台灣有一句俗語，講：「人咧做，天咧看」，是咧提醒咱的一言一行、一舉一動，上天攏看在眼裡，惡有惡報，善有善報，毋通糝做。這馬咱就來講「人咧做天咧看」的故事。
真久真久以前，台灣某一个庄跤，蹛有兩个兄弟，阿兄叫做「陳安仁」，真不孝，攏毋聽爸母的話，貧惰，逐工浪流連。小弟叫做「陳安慈」，卻會曉孝順爸母，閣骨力。
庄裡的人攏感覺奇怪，仝父母生的，兩个兄弟的性地哪會差遮濟？爸母也知影，煩惱安仁的未來，時常求神拜佛，保庇伊悔過。可惜安仁毋但性地無改，顛倒一工比一工䆀。爸母聽人講娶某了心性會較定，就想講共伊娶一个新婦，無著確性地真正會較定，就安排替伊娶親。
新婚幾個月內，家庭攏平安無事，父母才拄欲放心，哪知幾個月後，彼个新婦煞佮安仁膏摻落去，毋但無愛做工課，閣時常忤逆爸母。翁仔某兩人逐工干焦知影遊山玩水。爸母看看死心，想講安仁袂靠咧，看起來干焦會當靠小弟安慈矣。父母就替安慈揣一个單純的查某囡仔，予結婚。第二新婦佮安慈仝款，骨力，閣知影奉待爸母，爸母看在眼裡，才較安慰。
後來，老爸破病，規工倒踮眠床，老母佮安慈翁仔某，逐工輪流照顧，請醫生、拆藥、煎藥。毋過安仁翁仔某，卻猶是規工𨑨迌，無欲插老爸的病情。最後，老爸的病終於無救，命在旦夕，安慈叫某去通知阿兄，安仁才心不甘情不願𤆬著某來看老爸。
老爸對兩个囝佮新婦講：「我的病恐驚袂好矣，我無力講遺囑，這是我平時寫的，希望恁兄弟仝心，照按呢做！」老爸講完，就過身矣，老母佮安慈翁仔某攏哭甲真傷心，可是安仁翁仔某卻無啥動靜，敢若袂悲傷。過了一陣仔，逐家共遺囑褫開看，內面是按呢寫的：「財產兄弟平分，安仁翁仔某愛骨力扞家，安慈愛照顧老母，一定愛照辦！」
老爸出山了，安仁著急欲分財產，講：「遺書雖然是按呢寫，但是我是阿兄，本來就愛分較濟的財產、田地佮房屋。」安仁就共全部的金銀珠寶、田地佮大部份的房屋攏分予家己，干焦留一間舊厝佮一枝斧頭予安慈，而且對安慈講：「依照遺囑，小弟你愛奉養阿母，阿母就交予你照顧！」老母聽了，悲傷大哭，安慈安慰伊講：「阿母！無錢無要緊，我會認真拍拚來趁錢，用家己的血汗趁來的錢，較有意義。」
厝裡的財產予阿兄搶了了，閣愛飼老母，安慈的生活過了真艱苦，伊逐工去山頂剉柴，擔去城內賣，共賣柴的錢，提來生活。某除了做家事、飼雞、鴨、鵝外，也替人洗衫、紩衫、補衫。翁仔某仝心協力，骨力趁錢，勉強維持一个家。
有一工，安慈佇深山內剉柴，看著頭前來三个妖怪，驚一趒，緊起去一欉大樹覕起來，規身軀咇咇掣，偷偷仔向下面看。彼三个妖怪來到樹跤，其中一个紅鬼，對路邊的一粒大石頭喝講：「石頭！石頭！開門。」講嘛奇怪，彼粒石頭竟然家己必開，出現一个大山洞，青鬼佮烏鬼，共毋知對佗位搬來的一大堆黃金，搬入去囥踮山洞內，過了一陣仔，三个鬼就離開山洞。
安慈等三个鬼行遠矣，隨對樹頂落來，學紅鬼講：「石頭！石頭！開門。」果然石頭必開，伊入去山洞一看，黃金窒甲規內底，壁頂閣貼一張紙，寫講：「奉山神的命令，遮的黃金是欲予骨力閣有孝的人。」安慈就佇彼張紙頂空白的所在寫講：「我提一屑仔來孝敬老母，多謝，陳安慈敬筆。」然後，伊就共黃金縛佇擔柴的擔仔，擔轉去。
