咱台灣對1895年到1945年，予清朝割讓予日本。佇日本統治的這50年中間，台灣人反抗日本政府的故事代代都有，其中上有名的，就是專門偷提日本人佮為富不仁的好額人，並共偷來的錢提去救濟艱苦人家的「廖添丁」，人人攏稱呼伊是「義賊」，伊是真真正正的「台灣之子」。
廖添丁是清朝人，出生於1883年5月15日，出生地是臺中大肚上堡秀水莊。八歲時老爸過身，老母改嫁，由阿姑撫養成人；台灣換日本統治的時，伊13歲；伊死於1909年11月18日，死佇八里坌的山洞，享年27歲。
廖添丁自細漢就幫人做散工、放牛。伊拜寺廟一个和尚為師，有閒時就認真學拳頭功夫，因為伊的體質袂䆀，練出一身好武藝。
廖添丁個性較孽、愛耍、神經較大條，有一改放牛的時，伊無注意，牛煞走去別人的田裡𧿬踏作物，田主人來討賠，頭家共伊詈一頓，伊就憤慨離開。後來伊佮同鄉的好友，做伙上北到基隆五堵，做修理鐵路的工人。伊逐工佇炎日跤，辛苦咧搬磚仔擔塗，閣時常予日本工頭罵。彼陣日本人是以統治者的姿態來管理台灣，共台灣當做下跤手人，毋但看袂起台灣人，甚至做仝款工課，日本人的薪水也比台灣人懸真濟。廖添丁看在眼裡，心內滿腹怨慼。
有一工，廖添丁咧做工時，突然間聽著鎮上「噹！噹！噹！」一陣摃鑼的聲音，有一隊日本警察押著三个犯人，一面摃鑼召集鄉人。無偌久，廣場就櫼滿看鬧熱的人，廖添丁躘一个身跳起廣場的一欉老樹，想欲看日本人咧變啥物蠓。
伊看著廣場跪著三个頭毛辮仔予人縛做伙的犯人。這時留著兩撇鬚的日本警察，氣怫怫咧宣佈犯人的罪狀：「這三个人是可惡的抗日份子，竟然敢偷襲警察局長的公館，局長下令，限時斬首示眾，以後誰敢抗日，就共的命運仝款。」講完，就下令行刑，三个人頭攏予人鏨落來。圍觀的民眾忍不住咧吐氣，也有人細聲咧哭。
廖添丁看著這个情景，非常憤慨，心內想；「恁遮的無惡不作的日本人，逐工干焦會曉欺負咱台灣人，予我廖添丁來教示教示恁。伊就對橐袋仔扲出一粒細粒石頭，對著洋洋得意的日本警察掔過去。「咻」一聲，只看著一道鮮血對彼个日本警察的額仔頂濺出來，伊疼甲頭殼𢯾咧哼哼叫，回頭看著樹頂佇遐哈哈大笑的廖添丁，馬上就逐過去。廖添丁看伊逐來，一下翻身就對大樹頂跳落來，走對大街去，一个轉彎就無看人。警察局長知影這件代誌了後，氣甲頓桌仔大罵：「飯桶，日本警察竟然逐袂到一个台灣囡仔。」就下令全面追捕廖添丁。廖添丁惹著這个禍端，也只好離開基隆走來台北。
來到台北的廖添丁，心想日本人一工到晚咧剝削咱台灣人辛苦趁來的血汗錢，我規氣來共伊偷轉來，提來救濟艱苦的台灣人。由於廖添丁的功夫厲害，真緊就招募一批意志相的兄弟，伊領導逐家去對抗日本政府。
從彼陣以後，廖添丁就四界做案，伊攏會佇偷過的所在留下一粒細粒石頭，通予人知影是伊偷提的。愈來愈濟的艱苦人家，也紛紛傳出半暝仔有人擲大筆金錢去救濟的故事。
日本警察漸漸也查出做案的人就是廖添丁，就四界貼告示賞金掠伊，但是台灣老百姓卻稱予伊為「義賊」，祈禱天公保佑，毋當予日本人掠著。廖添丁除了偷日本官員外，也偷提一寡苛頭的好額人，由於伊有飛簷走壁的功夫，行蹤飄忽不定，日本人佮好額人攏聞風喪膽。
