台灣有一句孽譎仔話，講：「林道乾做銃---彈家己」，是咧提醒人做代誌時愛小心，毋通顛倒去傷著家己。這句孽譎仔話佮台灣海賊王林道乾有關，咱這馬就來講伊的故事。
話講四百外年前，也就是明朝末年的時，中國的東南沿海出現了海賊，搶奪海上的商船，嘛搶奪沿海的老百姓，甚至刣人。其中，上有名的海賊頭叫做「林道乾」。
話講四百外年前，也就是明朝末年的時，中國的東南沿海出現了海賊，搶奪海上的商船，嘛搶奪沿海的老百姓，甚至刣人。其中，上有名的海賊頭叫做「林道乾」。
林道乾，廣東潮州人。伊少年時，曾經做過縣吏，後來步入邪途做海賊。伊佇台灣海峽佮福建、浙江沿海，帶領著無數的兇神惡煞，神出鬼沒，偷襲海上的船隻，搶奪船頂的貨物錢財。浙江，福建一帶的船家佮生理人叫苦連天，只好請官兵征討。
朝廷派閩浙都督俞大猷率領水陸兩軍進攻林道乾，大破海賊軍。林道乾一路逃走，走對台灣來，覕踮打狗，也就是這馬的高雄。伊以打狗為大本營，繼續過海賊的生活，而且共中國帶來的十八籃金仔，偷偷仔埋佇打狗柴山內的一个山洞。
有一工，林道乾老爸過身。伊特別倩一个地理師來替伊揣一个埋老爸的好風水。伊綴地理師盤山過嶺四界去揣，揣規工，總算佇佳里一粒細粒山頂揣著一个真龍正穴。地理師對林道乾講：「這个風水真好！你看，山靈起龍運，龍喙當開，若欲飛上天，這是一个生龍口，埋了後，代代囝孫會做皇帝。」「敢真的？先生！」道乾驚奇問。「當然，哪會是假的。」地理師正手撚著鬍鬚，誠有自信應。「若是真的，先生就是開國功臣，林家代代世世也毋敢袂記你的大恩。」林道乾磕頭說多謝。地理師閣替林道乾選一个出葬的吉日，並指點伊下葬的方法，林道乾攏一一照做。
幾個月後，林道乾到山內拍獵，忽然看著一个頭鬃白蔥蔥、紅膏赤蠘的神仙，送伊三枝神箭，頂懸攏刻有林道乾三字，講：「欲做皇帝有辦法，第一步、逐工欲睏的時，喙裡含一百粒的白米，袂使吞落去，連紲做足足一百工。第二步，一百工後的隔轉工透早，恁厝的錦雞佇咧啼叫的時，向西北方連紲射出三枝神箭，按呢皇帝就會予你射死，你就會當接替伊的帝位。」林道乾接過神箭，歡天喜地走轉來打狗大本營，叫小妹金蓮來問：「小妹，咱兜的錦雞好無？」「好哇！欲創啥？」小妹看阿兄突然咧關心錦雞，感覺小可奇怪，就按呢倒問。「哈哈！咱林家的風水欲轉運囉。」道乾講了，就共神仙送伊神箭，佮按怎做就會當做皇帝的辦法講予金蓮聽，講甲歡頭喜面。金蓮聽著阿兄將來會當做皇帝，家己毋就是皇姑囉！也歡喜甲喙笑目笑，對錦雞就更加小心照顧。
講著這隻錦雞，也真有來頭，自從盤古開天以來，伊就蹛佇打狗的柴山內，逐工透早伊攏會擛翼啼叫，伊的叫聲附近三十里攏聽會著，民間的雞攏愛等伊叫三聲了後，才敢啼叫，伊若無開喙，民間的雞就毋敢出聲。伊逐工透早啼叫的時間攏真準，所以人攏叫伊「指引雞」，共看做神雞，無人敢共傷害，其實也掠袂著伊。後來道乾佇山內拍獵，毋知按怎，竟然予伊射著翼股，只好共伊帶轉厝，交予金蓮照顧。
