古早人講：「一命、二運、三風水、四積陰德、五讀書。」可見風水比積陰德、讀書閣較重要。佇台灣風水界名聲上敨，對唐山渡海來台的風水名師中，北有林瑯仙，中有蝨母仙，南有林半仙，三人攏以看風水出名，其中尤其是南部的林半仙上傳奇。這馬咱就來講伊的風水奇談。
話講清朝乾隆初年，福建泉州有一个地理師，號做「林鎮」，因為伊看風水的技術誠高明，逐家攏稱予伊「林半仙」。
泉州府總兵胡文海，想起家己的老爸死佇台灣，埋踮高雄縣林園鄉的鳳鼻頭，孤魂飄異鄉，到今猶無一个較成物的墓，家己這馬做甲總兵，應該共老爸的屍骨抾轉來故鄉安葬，以盡孝道。伊聽過林半仙的大名，就請林半仙佮家己的阿舅，渡海來台灣搬運家己老爸的骨骸。
兩人來到鳳鼻頭時，林半仙徛佇墓前，面對東西南北斟酌看一陣。忍袂牢拍噗仔講：「哎，這个風水埋了真著！這是一座真正的龍穴。袂使動咧！總兵的官位就是對遮致蔭出來的。」總兵阿舅聽了，感覺好笑，就共剾洗講：「若這个墓是真正的龍穴，按呢天下所有的墓攏是龍穴囉。」「確實是龍穴！若有毋著，我林半仙三字倒頭寫！」林半仙予總兵阿舅黜頭，真無歡喜諍講。
「半仙，我老實共你講！阮姊夫對老厝來台灣，佇漁船頂替人牽一世人的魚網，猶是散鬼一个，死了連一副薄薄的棺材攏買袂起，只好由我佮阿姊用一條草蓆仔包咧扛來遮，凊彩挖一空就共埋，無選日子，也無請地理師，若講這是龍穴，按呢阮毋就是活神仙？我看你趁早共林半仙三字倒頭寫？」
林半仙聽伊按呢講，更加證明家己的判斷無毋著，馬上紲咧講：「按呢就著啦！這個風水就是愛軟葬，你若用棺材貯屍體，彼叫做硬葬。哪猶會當出總兵？」總兵阿舅想講林半仙一定是聽家己講用草蓆仔毋是棺材埋的，才綴話講是軟葬，看起來林半仙嘛是江湖喙糊瘰瘰，無啥物本事！就無奈講：「你莫蹛遐亂濺，啥物真正龍穴，著愛軟葬，龍穴袂動咧，今仔日我就共挖出來帶轉去老厝。」林半仙知影伊懷疑家己的工夫，就應講：「既然你按呢想，我林半仙猶無法度閣做落去，再見！」
總兵阿舅看林半仙氣怫怫離開，也無半點欲留伊的意思。第二工就倩人共骨骸掘出來，帶轉去福建。無偌久，消息傳來，總兵阿舅所坐的彼隻船沉佇台灣海峽，伊佮姊夫的骨骸攏沉落海底。紲落來，胡總兵也出代誌無奈離開官場，鬱卒而亡。
林半仙無錢轉去福建，就到處流浪。這工流浪到高雄鳳山附近，枵閣寒，拄好經過一厝人家，看著彼家人當咧食中晝，忍袂牢加共看一下。「先生，若無棄嫌，就入來做伙食飯。」彼家的主人看林半仙面有飢色，就熱情招呼。林半仙拄枵甲強欲眩去，聽著遮爾親切的招呼，馬上行入去，講：「勞力！勞力！只是無熟無似，哪好意思攪擾。」「免客氣，請坐。毋過無啥物好菜，干焦蕃薯湯爾，愛多包涵。」主人謙虛講，順手𣁳一碗蕃薯湯予伊。
林半仙自流落異鄉，無親無情，逐工有一頓無兩頓，看著遮熱情的款待，感動甲目淚攏輾落來。「恁遮種作用水真困難呼？」林半仙食完蕃薯湯問。因為伊看著種作用的水，是靠著長長的索仔放落去山泉裡，慢慢搝起來，規半工才搝有一桶水，敢若真辛苦。「就是啊，遮地勢懸，拄著天旱，干焦會當用這个死辦法，若無，就免作穡矣。」主人樂觀仔講。
