台語1300个常用字

緣起

本文章蒐集了口語上很常用但卻不見得很熟悉的台語單字，凡一千三百餘字，命名為「台語1300个常用字」，提供有興趣快速學習台語正字的一個管道，只要能熟悉這些單字及其構成詞彙，即可快速提升台語文的「讀寫」能力，擺脫「台語文盲」的困境。

編輯體例

所有單字依照其台羅拼音的羅馬字母順序排列，各單字台羅拼音的開頭字母則作為章節段落，並以之成就出一個目錄區。

編輯內容

每個單字，先列出其台羅拼音後，接著例示該發音的相關詞彙或例句，多詞彙或例句者以"／"分隔；一字多音者，另起一行，列出各讀音，再各別綴以相關詞彙或例句。

使用方法

由目錄區直接點入欲查詢單字的開頭發音，即可鏈結到相關單字之章節。該章節結束時，隨時可按「回：目　　錄」，回到目錄區做其他查詢。

參考文獻

1. 吳昭新：新編台灣閩南語用字彙編，1913
2. 何正信：台語歌詞常見錯誤漢字一覽表，2018
3. 何正信：台語疊字，2020
4. 教育部：台灣閩南語常用詞辭典，2011
5. 教育部：教育部閩南語推薦用字700字詞，2014
6. 陳雷：鄉史補記，2008
7. 黃文達：台語漢字，2014
8. 黃明德：台灣河洛話經典，2004

***本處僅列出前一個章節，完整台語疑難單字集，請參考： 台語1300个常用字。

合音
1. 無要緊：bua̋-kín（原音：bô iàu-kín）: （華：沒關係）

2. 彼陣：hín（原音：hit-tsūn）:（華：那時）
3. 予人：hông（原音：hōo-lâng）:（華：給人）
4. 下昏：i̋ng（原音：ē-hng）：（華：今晚）
5 共人：kâng（原音：kā-lâng）:（華：捉弄）
6. 干焦：kānn（原音：kan-ná）：（華：只有）
7. 落去：lueh/loih（原音：lo̍h-khì）:（華：下去）

8. 明仔載：ma̋-tsài（原音：bîn-á-tsài）：（華：明天）

9. 拍毋見：pháng-kìnn（原音：phah-m̄-kìnn）：（華：丟失）
10.  今仔：ta̋nn（原音：tann-á）：（華：剛才）

11. 中央：tiőng（原音：tiong-ng）：（華：中間）

12. 昨昏：tsa̋ng（原音：tsa-hng）：（華：昨天）
13. 查某人：tsa̋u-lâng（原音：tsa-bóo-lâng）：（華：女人）
14. 這陣：tsín（原音：tsit-tsūn）：（華：現在）
15. 就按呢：tsua̋n（原音：tsū-án-ne）：（華：從此）

16. 佗位：tuē/tueh（原音：tó-uī）：（華：哪裡）

回：目　　錄
 

***完整台語疑難單字集請參考： 台語1300个常用字

台灣民間故事：貧惰人拜師

 古早以前，佇咱台灣的中部，蹛著一个貧惰人，號做「阿懶」，伊的貧惰規庄通人知，連隔壁庄的大大細細嘛攏知，真正是「頂港有名聲，下港有出名。」

阿懶的厝前，種有一欉荔枝，彼時拄當咧結果。有一工，伊看著在欉當紅的荔枝，喙瀾㴙㴙滴，足想欲食。毋過，伊閣貧惰伸手去挽，欲叫伊去擘殼，共擘好的荔枝窒落去喙內，就更加無可能。毋過，貧惰人就是有貧惰步，伊就規身軀倒踮樹跤，干焦開彼支喙，佇遐恬恬等荔枝落落來，通好食。

彼時陣，隔壁庄一个趕豬的囡仔，拄行過伊身邊，愈看愈奇怪，就問伊：「喂，你是咧創啥？」伊應講：「我咧等荔枝落落來通食。」囡仔講：「謼，你實在是有夠貧惰，毋過，猶毋值得阮庄的阿荏仔，彼才是貧惰仙。」阿懶一聽著講竟然有人比伊較貧惰，心內真歡喜，就想欲去拜師，加學一寡仔貧惰步。
 
隔轉工，伊冗早起床，就兇兇狂狂傱去隔壁庄。入庄頭，揣著阿荏仔兜，門煞猶未開。伊就大聲共咻，無人應；伊閣連咻三聲，猶是無人應；伊只好大力共挵門，挵四五下了，才聽著內面有人慢慢應講：「曷是誰，七早八早就咧挵門？」然後才聽著跤步聲，寡寬仔行來開門。
 
