一百外年前，臺中縣石岡鄉有一个姓賴的大好額人，伊好額甲石岡街頂，有一半的厝攏伊的，逐家攏叫伊「賴半街」。
賴半街原名叫做「賴順吉」，自細漢老爸就過身，老母閣青盲，厝裡無啥財產，靠替阿全舍放牛，兼抾牛屎為生，庄仔人攏笑伊叫「牛屎吉」。
有一工，牛屎吉抾牛屎經過土地公廟，看著土地公予人挕捒，擲佇外口，就共抾起來，小可整理一下，閣重安祀。土地公知影牛屎吉是孝子，但是陽壽傷短，就化身算命仙指點伊去山頂，揣南斗佮北斗星君求壽。
牛屎吉揣著南北斗星君，但是毋是為家己求壽，卻是求星君醫治老母的目睭。星君指點牛屎吉去鐵鉆山的劍井，挈泉水替阿母洗目睭。牛屎吉經過千辛萬苦挈著泉水，卻也意外抾著一个聚寶盆。伊就靠著這个聚寶盆開始發達起來，後來好額甲共石岡街一半的厝攏買落來，人也開始改叫伊「賴半街---半街舍」。賴半街變好額，人也變了較驕傲，伊猶是遐勤儉，毋過有當時仔儉過頭，煞有寡自私、凍霜。
有一天，石岡落大雨，一个庄跤來的羊販，趕幾百隻羊仔，看雨落來，就緊共羊群趕去石岡街的砛簷跤覕雨。賴半街看著，氣怫怫走過來，講：「緊共羊仔趕走，莫蹧躂著我的厝！」「先生，羊兒是袂使淋雨的，拜託你予我覕這場雨，雨停我馬上就走。」羊販面頭結結懇求。
「袂使！這馬隨走，若無，我共你的羊攏摃摃死。」羊販無辦法，只好共羊群趕到另一間厝的砛簷跤，賴半街又過來干涉，講：「這个所在也袂使留，遮間厝嘛是我的。」一連換了幾若間，攏仝款。羊販無法度，只好透雨趕羊群離開。
七冬後的某一工，賴半街去庄跤收田租，欲轉厝的半路，天已經暗矣，閣突然落雨。伊看附近無庄頭抑無旅社通歇睏，行規工的路，忝閣枵，心內誠著急。伊攑頭看著頭前無偌遠的所在，有閃爍的燈光，心內叫佳哉，趕緊走過去。一看，原來是一間破草厝仔，伊想講有厝覕較贏無，就大聲叫：「內面有人無?」等一時仔，草門拍開，一个衣衫襤褸的中年人行出來，問講：「先生，有啥貴事？」「天色暗矣，我路站無拄好，揣無所在通蹛，毋知會當借貴府歇一暗無？」賴半街溫和講。「若無棄嫌破草厝仔，就留落來委屈一暗！」彼个中年男子那講，那共賴半街𤆬入去房間。
賴半街坐落來，中年人問講：「先生一路風塵僕僕，大概猶袂食暗頓呼？我來去攢一寡物件予你食。」賴半街做夢也無想著這家主人遮爾大方，心內非常感激。無偌久，中年人捀出一大碗的番薯糜，飯粒是少甲有夠苦憐。這種食物，佇平時，賴半街連看都袂去看，但是這馬腹肚當枵，食起來煞若山珍海味。
食了，賴半街非常誠懇對中年人答謝，講：「萍水相逢，予你遮爾熱情招待，實在感激不盡。日後若有機會，請來石岡𨑨迌，我一定會盡地主之誼，好禮款待，我的名是…」話猶袂講煞，中年人就搶先講：「先生，啥人毋知你是石岡鄉的大財主，賴半街。」
「你哪會知影？」賴半街感覺奇怪問。「先生真是貴人多忘事。」中年人笑一下，繼續講：「敢彩你猶會記得！七年前，有一工落大雨，有一个人趕著一群羊仔，佇貴府的砛簷跤覕雨，彼个羊販就是我。因為彼改羊仔予雨淋著，攏病死。我的本錢賠了了，厝也變賣，家境一時散落來，只好蹛踮這間破草厝仔。這馬才會無法度好好招待，請多多原諒。」
賴半街聽了，見笑甲欲死，無想著遮爾熱心招待家己的中年人，竟然是七年前家己不准伊踮砛簷跤覕雨，煞變成傾家蕩產的羊販。伊愣愣坐佇遐，半工講袂出話，最後輾落兩逝見笑的目屎。伊搦著羊販的手講：「你真偉大！毋但饒恕了我的過錯，而且遮爾熱情招待我，佮你比起來，我實在是太自私囉！從今以後，我一定欲改掉自私自利的個性，算是我對你的報答。」
賴半街轉到厝裡，即刻叫人送五千兩銀去予羊販，一來報答伊熱情招待的恩德，二來賠償伊七年前的損失。伊也從此改掉伊過去彼種驕傲、自私、自利的個性，變成一个有禮貌、慷慨、大方的人。凡是講著欲救貧、做公益，伊攏輸人毋輸陣，得著庄仔人真大的尊敬。