林道乾含米一百工彼暗，伊就交代小妹：「明仔載透早就愛射箭矣，小妹！愛注意錦雞，一啼，就隨叫我，毋通去耽誤著！」「阿兄放心，絕對袂袂記！」金蓮喙裡雖然按呢應，心內猶咧擔心，驚錦雞睏過頭，誤著阿兄的大事，所以，伊規暝攏毋敢睏，守佇錦雞的邊仔，閣輕輕撫伊的身軀。誰知錦雞予伊按呢一下攪擾，煞顛倒驚醒起來，掠準天光矣，就喔、喔、喔啼叫起來。一心想欲做皇帝的林道乾，彼暗也攏毋敢睏，聽著錦雞一啼，無等小妹來通知，就衝衝碰碰提了神箭，徛踮秀峰山頂，共弓弦搝甲滿滿，颼、颼、颼，連紲向西北方射出三箭，逐箭攏射到雲裡。
道乾箭射完了後，想講老爸的墓地風水若著，一定會以共皇帝射死。伊感覺真滿意，就準備欲調遣部隊，去攻打朝庭，突然間看著送伊神箭的神仙，氣怫怫傱來，怨嘆講：「你哪會遮衝碰？皇帝猶未臨朝，你就共射！可惜三枝神箭攏射佇伊的龍椅。遐的箭頂懸攏有刻『林道乾』三字，這馬欽天監算出你佇台灣，無偌久，就會派大軍來掠你。你趕緊準備逃亡！」講完人就無去矣。「天矣！」林道乾大叫一聲，暈倒在地。林道乾清醒起來，知影家己的兵力猶無法度抵抗朝庭的大軍，就命令部下，共重要的物件搬入去船內，準備欲逃亡海外，暫避風頭。但伊驚軍心有變，就換了便服四界去明查暗訪。
這一工，林道乾行到「哨船頭」的所在，張著一个道士。這个道士一看著伊，就「哎呀！」一聲叫出來。「你是按怎？大驚小怪？」林道乾看道士愣佇遐，忍袂牢問伊。「先生的面相真好，有帝王之相，只可惜……」講到最後三字就無閣講落。「可惜啥物？」道乾看伊講話蹊蹺，趕緊追問。「可惜祖上無積德，難成大業。看你青筋暴露，印堂發暗，近日恐有劫數。」「有啥物辦法會當解決？」林道乾著急咧問。「共蔭你做皇帝的彼个風水拍掉，就會平安無事。」「先生貴姓？佇佗位發財？」道乾躊躇一時仔問講。「不才吳半仙，專門研究風水地理，而且精通麻衣相術。」道士趁機會歕一下雞胿講。
「先生既然精通風水，毋知會當請生生到寒舍看先人的風水無？」吳半仙應好。道乾就叫部下攢一隻馬車，載伊到老爸的墳墓。吳半仙斟酌看彼个山勢，然後坐踮墓碑頭前，閣前後、左右相一回，才講：「無錯！這个風水應該出皇帝，可惜無積德，先生福份閣無夠，配袂起龍袍加身，所以山靈徙振動，真穴家已走去矣。」
「毋過，阮阿公、阿爸攏有咧施捨、行善，我家己也時常劫富助貧，按怎講無德行？」林道乾好親像誠委屈，諍咧講。「先生的先人雖然平時歡喜行善，你雖然也劫富助貧，但劫富助貧，總是無本錢的生理，若提人的拳頭舂石獅，有傷天道，難免共陰德抵消。」吳半仙笑笑仔講。「一定要拍掉？」林道乾懊惱問。「當然，墓內的人龍袍穿一半，帝非帝，民非民，陰魂不安，囝孫也會有橫禍。」