「恁心地善良，我來替恁求水，予恁以後攏有源源不絕的泉水通沃田。」林半仙說。「喔！按呢上好啊！毋知欲按怎求法？」主人歡喜甲跳起來講。「恁踮對面的山腹擺一个香案，準備一副牲醴，一枝桃花劍，鹽、米、水各一碗，通好作法。毋過，水來的時，恁愛盡量往海邊走，走愈遠愈好。」林半仙按呢交代。主人半信半疑，去共厝邊隔壁講，逐家雖然無啥相信，猶是共林半仙欲愛的物件，攢予好勢。
第二工，林半仙頭毛拍散，手攑桃花劍，跤徛香案前。先拈香跪拜，口中唸唸有詞，共鹽、米搣咧、東爿西爿散散掖。紲落來，倒手捀水碗，正手攑劍，向水碗畫一幅符仔，畫了閣向空中畫一幅符仔，然後喙含符仔水，向空中連噴幾喙，順手共桃花劍向山腹插落去，一股泉水真正就對塗跤濆出來。
「哇！水來囉！真靈聖喔！」作穡人攏大聲喝咻，就按照指示，拚命向海邊走去，走甲逐家攏會呼雞袂歕火，才佇港仔埔、潭仔、林內附近停落來，泉水也就綴流到遐。這个事件，予林半仙的名聲大敨，遠近的人攏相爭來請伊看風水，林半仙坐蹛轎內，逐工予人扛來幌去，應付袂離。
有一工，一个姓廖的散赤人，請林半仙替伊揣一个富貴發財的風水。林半仙同情伊的困境，就佮伊去山上去勘察。兩人盤山過嶺，跤底攏磨破去，四界斟酌看山形地勢。有一工，來到一粒細粒山頂，林半仙共山形地勢，詳細看了，大聲叫起來：「啊！揣著矣。」「是好地是無？先生！」姓廖的真歡喜問。林半仙頕頭講：「是矣，這是「美女獻花穴」，也是「金盆富貴穴。」「啥物是美女獻花穴？」姓廖的問。「這是風水名詞，你看這坪山埔對頂懸降落來，是毋是像一个䖙佇枕頭坦笑咧睏的美女？」林半仙用手比對山埔的頂面講。「啊！真成，彼兩粒噗起來的小山崙若像兩粒奶。」姓廖的敢若嘛看出幾分，綴咧講。林半仙閣比著山埔降落來的形勢繼續解釋：「你看，山埔降來到咱徛的這个所在就是正穴，就是「花穴」，山坪對遮分做倒爿佮正爿兩爿的山稜，繼續彎彎曲曲降落去，最後閣向中央合齊做伙，就若大腿，彼个腿彎的所在有一个塌窩，彼就是「金盆穴」，這个風水共埋落去就著矣，一定會出舉人、發大財。」
姓廖的聽了真歡喜，就鞠躬拜託林半仙講：「若按呢，就請先生共我相共，替我做這个風水，我先共你說勞力囉。」「歹勢，這个風水我做袂起。」林半仙推辭。姓廖的聽到林半仙毋肯做這个風水，大著急，就雙跤跪落去，那哭那講：「先生，你𤆬我走規半天，真無簡單才揣著這个好風水，是按怎無愛替我做？」「毋是我毋肯替你做，實在是這个風水無好做。做毋著，你毋但袂發財，閣會散赤一世人。若做著，你雖然會大富大貴，我的目睭卻會青盲。」林半仙解釋講。「先生，請你免顧慮遐濟，只要共風水做著矣，你就是阮廖家的大恩人，目睭若青盲，我會共你當做老爸照顧。請先生無論按怎愛幫忙。」姓廖的苦苦哀求。「好啦！我就犧牲這兩粒眼睛，替你做好這个風水。」林半仙無可奈何答應。「多謝先生！多謝先生！」姓廖的覆踮塗跤一直磕頭。
自從那个風水做好了後，姓廖的家境一工一工好起來，都無二冬，就變成當地大好額人。第三冬，伊一个十八歲的查埔囡仔竟然考著鳳山開科的舉人，真是富貴雙全。林半仙卻因此雙眼失明，也按照約束蹛踮廖家，受廖家奉養。拄開始，廖家大細，共林半仙看做若神明咧，逐工予伊穿媠衫，予伊吃大魚大肉。林半仙也宛然以廖家恩人自居，四界講廖家會興攏是伊的功勞，喝敧喝倒，一無佮意就大聲詈。姓廖的雖然有聽著風聲，心內無啥爽快，也無佮伊計較。但忍耐總是有限的，日子一下久，也開始對伊冷淡起來，衣食的照顧也較無像以前，甚至有小可怠慢。