轉到厝裡，伊為著欲知影到底伊提偌濟黃金轉來，就去共阿兄安仁借秤仔，阿仁問伊借秤的原因，安慈人條直，將佇山洞發現黃金的經過，一五一十講予安仁聽。安仁聽了，真欣羨。第二工就帶一跤上大跤的布袋，來到安慈所講的大石頭。伊照安慈的話，講：「石頭！石頭！開門。」果然石頭必開，伊真高興，緊入去山洞內，拚命共黃金裝入去布袋，當咧拚命裝的時，彼三个妖怪突然轉來，安仁緊揣一个所在覕起來。妖怪一入洞內就講：「奇怪，洞門開開，閣有人味，哪無看著人影？」就四界揣，最後予揣著。妖怪真生氣，講：「莫怪有人味，果然有賊仔來偷黃金，可惡的小囝，留你佇社會有啥路用？」那講，那提大石頭共安仁摃死。
經過幾工，安仁攏無轉來，某誠煩惱，就去揣安慈，叫安慈𤆬伊去山頂揣安仁。安慈佮阿嫂來到山頂的大石頭，但是已經看無石頭佮山洞，干焦看著安仁的屍體，倒佇樹跤。伊就佮阿嫂共安仁的屍體扛轉厝埋。安仁因為逐工浪流連，愛食毋討趁，這時已經共老爸留下來的財產，用欲了矣，阿嫂只好搬去佮安慈蹛。
有一工，有一个親情請客，阿母身體無爽快，叫二新婦去。二新婦到親情厝裡，滿面愁容，攏無動著箸。親情問：「你是按怎無愛食？」二新婦講：「阿母身體無拄好，佇厝袂當食著遮好食的菜，我佇遮家己食遮好，對袂起阿母。」親情惜伊有孝，就應講：「無要緊，你做你食！我會加攢一份予你紮轉去予恁阿母。」聽著親情按呢講，二新婦才敢開始食，欲轉的時，親情真正包予伊一大包的飯菜。
二新婦捾著彼大包飯菜，行佇路裡無注意，踢著一粒石頭，煞跋倒，規包的飯菜攏落落去垃圾的水溝裡，伊緊共抾抾起來，提去另外一條清氣的溪裡洗洗咧，才捾轉去。轉到厝，緊共飯菜熥熥咧，捀予佇頭前埕歇睏的阿母食，伊就入去後面洗衫。忽然間一陣雷公爍爁，伊看袂赴共阿母牽入去厝裡，就緊傱出去門口埕的樟仔邊，跪落去喝講：「雷公伯仔！你毋當拍著阮阿母，你若欲拍，就拍我。」只聽著「擗擗」連紲幾聲，雷公竟然共樟仔破做兩橛，二新婦毋但無予雷公拍死，閣看著樟仔對必開的所在，開始噴出一堆黃金。大新婦知影了後，真欣羨。
有一工，另外一个親情嘛欲請人客，也來請阿母。大新婦知影，就共阿母講，路途遮遠，阿母去若無方便，伊會使替伊去，阿母講好。大新婦來到親情厝裡，故意無愛食，親情問伊原因，伊就照進前二新婦的話回，親情看伊有孝，嘛特別攢一大包飯菜予伊紮轉去。伊佇路裡，嘛假無注意共飯菜落落去水溝裡，閣抾起來，提去溪裡洗清氣。轉到厝，猶袂熥咧，就趕緊捀去予阿母食。這時果然出現一陣雷公爍爁，伊就馬上走去樟仔跤，跪落去講：「雷公伯仔！你毋通拍阮阿母，你若欲拍，就拍我。」紲落來，仝款「擗擗」連紲幾聲，但是閃電煞真正共伊拍死。
不孝的安仁佮新婦的下場，遮爾悲哀，拄佮咱台灣的一句俗語：「人咧做，天咧看。」講的對同對同。安慈翁仔某靠著遐的黃金，兼咧認真拍拚，最後變成彼个所在上好額的人，毋過猶是非常有孝老母。
沒有留言:
張貼留言