林道乾無限感慨，只好叫人共墓掘開，一看，伊老爸的骨骸真正穿半橛的龍袍，感覺真可惜。伊叫人共骨骸用紅綢包予好，載回大本營。
這時，船隻己經聚集好矣，軍火、糧食也攏安頓好勢，干焦十八籃的黃金誠歹扭搦，帶去無方便，留落來閣無地下，若共埋佇塗跤，聽講年久月深，財神會走去，金銀就會失蹤，必需要佮一个親人埋做伙，才守會牢。
林道乾當咧頭殼疼的時，巡邏的部下看著官兵的戰船，滿海滿洋向台灣駛來，馬上走去報告林道乾。林道乾一看，官兵的氣勢驚人，想講寡不敵眾，即刻下令逃亡。林道乾叫金蓮做伙逃亡，可是金蓮自責攏是伊去誤著阿兄射箭的時刻，才害伊無法度成就大業，對不起阿兄，毋肯綴阿兄逃亡。當林道乾欲動身的時，金蓮突然間拔出林道乾腰身的寶劍自殺，林道乾回過神時，金蓮已經倒佇塗跤，血流規四界，一命嗚呼哀哉。
林道乾𢯾著金蓮的屍體大哭一場，當咧落難，亦無法度辦啥物後事，只好凊彩共伊的屍體佮十八籃的黃金埋做伙，暗暗祈禱：「小妹！為兄欲走了，將來是毋是會當完成大業，攏是無法度按算的。十八籃金子佮你做伙，以後你若有看著佮阿兄仝款遮爾有本領的人，你就共遮的黃金送伊！」
金蓮的查某𡢃杏花，看著小姐自殺，一陣心酸，放聲大哭，也綴咧自殺。彼隻錦雞，看著這種情形，也四界亂傱，林道乾看著，想起到手的帝位予伊斷送，一時氣憤，出劍共伊㧣死。
這時林道乾已經予明軍團團包圍，佇走頭無路下，雙跤跪地向天禱告，求上天保佑了後，向柴山方向大喝一聲，同時劍攑懸懸向西爿刜去，突然間，柴山佮旗后山中央轟隆一聲，破開一逝空縫，海水湧入來，變成一个港口，就是這馬的高雄港。林道乾就速速坐船突圍而去，彼時是明世宗嘉靖四十二年（西元1563年）。林道乾走了，金蓮的屍體佮十八籃的黃金，究竟埋佇佗位，誰也毋知影，也漸漸予人袂記。
有一工，一个剉柴夫佇柴山頂剉柴，日頭欲落山的時，伊擔著柴擔，一步步落山來，毋過行真久猶是行袂到山跤，轉來轉去，籠轉回原來的所在。伊生狂咧揣轉去的路，揣甲滿身大汗，猶是揣無。這時日頭已經落山，四界開始罩暗，伊只好囥落柴擔，坐落來歇睏，心內是驚惶甲踅踅唸：「拄著鬼諾！逐工行的路哪會揣袂著。」
話袂講煞，忽然間微風吹來一陣特殊的芳氣，伊心頭一陣迷亂，越頭一看，看著一个查某囡仔，搖著腰身，向伊這爿慢慢行來。彼个查某囡仔面貌生做真媠，身材苗條，穿一軀玫瑰紅的衫仔褲，風情萬種。剉柴夫一時愣去，暗想：「佇這一个荒郊野外，哪會有遮爾媠的查某囡仔，敢是鬼！」想到遮，規身軀起雞母皮，拍一个交懍恂。
彼个查某囡仔看剉柴夫規人愣愣徛佇遐，驚惶袂定，就慢慢仔行到伊身邊，溫馴講：「先生，天暗矣，轉厝的路歹行，去阮厝蹛一暗，明仔載才轉去。」「哪好勢去共恁攪擾？」剉柴夫雖然按呢應，毋過，可能是烏暗揣無路驚拄著魔神的，竟然柴擔擔咧，就綴伊轉去。