大稻埕有一間大茶商，頭家為富不仁。1904年（廖添丁22歲）的某一工，廖添丁大大範範行入去彼間大茶商，講欲借寡錢。彼个頭家聽著來人是廖添丁，毋敢反抗，但是偷偷仔敲電話通報日本警察，無偌久，幾若名警察即刻傱來，共店門口團團圍咧。看著這个情形，廖添丁反應真緊，搝開屜，提銀票，順手拍開腰帶，幌起去厝楹仔，手搝腰帶就幌去窗外，走甲無影跡。幾工後，有人看著伊𤆬著大稻埕的藝旦阿乖踮台中廳踅街。
士林街有一个富商，明的是咧做茶米的生理，暗的卻咧買賣珠寶。伊真捌珠寶，但是誠無天良，定定欺騙善良的生理人，廖添丁看在眼內，心內憤慨，想欲揣機會共伊教示。1905年（廖添丁23歲）的某一工，廖添丁寫批予彼个富商，講欲買伊身上上貴的璇石。彼一工，廖添丁裝扮做一个大財主，毋捌禮貌、講話粗魯、態度壓霸，彼个奸商為著暴利，也忍氣吞聲。廖添丁提著奸商貴參參的璇石斟酌繩，一个無細膩煞落落塗跤，奸商兇狂共抾起來，一看，敢若毋是頭先提出來的物件，就懷疑予廖添丁偷換去，伊大聲要求欲搜查廖添丁的身軀，當然廖添丁也毋是彼好撚，無愛予伊搜查。雙方的人馬就拍起來，奸商一面佮廖添丁相拍，一面敲電話報案。
廖添丁最後假影予逼到樓頂，警察來矣，將廖添丁一陣人逮捕，搜查身軀，卻是揣無璇石，奸商只好向廖添丁會失禮：「歹勢！」閣賠廖添丁一寡錢。因為廖添丁是通緝犯，就按呢予警察關入籠仔內。毋過，廖添丁假影予人逼到樓頂時，就提出事先準備好的粉鳥，共璇石囥入去縛踮鳥仔跤的細跤袋仔內，放走去。毋免講，粉鳥最後猶是飛轉去廖添丁的舊岫，璇石猶原予廖添丁提去。
八里坌五股莊有一个時常收不義之財的保正。1909年（廖添丁27歲）的8月，廖添丁為著欲共教示，事先覕入去臺北廳大稻埕屠獸場警察廳宿舍，偷提警察的制服、手銃、銃子佮佩刀。11月伊就扮做日本警察，大大方方入去保正兜，大聲盤問收賊仔貨的代誌，保正一著驚，就緊交出幾百箍的烏西錢。這時警察聽著風聲也趕到位，但是已經看無廖添丁的影跡。
大稻埕林本源商行，主人林維源是台灣首富，伊擁有的金銀財寶不計其數，尤其一頂價值連城的皇冠，彼个頂頭鞏著璇石、紅寶石、藍寶石、綠寶石，囥佇林家金庫內。彼時林維源因為抗日的關係遠走廈門，厝內財產由大掌櫃掌管。這一工林家大掌櫃接著一張批，批頂寫講：「1909年8月20日暗時，廖添丁一定來提走林家的皇冠，恁就算通知日本警察也無要緊。順紲共你講，囥踮金庫是袂靠咧，請多注意，曷無被偷，後悔莫及！再見！」接著批了後的林家大掌櫃面色大變，兇狂敲電話去警察局報案。
8月20日彼暗，田中警官帶十外位警察來到林家。「我是警視廳的田中警官，這个客廳內、厝外攏有警察咧監視，請放心。」田中警官向林家掌櫃保證，林家大掌櫃才放心。「「囥皇冠的金庫是彼一个是毋？」田中警官指著厝角的金庫講。「是啊，就是彼个，平常時攏囥佇書房，但是明仔下昏暗欲予朋友看，所以共搬來遮。」林家大掌櫃想著廖添丁批中的話，為著欲確認皇冠是毋是猶安然囥佇金庫內，就講：「既然逐家攏佇遮，曷無先拍開金庫來確認一下，看皇冠猶有佇咧無，嘛較安心。」伊就拍開金庫，共內面的皇冠提出來囥踮桌頂，皇冠閃爍著各種寶石的光線，實在有夠媠。「哇！誠媠！」逐个警探攏不約而同發出讚嘆聲。
就在彼个時陣，突然間煞失電，房間一時暗眠摸，窗外紲落來閣響起幾聲銃聲，逐家著驚攏緊傱去窗仔邊，田中警官向窗外大聲叫講：「是按怎？」窗外的警察驚惶報告：「庭園的角落，出現一个黑影，對天頂開幾銃，開了就走去矣。」無偌久電就恢復矣，若像有人刁故意共電源切掉仝款。電來矣，林掌櫃煞大聲喝：「害矣！皇冠拍毋見矣！」拄才猶囥佇桌頂的皇冠，毋知影當時無去矣。無想著，佇遐爾嚴密的警戒中，皇冠猶是予廖添丁偷提走去。
