台灣有一句俗語，講：「無某無猴」，是咧供體無某閣無錢的散赤人。「無某」會當了解，但是哪會干涉著「猴」咧？其實是有一个趣味的故事。
古早以前，有一个散赤人號做「鄭庵鴻」，伊無家產，無固定的職業，規工放蕩，骨力食閣貧惰做。伊雖然逐工抱著滿腹的希望，出去揣工課，但總是嫌工課傷忝，碰壁轉來。
這一工，伊𤆬伊某入城，看見媽祖廟的埕斗，圍一陣人，若像咧看啥物鬧熱，一時好玄，就搢入去看。原來是一个四十外歲，走江湖的王祿仔仙，伊一手攑著一跤細銅鑼，一手牽著一隻猴山仔，一面「噹! 噹! 噹!」咧敲，一面大聲咧喝：「父母兄弟姊妹，緊來看難得一見的猴仔戲！保證精彩！錯過你會後悔！」
彼个王祿仔仙看人圍了袂少，就開始指揮彼隻猴山仔表演心適的動作、跳舞佮拋輦斗，弄甲觀眾笑咍咍，一直拍匹噗仔。紲落來，猴山仔閣會曉耍誠濟把戲，比論，搝小三輪車、索仔、行鋼索、踢球、騎獨輪車，所有走江湖的猴弄，無一項袂曉，觀眾款甲歡喜粅粅，噗仔聲一直催，彼个王祿仔仙也誠滿意，賞伊一枝弓蕉，伊食甲兩个喙䫌膨獅獅。
猴山仔表演煞，王祿仔仙就欲代表伊講話，伊佮猴山仔做伙，先向四圍的觀眾頕一个禮，然後講：「各位鄉親，各位父老！猴山仔佇遮向逐家行一个大禮，請逐家慷慨賞幾个錢予猴山仔買糖通食！勞力逐家！多謝逐家!」觀眾嘛真有量，紛紛共銀角仔抌入去場內，一時仔工夫，已經擲甲規四界，算算咧應該袂少，濟過一工的生活費。
徛佇邊的鄭庵鴻，看著這个情形，心裡真欣羨，想講：「這个人干焦靠一隻猴山仔，就會當輕輕鬆鬆趁遮濟錢，我若有仝款的猴山仔，就免驚趁無錢囉！」這時彼个王祿仔仙已經共塗跤的銀角仔抾欲完矣，開始收拾表演的家私，準備牽著猴山仔離開。鄭庵鴻趕緊行到伊的面前講：「朋友，你好，我發現你這隻猴山仔替你趁袂少錢，想欲佮你參詳，將伊讓渡予我好無？」「袂使！袂使！這隻猴山仔，綴我走江湖，相依為命，替我趁袂少錢，就親像阮某仝款，閣較濟錢嘛袂賣咧。」王祿仔仙一喙回絕。
鄭庵鴻看王祿仔仙一點仔都無想欲共猴山仔賣予伊，心內開始著急，想著若有猴山仔，毋免討趁，銀角仔就會滾滾而來，就決心無論按怎也欲共猴山仔買過手，就講：「既然你共猴山仔看做恁某，曷無我用阮某佮你換，按怎？」鄭庵鴻一面講，一面指著徛底伊邊的媠某。王祿仔仙看著鄭庵鴻某，雖然穿插樸素，但生做猶算媠，而且看起來誠賢慧，心想：「家己過卌，猶袂娶某，這下若天頂落落來的禮物，曷若猴山仔，以後閣買一隻，好好閣訓練就有矣。」但是伊猶閣假影無啥願意的款，講：「我是靠這隻猴山仔過生活的，無這隻猴山仔，我生活就會有問題，這件代誌我愛閣考慮一下。」「有啥物好考慮的，就按呢決定啦！」鄭庵鴻應講。「曷無好啦！」王祿仔仙總算勉強答應。
鄭庵鴻真歡喜搝著某講：「我已經用你去換這个王祿仔仙的猴山仔，對這馬開始，你就綴伊行。」鄭庵鴻某真受氣講：「你規工浪流連，愛食毋做，我都無講你，這馬閣雄心共我賣掉，有夠無良心。」鄭庵鴻講：「你就暫時委屈咧！等我趁錢發財了後，我會真緊就將你贖轉來。」
鄭庵鴻將某捒予彼个王祿仔仙時，王祿仔仙驚伊無願意綴伊，就講：「你敢真心欲綴我？」鄭庵鴻某心內想：「若繼續綴鄭庵鴻這个無情無義、愛食毋討趁、欲做無半撇的翁婿，不如綴這个王祿仔仙，猶會當求一个溫飽。」就按呢，滿懷悲哀佮委屈答應。王祿仔仙就馬上共細銅鑼、猴山仔佮表演的家私，全部交予鄭庵鴻，然後歡歡喜喜𤆬著鄭庵鴻某離開。
第二工，鄭庵鴻就開始走江湖，伊到了隔壁庄一間關帝廟的廣場，開始敲鑼叫觀眾，人聽著鄭庵鴻咧喝，馬上對四面八方傱來，鄭庵鴻看觀眾愈來愈濟，真歡喜，想講：「有夠讚，這聲卯死矣。」等觀眾攏聚集了後，伊就搝著猴山仔上場，準備叫伊跳舞佮耍猴弄，表演一寡趣味的動作，予觀眾看，當然，上重要的，就是欲請逐家加賞幾箍銀角仔，通好予伊佮猴山仔好過日。毋過，這隻猴山仔看著指揮伊的是新的主人，無啥插伊，閣講，鄭庵鴻的口令佮手勢，伊嘛看無，欲做嘛做袂來。猴山仔毋聽話，鄭庵鴻就開始著急，拚性命共猴山仔搝咧一直踅，猴山仔猶是毋肯表演，最後，猴山仔規氣覆踮塗跤，掠鄭庵鴻金金看。
這時，鄭庵鴻大著急，箠仔攑起來，就重力摃落去，猴山仔疼甲吱吱叫，開喙欲咬人。四園的觀眾，看著這个清形，攏感覺傷殘忍，嗤舞嗤呲，紛紛指責鄭庵鴻虐待動物，鄭庵鴻著急欲辯解時，彼隻猴山仔，趁伊一下無張持，就跳對關帝廟的厝頂起去，等鄭庵鴻發現時，已經袂赴矣，一目𥍉仔伊就走甲無影無跡矣。四圍的觀眾，看著猴山仔走去矣，知影無啥物好戲通看，就佇笑聲中散了了囉。
鄭庵鴻看著猴山仔走去，心內茫茫渺渺，想著某已經無去矣，這馬連猴山仔也無去，一時悲從心來，傷心、失望、懊惱、後悔，做一伙湧去來心頭。對伊來講，失去一隻猴山仔，就若失去一个某。自按呢，咱台灣人就共無某的散赤人，叫做「無某無猴」。