林半仙雖然目睭無看，對這種待遇的改變，卻也真敏感。伊毋是戇呆，知影家己失明，一切攏著愛靠別人，若一直仝冤，無定著會無袂插伊，甚至共伊戽出去，最後吃虧的也是家己。伊就開始改變態度，輕聲細說，恬恬承受，佮進前奢颺的屈勢完全倒反。
有一工，食暗頓的時，拄好有一盤羊肉。這是林半仙上佮意的，大概傷久無食著，伊感覺下昏暗的羊肉特別好食。食飽矣，䖙佇椅條，那黜喙齒，那摸飽嚶嚶的腹肚皮，心想，最近無佮吵，對我果然有較好，真是和氣萬事好，以後就照這个方式來做。」
過一時仔，查某𡢃仔來收碗箸，林半仙滾笑問講：「下昏暗的羊肉是誰炒的？炒了真好，肉袂傷柴，味閣有夠，真順口。」彼个查某𡢃仔平時看林半仙囂俳慣勢，對伊無啥物好感，這馬聽伊講食甲遮爾聳勢，愈受氣，就冷冷仔講：「大概加摻一味臭屎味！」「啥物！」林半仙聽一下大著驚，心想：「敢會家己耳空重，聽毋著？」「你無聽毋著，是臭屎味！彼隻羊死佇便所底，別人攏毋敢食，你卻食甲津津有味。」
林半仙聽了，若受著真大的侮辱，拄才快樂的心情一時變做滿腹火，心想：「好一个忘恩背義的畜牲，竟然敢用這種卑鄙的手段來作弄我這个青盲的！」愈想愈氣，氣甲規面紅絳絳，心臟咇噗筅。等甲彼个查某𡢃仔離開了後，伊總算有較靜落來，就開始想報復的手段。忽然間，若想起了啥物仝款，用手重重拍踮椅拐，講：「哎呀！我哪會彼戇，按呢做就會使報這个冤仇啊。」
隔幾工，伊佮姓廖的咧開講時，講到祖墳，林半仙講：「彼个風水好是好，但也漸漸損害去，需要整修，曷無你的家財佮舉人，恐驚保袂牢。」「先生哪會知影?」姓廖的有一點仔懷疑問。「彼是我的心血結晶，哪會毋知影？你叫人去墓仔看覓，看伊是毋是逐工中晝攏會隆隆響。」姓廖的猶是毋相信，就家己親身走去看。連紲幾天，逐工中晝果然聽著墓內有「隆隆」叫的聲音，伊才相信。依就請林半仙揀一个吉日，準備牲醴，扛著林半仙去修墓。林半仙來到墓前，照例祭告天地、跪拜，然後攑劍唸咒、掖鹽、掖米，最後跳入去塌窩的金盆穴，共桃花劍插踮金盆，一股泉水就馬上對劍插的所在濆出來，伊緊捧來洗面，兩眼一旦復明，就大步離開。
姓廖的看見這个情形，知影風水已經予伊破壞，忍袂牢大聲一叫：「去矣！去矣！」就暈暈死死去。自此以後，姓廖的家境就若山崩水瀉，舉人也予人革去功名。一家人猶閣回到進前艱苦的生活。林半仙破壞金盆穴了後，猶毋甘願，又閣想欲破壞美女獻花穴。
有一工，伊佇路上拄著一个賣豆花的少年人，知影兜散赤，猶未娶某，就共伊叫停，講：「少年仔！你有想欲娶某無。若有咧想，我替你做媒，毋免錢。」「莫滾笑啦！想有啥路用？誰欲共查某囝送予我這个散鬼。」賣豆花的苦笑應。「無咧滾笑，我教你一个方法。」林半仙正經講，「明仔載正中晝，你去美女山。踮姓廖的祖墓前做一个相姦的模樣，然後共豆花倒踮彼个墓頂，伊就會使轉厝等，無偌久，就會有一个媠查某來揣你。你毋免懷疑，我是頂頂大名的林半仙。」
賣豆花的早就聽過林半仙的大名，所以相信伊，就完全照講的去做。廖家的美女獻花穴就按呢也被破壞，廖家的婦女自按呢變甲誠嬈，較濟歲的查某人攏想欲向男人「獻花」。其中，有一个上媠的，就佮這个賣豆花的少年人鬥做伙，後來大腹肚，就嫁予伊。
沒有留言:
張貼留言