台灣有一句俗語，講：「自恨枝無葉，莫怨太陽偏」，是咧講做人毋免怨天尤人，失意落魄的時，怪天公伯仔偏心，不如怪家己命運䆀。
足早以前，台灣的某一个城市，有二个少年的乞食，一个叫做「太陽偏」，另外一个叫做「枝無葉」。是仝年仝月仝日出世，但是差一个時辰。兩人是好朋友，透早就做伙去討食，欲暗仔才轉來乞食寮，日子就按呢一工一工過去。
有一工暗時，佇乞食寮，那開講那怨嘆歹命，才著來做乞食，逐工去共人分，予人侮辱，敢講一世人就按呢過落去？最後。決定暫時分開，各人去賭運氣，約定五年後閣來相會。自按呢，太陽偏選東爿行去，枝無葉則向西爿行去。
行向東爿的太陽偏那行那討食，一工暗時來到一个小鎮，行忝矣，就睏踮一間員外的大樓樓跤。拄好員外的千金小姐佮愛人約好，欲佮愛人相𤆬走，半暝時陣，伊共金銀細軟裝佇包袱仔內，對樓頂擲落來，聖聖落佇太陽偏的身邊。太陽偏眠夢中，予「噗」一聲拍一个半清醒，頭殼猶楞楞，就順手捎彼个包袱仔來做枕頭。千金小姐對樓頂攀索仔落來，煞看著家己寶貴的包袱仔予太陽偏提去做枕頭。伊等啊等，就是等無愛人來，想欲轉去，閣驚去予爸母罵，進無步退無路，只好共太陽偏搖醒，共代誌的原由全部說出來，佮伊做伙逃走。
佮千金小姐做伙的太陽偏，生活雖然有真大的改善，但猶毋是會當奢華的時陣。兩人就一面流浪一面沿路做小生理。一工，來到一个小鎮，欲佇一間旅館歇暗，旅館主人講旅館已經客滿，但是袂勘得太陽偏的哀求，只好講：「我另外有一棟厝，離這間旅館無偌遠，但因為有鬼，攏無人敢去蹛，恁若願意，就予恁蹛。」太陽偏翁仔某就蹛入去那棟有鬼的厝。
半暝時陣，兩人做眠夢，果然夢著一个紅鬼佮一个青鬼，翁仔某驚甲咇咇掣，拄想欲起跤走，紅鬼就行進前講：「主人，恁毋免驚，阮是福德正神的差役。這棟厝的塗跤下面埋有真濟財寶，攏是恁的，阮奉命佇遮照顧恁的金銀財寶，已經真久矣，今仔日恁來，阮也會當完成任務囉。」講完，兩个鬼就消失去。
太陽偏翁仔某透早醒來，歡喜佮強欲跳起來，就緊走去揣旅館主人，請伊共彼棟厝賣。旅館主人想講彼棟厝有鬼，無人敢蹛，竟然有人欲買，當然馬上答應，俗俗仔賣。太陽偏就倩工人日連暝共塗跤掘開，共寶物攏清出來，後來就用遐的財富做本錢，開始做生理，蓄田地，漸漸累積財富，最後成做當地上好額的員外。伊發達了後，驚人認出伊以前做乞食，就改姓張。
太陽偏好額了後，食山珍海味、蹛豪華住宅，但是較數念的，猶是好朋友「枝無葉」。回想彼陣兩人感情遐深，家己這馬錦衣玉食，卻毋知影「枝無葉」流落何方，生活過了按怎？伊派人四界去探聽，攏石沉大海。有一工，伊突然想著一个辦法，就是踮鎮上逐位貼告示，內容寫講：「某年某月某日，是本地張員外的生日，佈施三工，每一个到張員外厝裡拜壽的人，攏會當領著一隻米粉龜佮兩箍銀。」這个消息真緊就傳遍規鎮，連外地的乞食嘛趕來祝壽。毋過，連紲兩工的佈施，第三工嘛強欲結束矣，猶無看著枝無葉的影跡，伊感覺真失望。
話講枝無葉自佮太陽偏分手了後，一路向西行，毋過生活攏無改善，猶是四界討食。有一工伊聽講某鎮的張員外咧佈施，逐个人攏會當得著一隻米粉龜佮兩箍銀，就連夜趕去。可惜趕到的時，布施的時辰已經過，無咧發放矣。發放的人客氣共伊解說，但枝無葉誠受氣，想講家己對遐遠趕來，竟然啥物都無拈著，就徛佇門口毋走，閣佮發放人員大聲吵鬧。太陽偏佇內室聽著吵鬧聲，走出來一看，原來佇遐吵吵鬧鬧的人，毋是別人，正是伊日夜數念的好朋友枝無葉。
「葉兄，我揣你誠久矣，今仔日竟然予我揣著，太好咧。」兩人𢯾咧大哭。太陽偏隨時叫下跤手人共枝無葉𤆬去洗身軀，共垃圾的坱埃攏洗清氣，換穿上等的媠衫，閣備辦豐沛的暗頓。枝無葉洗身軀了後，佇咧穿新衫時，突然間感覺全身軀若去予規萬枝針鑿著仝款，癢閣疼。伊只好共新衫褪落來，共家己彼領乞食衫穿轉去，才感覺較爽快。伊才覺悟，富貴在天，各有天命，這是上天註定，是無法度改變的。
枝無葉就無閣等太陽偏替伊準備的豐沛晚頓，佮太陽偏相辭，講：「偏兄，你的好意我心領矣，而且一世人嘛袂記得，可是人各有天命，我恐驚是無福蹛踮遮，佮你共享榮華。我馬上欲離開遮，你毋免閣掛念我，也毋免閣揣我。若聽著我過身的消息，念在咱早前的交請，替我燒香拜拜就好。」
太陽偏知影枝無葉心意既定，挽留也無用，就叫下跤手人做了真濟的米粉龜，逐个內底攏藏八箍銀，予伊紮走。枝無葉佮太陽偏就此淚別。
枝無葉帶著太陽偏送的米粉龜沿路行，想講帶遮濟米粉龜家己一時也食袂完，就沿路以一个二个銅錢賣掉，干焦留兩个米粉龜佇身上。最後，伊腹肚枵矣，才提出米粉龜欲食，一擘開，看著內面竟然有八箍銀，伊緊閣共最後一个米粉龜擘開，內面也是藏著八箍銀。伊才知影家己的命運竟然遮爾䆀，想想咧，閣活落去也無啥意思，就吊脰自殺。吊脰進前，伊寫了一段話：「自恨枝無葉，莫怨太陽偏。」
沒有留言:
張貼留言