門拍開，阿荏仔看著一个人的尻脊骿，就問講：「你是誰？揣我創啥？」
阿懶連頭都無越，應講：「我叫阿懶，欲來拜師學藝，學貧惰的工夫。」
阿荏仔閣問：「欲拜師，哪會提尻脊骿看人？身軀毋就越過來，才有禮貌。」
阿懶應講：「我是驚你毋收我。若毋收，我就會使直接行轉去，毋免閣踅一擺身。」
阿荏仔聽了，知影阿懶比伊閣較貧惰，哪著來學，就講：「你曷使學，你比我貧惰濟咧，你會使直接轉去矣。」
 
改寫自：呂訴上：懶惰人的求師

台灣民間故事：阿里山的傳說

＊＊＊揤遮就會當看著無亂碼的文章

佇咱台灣嘉義的東爿，有一條南北向的山脈叫做「阿里山」，伊是18座的高山群所合成，頂頭上懸的山，有兩千外米懸。阿里山有一大片的原始森林，尤其是上千年、神木級的薄皮仔樹，上有名。台灣的三寶：稻米、甘蔗佮樟仔，其中的樟仔也大部分生佇遮。阿里山這馬是「阿里山國家風景區」的一部份，區內上有名的景緻有「五奇」：日出、雲海、暗霞、森林、高山鐵路，一年四季，攏有真濟人起去遊覽。毋過，早前的阿里山卻毋是按呢，伊原本無生半欉樹、半枝草、半蕊花，若成一座禿頭山。按呢的一座禿頭山是按怎會變甲遮爾媠，閣改名做阿里山呢？聽講有一个真趣味的傳說。

真早以前，靠禿頭山北爿山跤的一條大溪水邊，蹛著一个拍獵為生的鄒族少年人，名叫「阿里」。有一工，阿里起去禿頭山的山埔拍獵，突然間，看著山跤有一隻猛虎，咧逐兩个佇遐挽花的姑娘。阿里衝衝碰碰對山埔傱落去，一下手就跳到猛虎的尻脊骿，手起刀落，干焦聽著咔嚓一聲，猛虎的頭殼就予伊鏨斷去，輾落去山跤，伊就按呢解救了彼兩个挽花的姑娘。

過一陣，阿里猶佇山埔頂拍獵時，突然間看著一个手攑龍頭拐的鬍鬚老歲仔人，一面笑，一面搝著拄才彼兩个姑娘的手股，對禿頭山較南爿的山埔起來。阿里是一个見義勇為的好青年，想講這兩个姑娘才脫離虎口，就落在這个老歲仔的手頭，規腹火夯起來，大喝一聲：「放手！」就一大步衝到彼个老歲仔面前，搶下伊的龍頭拐，拐仔攑懸，相真真對伊的頭殼額仔就共掔幾若下。老歲仔疼甲哀爸叫母，雙手自然放開彼兩个姑娘，去挲額仔頂噗出來的大癗，最後才手䘼擛一下擛一下，向天頂飛去，才一目𥍉，就無看著矣。

過無偌久，青天白日，煞開始出現雷公爍爁，由遠而近，愈來愈響，愈來愈光，只看著彼兩个挽花姑娘驚甲規身軀咇咇掣，兇兇狂狂講：「這聲害矣，這聲害矣！」阿里感覺奇怪，問講：「是按怎？」

兩个姑娘應講：「阮本是天宮的仙女，聽講台灣寶島，景色真媠，就偷偷下凡來𨑨迌。無疑悟去拄著惡虎，佳哉有你相救。毋過，阮貪戀著遮的美色，煞去誤著轉去天庭的時辰，玉帝派老壽星來掠阮轉去，阮驚玉帝會治罪，毋敢回天宮，拄好佮老壽星佇遐搝搝搦搦的時，你就走來共伊拍走。這馬伊共這件代誌稟報予玉帝，玉帝大怒，命令雷公電母用雷火共這搭的生靈攏燒死。」

阿里聽按呢講，嘛掣一趒，無想著家己的一番好意，煞予這搭的生靈受著災難，就著急問：「敢有啥物辦法，會當解救這搭的生靈。」兩个仙女講：「辦法是有，愛有人起去禿頭山頂，共雷火引開，就會當保護這搭的生靈，毋過引開雷火的人，恐驚有性命的危險。阿里兄，你趕緊覕去一个安全的所在，阮兩人這馬就來去山頂引開雷火。」

阿里搖頭講：「毋好，老壽星是我拍的，禍是我惹的，哪會使予恁去引開雷火？猶是我來去才著！」講煞，伊就攑起龍頭拐，速速往山頂走去，一目𥍉，就走甲山頂矣。伊攑頭看天，大聲喝講：「雷公電母啊！老壽星是我阿里拍的，彼兩个仙女是我阿里放的，禍是我阿里惹的，一切攏是我一手造成的，佮別人無關係。恁的雷火，就拍踮我阿里的身上啦！」

