佇咱台灣人的心目中，民間信仰內底，媽祖的信徒上濟，毋過，「上帝公」的信徒也袂少。全台灣上有名的上帝公廟，會使講是南投縣名間鄉松柏嶺的「受天宮」，建於西元1745年（清朝乾隆時期）。
上帝公，也有人叫做「帝爺公」，伊的全名是「玄天上帝」，也稱做「真武大帝」、「北極玄天上帝」，伊毋但是宋朝航海的守護神，也是明朝鎮邦的保護神，也是屠宰業的祖師爺。
上早講著玄天上帝名號的，是佇〈真武本傳神咒妙經〉，經內講：元始上帝看著周朝紂王荒淫無道，就叫玉皇大帝下令，叫太玄大將提著烏色大旗，頭毛放散、褪赤跤，幫助武王伐紂，成功了後，伊雙跤踏著龜、蛇回到天庭。玉皇大帝封伊為玄武，加封太上紫皇天一真人玄天上帝。
毋過，民間有關玄天上帝的名號，猶有另外一个趣味的傳說。話講元朝末年，朱元璋佮陳友諒大戰，朱元璋落敗，逃到武當山，看著真武廟，想欲覕入去，通好避過陳友諒的追殺。朱元璋共廟門的蜘蛛網拆破後，就覕入去廟內，講嘛奇怪，蜘蛛竟然閣共網黏甲好勢好勢，就是按呢，追兵以為朱元璋無入廟內，朱元璋才平安脫險。因此，朱元璋登基後，即刻下旨，擴建廟宇，重刻神像，賜北極殿的橫匾，封真武大帝為玄天上帝。從此以後，明朝各帝攏奉玄天上帝為護國神明，民間也尊稱伊為北極玄天上帝。
明成祖時，毋但佇北京為玄天上帝起廟，通予官方祭拜，閣佇紫禁城的御花園內，為伊徛一座欽安殿。明世宗嘉靖年間，宮內發生大火，聽講玄天上帝顯靈救火。清朝乾隆年間，宮內閣發生大火，玄天上帝行出乾清宮，徛踮坎仔頂，手比對著火的所在去，火勢馬上停落來，伊徛的所在，聽講有留落兩个跤印。
下面欲講的是佇咱台灣流傳的，有關玄天上帝---上帝公的故事。
真久真久以前，有一个少年人，叫做「李玄晃」，伊真有孝，真佮意讀冊，也真佮意幫贊人，毋過厝裡實在是傷散，只好傳承老爸的職業，刣豬過日子。
有一工，玄晃來到一个庄跤，拄著一个頭毛白蔥蔥的老人，行來共伊拜託講：「阮新婦，產後身體虛弱，伊蹛佇這粒山的山頂，毋知會使請你去共鬥相共，洗一寡產後的衫仔褲無？」玄晃一向愛幫贊人，一聽，就緊起去山頂，果然看著一个婦人人，手抱一个紅嬰仔。伊就替伊捾彼桶齷齪的衫仔褲，綴婦人人來到河邊，開始洗衫。伊洗規晡，但是衫仔褲猶是洗袂清氣。婦人人攑頭看伊，笑笑講：「遮的衫仔褲雖然真垃圾，但是只要手是清氣的，猶是會當共伊洗清氣的。」只看著婦人人共紅嬰仔囥佇樹跤，提起一件垃圾衫，駐水後用手輕輕鑢幾下，閣用水搙褥咧、摵摵咧，彼領衫就佮婦人人身軀穿的衫仝款白鑠鑠。婦人人就講：「衫仔褲垃圾毋是重點，清氣的手才是重點，你逐工刣豬，二肢手是齷齪的，按呢閣較按怎洗嘛洗袂清氣。」
「烏白講，我只要較用力撋咧，一定會使洗清氣。」玄晃予婦人人激著，就共垃圾衫提咧，駐踮水底，用手拚性命撋，講嘛奇怪，這一下撋，衫毋但無變清氣，煞愈垃圾。伊越頭一看，彼个婦人人已經無看，才知影是慈悲的「觀世音普薩」顯靈，欲來渡伊，叫伊放下屠刀。
玄晃自按呢就綴一个食菜人欲去南海參拜觀世音普薩。接近南海時，無船渡河，食菜人佇遐躊躇，玄晃拜佛心切，毋管生死就勇敢跳入河裡，拚命泅過河。欲入去觀音道場時，因為伊以往殺生傷濟，六根無淨，無法度入去。伊共腹肚破開，共腹內的腸仔佮胃搝出來，擲落去河裡，洗清罪惡，才順利入去。拜了觀音以後，伊就決定放下屠刀，堅心欲修行。
玄晃聽說武當山是一个靈山，是修練的好所在，伊就盤山過領，來到武當山修行。一目𥍉，四十二冬過去了，伊總算修練完成，會當飛天成仙，成做玄天上帝，民間尊稱「上帝公」。
武當山有一个水火洞，裡面蹛著一隻蛇怪佮一隻龜怪。上帝公知影彼是伊當初去見觀世音菩薩時，自己破開腹肚，搝出來的腸仔佮胃，腸仔變成蛇妖，胃化做龜怪，佇遐危害百姓有一段時間矣。伊決心欲除掉這二隻妖怪，就去向醫神保生大帝借七星寶劍，通鎮壓妖怪。保生大帝看是前輩來借寶劍，歹勢推辭，就答應借伊，但是講好收妖了後，一定愛還。上帝公當面應承講，一定照辦。保生大帝閣對上帝公講：「此劍乃是我的法寶，劍鞘留我遮。圓滿收妖後，只要共劍向空中擲去，伊就自然會飛轉來劍鞘，無需要閣勞動尊駕，親自來還劍。」上帝公一喙答應，並以伊手下的三十六神將借予保生大帝做抵押。
上帝公咧收服龜、蛇兩怪時，兩怪沿路逃走，覕入去石榴林裡，上帝公也進入石榴林，無疑悟，伊鬖掖掖的頭毛煞去予石榴的刺勾著，龜、蛇兩怪借機漩走。上帝公因此怨恨石榴，這就是咱這馬攏無人用石榴祭拜上帝公的原由。
上帝公最後猶是收服了龜、蛇兩怪，毋過，驚兩怪袂受控制，伊就褪赤跤重重踏佇龜、蛇兩怪身上，手閣絚絚攑著寶劍來鎮壓。因為劍無法度還保生大帝，當然就無劍鞘。這也是咱這馬看著的上帝公，手攑的寶劍攏無劍鞘的原因。另外，保生大帝因為無收回寶劍，就留下做抵押的三十六神將，陪伊佇保生大帝廟。
咱攏知影台灣的媽祖，有分大媽祖、二媽祖、三媽祖，上帝公也有分「大上帝」、「二上帝」佮「三上帝」。聽講是上帝公一元化三靈所來，但一般攏將稱做三兄弟。大上帝是上帝公十八歲時的文身像，負責風水地理天文八卦；二上帝是上帝公修真三十六冬後的武駕像，負責斬妖除魔降伏邪道；三上帝是上帝公修練四十二冬後的圓道文武像，專責普渡眾生。咱這馬看著的上帝公金身，大上帝無喙鬚，二上帝勇猛，三上帝無攑劍，就是這个緣故。
沒有留言:
張貼留言