以前有一个好額人，伊有三个查某囝，大的、二的攏嫁予真有才調的富家子弟，三查某囝卻嫁予一个戇直的青年，伊雖然百般毋願意，但佇古早時代，嫁雞綴雞飛、嫁狗綴狗走，嘛只好怨嘆家己命運䆀，全心幫助翁婿，扞家拑家。
有一改，好額人做壽，宴請親情朋友，戇囝婿某準備一隻鴨仔、壽麵、佮一幅紅色的壽聯，予戇囝婿紮轉去後頭厝共丈人祝壽。吩咐伊講：「你本性較戇直，閣無學問，佇後頭厝若袂曉講話，會予人恥笑，伊佇路頂著愛加減注意，若有看著、聽著好的詩句，就共伊記咧，後來欲用就有。」戇囝婿應好，就帶著祝壽的禮物出發。
這工，天氣晴朗，有剾一寡涼風，戇囝婿行到一个大湖，忽然聽著提佇手頭的鴨仔呱呱大叫，「伊一定喙焦，才會叫袂停。」戇囝婿按呢想，就共鴨仔放落去湖裡，通予伊啉水。鴨仔一落水，歡天喜地，翼股擛咧擛咧，那啉水，那泅那遠，戇囝婿閣較按怎喝咻，嘛叫袂轉來。
拍無鴨仔的戇囝婿，愣神愣神坐踮湖邊，過一時陣仔，伊看著湖裏有真濟誠媠的𩸙仔咧泅水，心想：「無鴨仔，掠一寡魚仔來去祝壽，嘛袂䆀。」伊就共祝壽的麵線做成魚網，擲落去湖裏欲撈魚，啥知影魚網一駐著水，魚仔就驚甲攏傱去水裡覕，結局毋但掠無半隻魚，連麵線做的魚網嘛溶了了。
這時戇囝婿手頭干焦賰一幅紅壽聯，伊只好提著紅壽聯，繼續行。無偌久，來到荒郊野外，看著一叢竹林，予風搧甲吱吱叫，伊想：「可憐的竹叢，予風搧甲強欲寒著，我拄好有紅壽聯，若共圍咧，伊就袂去寒著。」伊就提著紅壽聯共竹叢細膩圍予好勢。按呢伊身上的三項祝壽的禮物拄好攏空去矣。
戇囝婿雖然失去全部的祝壽禮物，伊猶是快快樂樂繼續行，無偌久，來到一條小路，看到路中央有一垺屎，頂面歇一堆胡蠅，伊看著一个少年人行過去，胡蠅攏飛開，閣聽著這个少年人隨手吟講；「胡蠅圍規堆，看我來，飛甲離離離。」伊認為這是一句好詩句，就緊共記起來。
戇囝婿閣繼續行，行到一片田埔，看著一个作田的咧修理籬笆，就問講：「老阿伯，你哪無愛攏換新的。」其實是因為新籬笆無夠，無法度全部換新的，作田的只好先換一部份，因此，伊就應講：「新籬摻舊籬，暫時度日子。」戇囝婿嘛認為這是一句好詩句，也將伊記起來。
戇囝婿閣行到一个二條河交會的所在，一條是清水河，一條是濁水河，河頂徛一个咧看風景的老先生，拄咧吟講：「流水相仝，色水無。」伊聽了，誠高興，認為這是一句好詩句，嘛共伊記落來。
戇囝婿終算來到丈人兜，先到的人客，看伊戇，無愛共伊坐做伙，攏紛紛行開，伊就隨喙講：「胡蠅圍規堆，看我來，飛甲離離離。」人客聽了感覺歹勢，毋過想袂曉戇囝婿哪會變巧，會曉講這種剾洗話。
某驚伊毋捌禮數，早就佇伊頭前趕來後頭厝，伊共翁講：「壽宴欲開始矣，咱坐無仝桌，為著莫予人講你毋捌食飯的規矩，我會用一條線縛佇你的跤，另外一頭我搝咧，我若搝一下，你才會使攑箸食一喙，愛會記得，我搝幾下，你才食幾喙，按呢人才袂認為你毋捌食飯的規矩。」
一睏仔後，壽宴開始，親情朋友攏聚集踮大廳，逐个人攏按照事先安排的坐位坐好，逐个坐位桌頭也囥著安排好的新象牙箸，干焦戇囝婿的坐位，因為有人想欲創治伊，故意共囥一雙舊箸。戇囝婿看了，順喙講：「新籬摻舊籬，暫時度日子。」大家想講伊真正變巧矣，緊替伊換一雙新箸。
酒有好有䆀，高級酒是經過過濾的清酒，低級酒卻是猶袂過濾的濁酒。佇逐家敬酒的時，又閣有一个平時就看袂起伊的親情，共低級的濁酒，倒踮戇囝婿的杯仔內。伊看見逐个人的杯仔內攏是高級的清酒，干焦家己的杯仔內是濁酒，真無歡喜，就講：「流水相仝，色水無。」眾人這改大驚，免不了攏咧想；「戇囝婿才無看幾工，毋但變巧，閣會出口成章」，就馬上共伊杯仔內的濁酒換成清酒。
這時壽宴開始，山珍海味連紲捀上桌，戇囝婿一開始按照某的指示，規規矩矩的食飯菜，逐家更加認為伊變一个人囉，動作變甲誠斯文，真值得尊敬。
按呢過了一陣，拄好有一隻貓仔，軁入去桌跤欲揣菜尾，伊的貓仔跤聖聖予彼條縛佇戇囝婿的跤的線纏著，貓仔著急，想欲共線躘開，連紲躘幾若下，這時，戇囝婿以為是某咧指示，就連紲食幾若喙，當逐家拄咧想袂曉，戇囝婿哪會突然變甲遮粗魯時，彼隻貓仔因為無法度脫身，就拚性命躘彼條線，戇囝婿閣以為是某咧指示，也就拚性命扒飯夾菜，窒甲規喙。等到彼隻貓仔躘開線軁出來時，逐家才恍然大悟，接咧哈哈大笑，某也歹勢甲無地予覕。
逐家攏認為這是正常的戇囝婿，但是猶是想無，伊拄才的機智，是按怎來的。
沒有留言:
張貼留言