這時，雷公佮電母已經行到禿頭山的天頂，雷公攑著雷鑽，電母攑著閃錘。雷公的雷鑽相真真對阿里撼去，雷聲霆煞，阿里就予伊摃死在地；紲落來電母的閃錘嘛相真真對阿里擛去，爍爁閃煞，阿里的屍體就燒起來。雷公佮電母看火著起來矣，就越頭轉去天宮交差。佳哉，這座山無樹仔也無花草，雷火燒無路，真緊就化去矣。

阿里予雷火燒成火烌了後，禿頭山的山神，帶念伊一片的善心，就共遐的火烌提來做肥料，攑彼枝龍頭拐做種，佇山頂栽出一大片的薄皮仔，最後就發展成千年的神木。彼時的人毋知影是山神的傑作，攏傳講遐的樹仔是阿里的皮、肉佮頭毛變的。彼兩个仙女，看著這種情景，感念著阿里的善心，就講：「阿里兄是為著欲救咱兩人佮逐家才死的，伊死了後，皮、肉佮頭毛閣變做樹林，來為咱造福，曷無，咱也來變做花草，通佮阿里兄永遠做伴，閣會當為人造福。」

從此以後，禿頭山就出現了滿山遍野的樹仔佮花草，樹仔青翠，花草紅豔，景色誠迷人。後來的人為著欲紀念阿里這个捨生救人的好青年，就共禿頭山改名做阿里山。

註：故事脫胎自本原稿

台灣童話故事：濁水溪的傳說

＊＊＊揤遮就會當看著無亂碼的文章

濁水溪是咱台灣上長的一條河，全長170公里，對彰化出海。遮爾清氣的一條溪水，是按怎會號做濁水溪？

傳說講，這條溪發源於能高山，原本號做清水溪。能高山真懸，戴瓜笠仔徛踮山跤攑頭看山，瓜笠仔落落去塗跤猶看袂著山頂！

　　

古早的時，山跤蹛著一个獨身仔的少年號做索雅。伊定定受歹頭目的欺壓，生活真艱難。有一工，伊踮山跤剷草，天氣傷熱，就倒佇樟仔跤的草欉歇跤。忽然間，一隻金錢豹咬著一隻白兔仔跳過來，停踮一欉細欉樹仔邊，共兔仔囥落來，準備欲食。索雅看了不忍心，就恬恬仔起身，揤到細欉樹仔後面，鋤頭攑懸懸就相真真對彼隻豹的尻川共撼落去，豹大哎一聲，予這个突如其來的偷襲驚著，緊共兔仔抨掉越頭就走。　　

　　

索雅行過來，看著兔仔倒踮塗跤，腹肚猶咧膨一下凹一下的，一蕊目睭噗出來，血流甲滿四界，一肢腿折斷去。伊趕緊到樹林仔邊薅一寡藥草，用喙哺予幼幼，輕輕糊佇兔仔的斷腿頂，又閣拆一橛衫，用來共伊的腿縛予好。歇一睏了後，兔仔慢慢起來，擘開半爿目睭看索雅，感激甲頕幾个頭，一跛一跛行入去樹林。

又閣是一个炎熱的日子，索雅佇山跤作穡，伊舞甲大粒汗細粒汗，喙足焦，可是無水啉。伊攑頭看能高山，干焦看著荒草佮杉仔，吐氣講：「若準有酸甜仔酸甜的果子通食毋知偌好咧。」話拄講完，忽然間，耳空邊響起著歌聲：

「送你紫珠仔一粒子，埋佇塗裡用力捶；滿山滿嶺藤連藤，一喙酸來一喙甜。」

索雅拄咧感覺奇怪，一陣風剾來，突然間看著一个獨眼的老阿桑，跛一下跛一下行到伊的面前，共一粒圓輾輾的紫珠仔擲佇塗跤，然後白雪雪的衫影搧一下就無去矣。索雅以為家己咧做夢，但是看著塗跤，卻真正有一粒紫珠仔，伊就共紫珠仔埋踮塗裡，用跤蹔蹔的，才轉去。　　

　　

第二工，索雅照常夯著鋤頭欲去作穡，來到田裡煞予面前的景象驚愣去：葡萄藤連藤，連甲滿能高山，葡萄像一串串的紫珠仔掛踮藤仔頂。伊起去挽來食，酸甜仔酸甜，滋味真讚！毋過伊欲落來的時，無小心衫煞予葡萄藤割破一大橛，伊順手提草索仔來共衫縛咧，那吐氣那對葡萄藤講：「你毋知影我是一个獨身仔，無人會替我紩衫，你哪通閣共我的衫割破！」　　

　　