彼个查某囡仔𤆬剉柴夫轉到厝，就吩咐查某𡢃仔杏花，招待伊洗身軀，身軀洗好，杏花𤆬伊入大廳歇睏，家己入灶跤備辦酒菜。自細漢就散赤的剉柴夫，看著大廳陳列的飾物攏是金銀珠寶，佇燦爛的燈火下，金光閃閃，有夠媠。伊若像劉姥姥入去大觀園仝款，看甲目花頭眩。彼个查某囡仔一一為伊紹介講；「這粒是璇石，彼粒是夜明珠，彼塊是如意，這箱是金仔。」「喔！喔！‥．．．」剉柴夫干焦會曉槌槌頕頭，因為伊所看著的一切，攏是以前毋捌看過，毋捌聽過。
這時杏花已經共酒菜準備好了，彼个查某囡仔就親切牽著剉柴夫的手，做伙入座。好禮佮伊敬酒，閣叫杏花跳舞唱歌助興。剉柴夫面對著美酒、美人、美餚，精神特別好，就大啉特啉，啉甲茫茫渺渺。最後彼个查某囡仔佮杏花共伊扶入去繡房，替伊換好睏衫，等杏花出去了後，伊家己也換了睏衫，佮伊睏做伙，剉柴夫茫茫之中，感覺一陣陣滿足，就快快樂樂睏去。
第二工透早，剉柴夫醒來，看著家己倒佇墓仔埔，哪有啥物大樓、美人，干焦看著身邊有幾錠黃金，就緊共抾起來，柴擔擔咧緊轉去。後來聽一寡人咧會，講伊拄著的可能是林道乾的小妹金蓮。伊事後三番二次閣轉去揣，但就是揣袂著。
過無偌久，有一个小姑娘，也拄著剉柴夫仝款的遭遇。這个姑娘才十四歲，天真無邪，逐工去山頂看牛，踮草埔跳來跳去。金蓮看伊天真可愛，就現身佮伊做朋友，請伊到厝裡耍，又閣叫伊替家己梳頭，若梳一改頭就予伊一錠金仔，同時交代伊講：「這錠金仔提轉去，愛埋踮你的眠床跤，袂使共人講。」
彼个小姑娘轉來厝裡，完全照金蓮的交代去做，偷偷攑著鋤頭入房間，房門鎖咧，共金仔細膩埋踮塗跤。時間一下久，這个神神祕祕的動作，煞引起著老爸的注意。有一改，伊拄埋好金仔，拍打開房門出來，煞看著老爸佇在門口，真受氣講：「你鬼幾祟祟咧創啥物？講予清楚，較免食拍。」伊見看阿爸受氣，只好原原本本攏講出來。老爸一聽著埋的是金仔，受氣轉歡喜，呵咾伊是一个好查某囡仔，叫伊隔轉工提較濟金仔轉來，日後才通嫁一个好翁。
彼暗，老爸傷興奮，一暗攏睏袂去，天袂光就起來掃塗跤、洗衫、煮飯，凡是查某囝做的代誌，攏替伊做好。天才拍殕光，伊就叫查某囝起來食飯，通好較早去山頂。毋過，當查某囝行到山頂時，卻揣袂著金蓮，連房屋攏無看去。伊起疑心，大聲喝：「金蓮姊！金蓮姊！」猶原無人應，干焦聽著山谷的應聲：「金蓮姊！金蓮姊！」
林道乾走到南洋的馬來西亞佮新加坡，欣羨西洋人的船砲，就一面練兵，一面家己試做銃佮砲。有一工，伊試驗新造的武器，先共火藥囥入去砲筒，裝好引信，紲落來共引信點火，等待伊作用，等規半晡，就是無看著砲彈發射出來。林道乾感覺奇怪，就行去砲筒口，掠一粒目睭檢查砲筒的內面，烏趖趖看無，他就改攑拐仔撞入去看覓，哪知影火藥突然爆發，碰一聲射出砲彈，聖聖彈著伊的胸坎．林道乾隨倒在地，四界攏是血，瞬間死亡。
林道乾，台灣一代的海賊王逝世了後，台灣就開始流傳這句孽譎仔話：「林道乾做銃---彈家己」。
沒有留言:
張貼留言