二百年前，台南府城赤崁城的百姓，大部份是對中國福建移民過來的，其中的五大姓：施、陳、傅、蔡、葉，人口上濟，各姓家己結群。台南就按呢時常有械鬥，有時陣是這五姓互相看毋上目，起衝突，相拍；有時陣是故意欺負綴無陣的人，找空縫共人修理，舞甲地方攏袂安寧。
有一工，一群姓施的少年人，一个人擔一擔柴，沿著台南府城，大聲叫賣：「賣柴啊！」「欲買柴無？」佇大街小巷大搖大擺、橫衝直挵，那喝那耍，誠奢颺。彼時，路上拄好有一个中年人，一時袂赴閃避，煞去予挵倒，跋一下倒頭栽。遐的少年人，橫霸霸，毋但無去扶伊起來會歹勢，反倒轉開喙就罵：「小囝，你是無生目睭喔，敢擋恁爸的路，猶毋趕緊會失禮。」
彼个中年人，予挵一下頭眩目暗，起來，眼睛挼挼咧，掠看一下。「看啥物，毋捌恁爸是無！阮是施姓龍虎隊啦！」彼个挵人的成員，那講那伸出正手，雄雄就對中年人的胸坎舂落去。「恁娘咧，挵人閣遮歹？咱來衙門，予官府評評理！」中年人真受氣講。「你提官府來壓阮？恁爸就是大人啦！」彼个拍人的那講，那向伊的同伴使一个目色，喝：「予這个小囝好看！」其他的成員聽了，就全部揤倚去，你一拳、我一跤，共伊拍甲遍體鱗傷，哀爸叫母，遐的惡霸才心滿意足喝停。「看你以後行路，閣敢無生目睭無？」欲走矣，閣唱聲講。
無偌久，施姓龍虎隊其中一个少年煞予一个五十幾歲的老人挵甲吭跤翹，伊起來，手拌拌咧，一看，是一个賣鹽的老伙仔，就起呸面，大聲共罵：「死老猴，青盲是毋？猶毋緊會失禮，共恁爸的柴抾起來！」「少年仔，火氣袂遐爾大，逐家攏是無小心，才會相挵，誰嘛袂使怪誰？我的鹽擔嘛予你挵反過，逐家共挵倒的物件抾抾咧就好啊，何必發遮大的性地！」彼个賣鹽的老人好喙講。「你講啥？死老猴，你是活了咧𤺪是毋，兄弟啊，予伊好看。」施姓龍虎隊聽了，逐个人就扁擔捎咧，相真真對賣鹽的老人撼落去。
徛佇路邊看鬧熱的人，攏替這个賣鹽的老人流凊汗，想講若無予拍成肉醬，嘛會予摃甲烏青激血、手折跤斷。若知，代誌的發展卻毋是按呢。遐的扁擔拍佇老人身上，就若像拍著石頭仝款，毋但老人無哀，拍人的雙手煞疼搐搐。遐的惡霸，看毋是勢，扁擔抨咧，規氣做伙圍倚去，拳頭拇提起來就揍、跤攑起來就踢。老人無回手，也無閃避，予拍甲爽快。惡霸起跤動手一陣之後，毋但無共老人拍倒，反倒轉家己的手、跤攏舞甲破空流血，最後無體力矣，就不約而同停落來，你看我、我看你，無奈笑講：「哈哈！拍有夠矣！莫閣拍矣。」
毋過，老人這時煞放聲大笑，笑聲響亮閣有力，聽起來真鑿耳。突然間，老人快速出手，掠著一个惡霸的手股頭，大聲講：「拍啊！閣拍啊！共我拍死啊！若無，我袂放恁煞。」那講，手那用力，彼个惡霸即時疼甲凊汗㴙㴙流，擋袂牢，跪落去求饒講：「伯仔，後擺毋敢矣！請饒命！」圍觀的人看著遐的惡霸，拄才遐爾奢颺，若像一頭猛虎，這馬卻若像一隻乖貓仔，忍袂牢哈哈大笑，拍噗仔叫好。
