講：「這幾年來，烏鴉穴的烏鴉已經共穴內的鳥仔卵孵出九隻烏鴉囝，恁厝後院的水池，本來干焦有夠二隻烏鴉啉，這馬加九隻，當然無夠。毋過，若會當佇前院挖一个大魚池，一面飼魚，一面水嘛有夠予烏鴉啉。人講水錢水錢，水來錢來，按呢就會當繼續金玉滿堂。」
周百萬無想著這內面有詭計，竟然信以為真，即刻倩工共前院挖出一个大水池，這一下掘，拄好共烏鴉頭挖斷，規个穴就破壞去，成做廢物。周百萬的家運從此停止發展，漸漸衰微落去。
周百萬干焦生周金龍這个囝。周金龍生做眉清目秀，嘛真聰明，但是因為爸母倖了過頭，逐樣攏順伊，未到十六歲，就學會真濟大人的壞習慣。時常瞞著爸母，佮一寡無代誌做的少年人，到艋舺去𨑨迌，酒樓筊間，攏是伊時常出入的所在，開錢若流水。人佇背後就叫「周化龍」，「化」是「花」的意思，供體伊真𠢕開錢。
周金龍便若錢用了，就轉厝偷提，偷提袂著，就騙老爸的田契，提去變賣。起初，周百萬因為財產傷濟、田地傷濟，拍毋見一屑仔也毋知影，對於寶貝囝的惡行，竟然完全毋知。後來聽親情咧講，去清查財產，才發現動產、不動產，予伊毀了袂少，氣甲半小死，無到兩冬，就真正氣甲破病而亡。
周金龍自老爸死了，老母閣無法度管教，就逐天佮遐的不三不四的朋友耍做伙，更加離袂開酒色，所有的船隻、店舖、田地、房屋攏委託別人管理。伊開錢慣勢，一生干焦會曉用碇銀，毋捌用過銅錢，所以佇街仔買一子弓蕉、一粒柑仔，一擲攏是一碇銀。有一改，伊佇街仔散步，看著路邊一个檳榔攤，伊行近提起一粒檳榔，窒入去喙裡，擲予彼个賣檳榔的阿桑一碇銀，越頭就行。阿桑一看緊共喝講：「先生，猶袂找你錢啊。」周金龍聽著，回頭看一下爾爾，一步也無停。阿桑以為伊欲訂貨，彼个碇銀是訂金，轉厝了後就拚性命趕包檳榔，毋過，過幾若工，檳榔攏爛去矣，猶無人來提。後來探聽才知影彼个人就是闊少爺周金龍。自按呢台北就流傳這句俗語：「周百萬用銀免用錢」，供體用錢冗剩、討債的人。
周金龍日夜不停咧花天酒地，財富有出無入，經營的十二隻大船閣予風颱拍沉，加上伊失手拍死一个查某𡢃仔，規工冤魂不散，鬧甲一家人日夜不安，周家的家道就按呢漸漸失勢，最後連彼間華麗的大厝也賣掉，周家就真正沒落囉。
有人講，周金龍就是彼隻大鱸鰻投胎來報冤的，來共周百萬氣死，來共周家的財產舞甲空空，敢講真正是因果報應。
沒有留言:
張貼留言