食了酸甜的葡萄，索雅愈有精神作穡，真緊伊就做好，會使轉去厝裡。當伊遠遠看著家己的破草厝仔時，心內起疑：「厝頂的煙筒哪會有火薰？猶有姑娘咧唱歌？」伊三步做兩步，傱到厝，拄好看著一个身穿白衫白裙的美麗姑娘咧煮飯。索雅愣愣徛佇門口，真久了後才歹勢歹勢問講：「你是誰？」姑娘共頭殼頂的汗拭拭咧講：「你毋是救過阮阿母？你毋是對葡萄藤訴苦？阮阿母叫我來的，我號做阿碧。」講了微微仔笑一下。　　

　　

從此，阿碧佮索雅就蹛做伙，去作穡時唱歌，去挽葡萄時唱歌，逐家攏為兩人的幸福歡喜。可惜好景不長，有一工，索雅咧挽葡萄時又閣割破衫，阿碧先挔轉去補，索雅褪腹裼繼續作穡，做規半工也無看著阿碧倒轉來，伊著急就鋤頭夯著轉去厝看覓。轉到厝也無看著阿碧的影跡，索雅急甲強欲吼。忽然間，聽著一陣爍爍顫的歌聲：　　　　　　　　

「紅紅的霞清清的溪，阿碧的歌聲眾人迷；歹頭的心腸蛇遐䆀，可憐的阿碧目屎垂。」

　　

一陣風剾來，彼个獨眼老阿桑又閣跛著腳來到索雅的面前，擲落一雙草鞋，一越頭，白雪雪的衫仔褲擛一下又閣無去。索雅共草鞋穿咧，向清水溪走去，伊知影歹頭目蹛佇溪仔對面岸真遠的所在。伊行到溪仔邊一看，唉喲喂啊，溪水當咧大流，水掣湧懸，是有一隻無人的柴船，但是是停佇對岸，今無船欲按怎過溪？忽然間，「嘩啦」一聲，兩條若碗公遐粗的葡萄藤，對能高山落落來，像兩條軟索仝款，幌對對岸去，聖聖共兩岸連做伙。索雅看機不可失，就馬上起去葡萄藤，手搝予絚，跤拑予牢，牙根咬咧，一節一節爬過去。到對岸了後，伊伐大步，順著彎彎曲曲的小路行去。拄落一个崎，煞看著一个白喙鬚的老大人，跋踮路邊的湳塗，大氣小氣喘袂離，袂出來。

　　

索雅趕緊走入去湳塗內，共老大人抱起來，一跤深一跤淺行出來，兩个人規身攏漉糊仔糜，像塗人仝款，老大人叫索雅共伊揹的竹籠仔佮斧頭提落來。老大人就慢慢爬入去竹籠仔內，跔佇內底講：「你來偝我行轉去阮厝！照我手指頭仔比的所在行。」索雅揹起竹籠仔大步向前行，到一个三叉路口，老大人講：「囡子，你的阿碧就佇頭前彼間細粒山跤的石頭仔厝受苦！這个籠仔佮斧頭你有路用，你揹去。」一陣風剾來，白喙鬚的老大人就對籠仔內消失去。

索雅揹著竹籠仔向石頭仔厝走去，走到厝邊，就馬上對竹籠仔內攑出斧頭向石牆仔刜落去，「吭」一聲，刜出一大空。伊軁入去，看著阿碧規身軀烏青倒佇塗跤，不省人事。索雅心內艱苦甲大粒目屎直直輾，目屎滴著阿碧的身上，阿碧煞清醒起來，索雅緊共伊扶入去竹籠仔內，共竹籠仔揹起來速速走離石頭仔厝。　　

歹頭目發現阿碧走無去，即刻𤆬一陣下跤手人，攑著光映映的刀追趕。索雅走到清水溪邊，起去葡萄藤，歹頭目佮伊的拍手，也綴咧起去藤仔。藤仔佇空中㽎咧㽎咧，現現就欲予逐著矣，阿碧就對索雅講：「你藤仔搝予牢！」伊伸手入去竹籠內，攑出斧頭，向伊後面的藤子大力鏨落去，連紲鏨九刀，藤仔才「叭啦」一聲斷去。歹頭目佮伊的拍手一个一个「噗噗噗」跋落溪底。索雅共藤仔絚絚搝咧，勻勻仔起去山頂，阿碧才對竹籠仔內跳出來，佮索雅手牽手，笑微微來到溪邊。這時遐的歹人猶閣咧水底噗噗泅，毋過，任按怎泅嘛泅袂上岸，只是共本來清氣的溪仔水，舞甲濁濁濁。　　

後來人就共這條清水溪改名號做「濁水溪」，能高山這段的溪仔灣號做「斷藤灣」。從此以後，索雅佮阿碧以及當地的百姓，就過著平安的生活，能高山跤逐工都充滿著快樂的歌聲。

註：故事脫胎於本原稿