老人聽了共手小可放冗，彼个惡霸才較輕鬆，毋過老人又閣踮伊的肩舺頭頭輕輕揤一下，講：「你共我倒落去！莫閣踮遮卸世卸眾！」彼个惡霸即時面色轉白，規身軀掣咧掣咧，目睭仁轉白，就按呢硬迸迸倒落去塗跤。其他的惡霸，目睭金金看同伴受苦，卻無人敢去解救。老人指著倒佇塗跤的惡霸，對著其他的惡霸講：「恁攏有看著，以後若閣欺負人，予我知影，就會共伊仝款，我一个都袂饒赦！」講了，老人擔起鹽擔，繼續去賣。遐的惡霸個個面色反紅，等老人行到街尾時，才敢共同伴扛起來，像拍敗的狗仝款，尾溜挾咧，漩轉去。
這个賣鹽的老人毋是別人，就是頂港有名聲，下港有出名的賣鹽順仔。
咱閣來講，賣鹽順仔一路沿街叫賣：「賣鹽啊！有人欲買鹽無？」這時，伊來到姓傅的地盤，平時攏有一群十幾歲的囡仔佇遮𨑨迌、佇遮耍，會使講是台南府城上孽潲的。
「哈哈！看彼个老人的尻川！有夠好笑！」一个姓傅的囡仔，比著賣鹽順仔彼領破褲，有影是破甲尻川空攏欲看著。「哈哈！誠好笑！」彼个囡仔一直綴佇賣鹽順仔的後面，指指揬揬，但是賣鹽順仔假影無聽著，猶是一路叫賣。
「若摸著這个老人的尻川，一定真好耍，恁敢無？」其中一個𤆬頭的囡仔講。毋過，無一个囡仔敢去做。「攏是一群無膽的腳數，我做予恁看。」彼个講話的囡仔就放輕跤步，恬恬仔行到順仔的後壁，真的出手去摸順仔的尻川，閣將正手的中指插入去順仔的尻川空，目睭掠遐的同伴看，喙笑目笑。
突然間，「哎唷！疼死我！哇哇！」彼个囡仔的中指去予順仔的尻川空挾著，若像予夾仔大力挾著，疼甲大聲吼，毋過就是拔袂出來。「哇哇哇！伯仔，下擺毋敢矣，你饒赦我！」
但是順仔親像無聽著，繼續沿路叫賣，彼个孽潲的囡仔只好一直綴踮伊的尻川後，沿路行沿路吼，最後，囡的老母出面，向順仔會失禮，順仔才共教示講：「以後閣敢孽潲無？」那講那共尻川空放冗放伊走。
離開姓傅的地盤後，順仔又一路叫賣，行入姓蔡的保護區。姓蔡的人為著防止別姓的攪擾，平時遮攏派有壯丁咧巡邏，閣訓練一批狼狗，協助看守。
順仔一入到姓蔡的地盤，彼群狼狗就馬上共伊圍咧，兇狂吠。其中一隻較雄，出喙就共順仔的跤胴咬咧毋放，順仔佇忍無可忍之下，鹽擔囥咧，一拳就將彼隻狼狗拍死，閣連紲拍死二隻傱過來欲替同伴報仇的狼狗。其他的狼狗看著這種情形，攏毋敢閣振動，干焦硞硞吠，若像咧等主人來。這時，姓蔡的壯丁已經趕來，一看著家己的狼狗死三隻，性地夯起來，就共順仔團團圍咧，大聲喝拍。順仔連台南府城上兇惡的施姓龍虎大隊攏毋驚，這个小小的蔡姓自衛隊，哪有看在伊的眼內。無一時仔的工夫，蔡姓自衛隊就東倒西歪，個個倒佇塗跤哼哼叫。
自彼陣開始，賣鹽順仔的大名就傳遍規台灣，成做台灣的傳奇人物，毋管伊行到佗位，遐的歹人攏驚甲破膽，覕牢牢毋敢出來。
沒有留言:
張貼留言