佇咱台灣嘉義的東爿，有一條南北向的山脈叫做「阿里山」，伊是18座的高山群所合成，頂頭上懸的山，有兩千外米懸。阿里山有一大片的原始森林，尤其是上千年、神木級的薄皮仔樹，上有名。台灣的三寶：稻米、甘蔗佮樟仔，其中的樟仔也大部分生佇遮。阿里山這馬是「阿里山國家風景區」的一部份，區內上有名的景緻有「五奇」：日出、雲海、暗霞、森林、高山鐵路，一年四季，攏有真濟人起去遊覽。毋過，早前的阿里山卻毋是按呢，伊原本無生半欉樹、半枝草、半蕊花，若成一座禿頭山。按呢的一座禿頭山是按怎會變甲遮爾媠，閣改名做阿里山呢？聽講有一个真趣味的傳說。
真早以前，靠禿頭山北爿山跤的一條大溪水邊，蹛著一个拍獵為生的鄒族少年人，名叫「阿里」。有一工，阿里起去禿頭山的山埔拍獵，突然間，看著山跤有一隻猛虎，咧逐兩个佇遐挽花的姑娘。阿里衝衝碰碰對山埔傱落去，一下手就跳到猛虎的尻脊骿，手起刀落，干焦聽著咔嚓一聲，猛虎的頭殼就予伊鏨斷去，輾落去山跤，伊就按呢解救了彼兩个挽花的姑娘。
過一陣，阿里猶佇山埔頂拍獵時，突然間看著一个手攑龍頭拐的鬍鬚老歲仔人，一面笑，一面搝著拄才彼兩个姑娘的手股，對禿頭山較南爿的山埔起來。阿里是一个見義勇為的好青年，想講這兩个姑娘才脫離虎口，就落在這个老歲仔的手頭，規腹火夯起來，大喝一聲：「放手！」就一大步衝到彼个老歲仔面前，搶下伊的龍頭拐，拐仔攑懸，相真真對伊的頭殼額仔就共掔幾若下。老歲仔疼甲哀爸叫母，雙手自然放開彼兩个姑娘，去挲額仔頂噗出來的大癗，最後才手䘼擛一下擛一下，向天頂飛去，才一目𥍉，就無看著矣。
過無偌久，青天白日，煞開始出現雷公爍爁，由遠而近，愈來愈響，愈來愈光，只看著彼兩个挽花姑娘驚甲規身軀咇咇掣，兇兇狂狂講：「這聲害矣，這聲害矣！」阿里感覺奇怪，問講：「是按怎？」
兩个姑娘應講：「阮本是天宮的仙女，聽講台灣寶島，景色真媠，就偷偷下凡來𨑨迌。無疑悟去拄著惡虎，佳哉有你相救。毋過，阮貪戀著遮的美色，煞去誤著轉去天庭的時辰，玉帝派老壽星來掠阮轉去，阮驚玉帝會治罪，毋敢回天宮，拄好佮老壽星佇遐搝搝搦搦的時，你就走來共伊拍走。這馬伊共這件代誌稟報予玉帝，玉帝大怒，命令雷公電母用雷火共這搭的生靈攏燒死。」
阿里聽按呢講，嘛掣一趒，無想著家己的一番好意，煞予這搭的生靈受著災難，就著急問：「敢有啥物辦法，會當解救這搭的生靈。」兩个仙女講：「辦法是有，愛有人起去禿頭山頂，共雷火引開，就會當保護這搭的生靈，毋過引開雷火的人，恐驚有性命的危險。阿里兄，你趕緊覕去一个安全的所在，阮兩人這馬就來去山頂引開雷火。」
阿里搖頭講：「毋好，老壽星是我拍的，禍是我惹的，哪會使予恁去引開雷火？猶是我來去才著！」講煞，伊就攑起龍頭拐，速速往山頂走去，一目𥍉，就走甲山頂矣。伊攑頭看天，大聲喝講：「雷公電母啊！老壽星是我阿里拍的，彼兩个仙女是我阿里放的，禍是我阿里惹的，一切攏是我一手造成的，佮別人無關係。恁的雷火，就拍踮我阿里的身上啦！」
這時，雷公佮電母已經行到禿頭山的天頂，雷公攑著雷鑽，電母攑著閃錘。雷公的雷鑽相真真對阿里撼去，雷聲霆煞，阿里就予伊摃死在地；紲落來電母的閃錘嘛相真真對阿里擛去，爍爁閃煞，阿里的屍體就燒起來。雷公佮電母看火著起來矣，就越頭轉去天宮交差。佳哉，這座山無樹仔也無花草，雷火燒無路，真緊就化去矣。
阿里予雷火燒成火烌了後，禿頭山的山神，帶念伊一片的善心，就共遐的火烌提來做肥料，攑彼枝龍頭拐做種，佇山頂栽出一大片的薄皮仔，最後就發展成千年的神木。彼時的人毋知影是山神的傑作，攏傳講遐的樹仔是阿里的皮、肉佮頭毛變的。彼兩个仙女，看著這種情景，感念著阿里的善心，就講：「阿里兄是為著欲救咱兩人佮逐家才死的，伊死了後，皮、肉佮頭毛閣變做樹林，來為咱造福，曷無，咱也來變做花草，通佮阿里兄永遠做伴，閣會當為人造福。」
從此以後，禿頭山就出現了滿山遍野的樹仔佮花草，樹仔青翠，花草紅豔，景色誠迷人。後來的人為著欲紀念阿里這个捨生救人的好青年，就共禿頭山改名做阿里山。