原來廖添丁事前就覕佇天篷頂，當伊看著林家大掌櫃對金庫提出皇冠時，就向厝內的手下做信號，共電源開關切斷，另外一个手下，也同時向天頂開銃，來吸引林家大掌櫃佮警官的注意。予銃聲驚著的林家大掌櫃佮警官，齊齊走去窗仔門邊欲看究竟時，就佇彼个瞬間，廖添丁駕起伊驚人的飛簷走壁輕功，對天篷頂跳落來，手提皇冠，拍開大廳正門，就迅速旋走。
廖添丁一方面劫富助貧，同時也認捌一寡抗日志士，從事抗日活動。伊上痛恨是為日本人做代誌專門欺壓台灣人的台灣人，親像佇基隆做日本密探的陳良久。1909年9月5日，伊覕入去陳良久的公寓，將厝內的電火球仔放冗。陳良久彼暗轉來的時，行入客廳，就去揤電火的開關，但是電火袂著。伊想可能是吊佇天篷的電火球仔冗去，就徛起去椅仔頂，共電火球仔鎖絚，一下鎖絚，電火隨著，但同時一聲銃聲，陳良久就對倚仔頂跋落去塗跤，血流規四界，當場死亡。原來廖添丁早就覕踮窗仔外，瞄準電火球仔下面，電火一著，就馬上開銃，一粒銃子就解決陳良久的性命，
廖添丁一再犯案、逃脫，帶予日本警察真濟麻煩。日本警察就開始全面清查伊的親情朋友，只要佮伊有關的，全部按上罪名，掠去監獄行刑，致使後來無人敢閣佮伊來往。
廖添丁佇日本警察的全力追捕下，偷偷仔覕佇八里坌荖阡坑山區，並佮當地的壯丁團長劉分、楊興、楊林結黨。無偌久，劉分等予人掠去，供出廖添丁偷覕的所在。1909年11月17日，日本警方一面包圍廖添丁藏身的八里山區，一面透過廖的老朋友楊林，向伊放出警察已撤退的假消息。17日彼晚，廖添丁落山來找楊林，楊林就依照日本警方的指令共講日本警察已經撤離了，果然予廖添丁放下防備心，兩人甚至開講到天光。隔轉工（18日）透早廖添丁就緊轉去藏身的山洞歇睏，因為伊想欲趁彼暗的夜色轉去台中。楊林見機不可失，兇狂走去共保正佮劉分講，保正立即通報海墘厝派出所，巡查佮副巡查就馬上帶隊出發逮捕。楊林家己做嚮導行頭前，彼時拄好是早起10點。
當廖添丁發現楊林身後綴著兩个警察佮一批人馬時，知影去予楊林出賣，就隨時對楊開銃，無疑悟銃子卡牢咧，拍袂出去。死裡逃生的楊林為著自衛，就攑起身邊的鋤頭向伊的頭殼撼落去，廖添丁就按呢斷氣身亡。
廖添丁死了後，屍體對山上搬落來，沿路血滴袂止，日光照著閃閃爍爍，誠久才消失。彼日天氣焦燥，彼暗廖添丁蹛的猴仔洞飛出點點青光，直奔日警松本的官舍，無偌久，松本某佮查某囝攏精神失常。八里人攏認為是廖添丁的冤魂咧作怪，建議松本去廖添丁的墓祭拜.松本雖然百般無願意，但是為著某囝，最後猶是去共廖添丁下願欲替伊墓牌，果然，某囝隨就好起來。松本後來真實還願，替廖添丁墓牌，彼个墓牌就佇這馬台北縣八里鄉的漢民祠邊仔的添丁公園內，頂頭寫「明治四十二年十一月十九日 神出鬼沒廖添丁之墳墓 松本建之」。
自彼陣開始，廖添丁的名聲就更加響亮。廖添丁死3冬後，1912年（大正元年），日本人庄田（警部補退官）佮台北的「朝日座」戲院老闆高松，組一个改良的戲劇團，開始演出廖添丁的故事。廖添丁的故事就是佇按呢的群眾心理下，流傳大街小巷，廖添丁也變成人民的最愛，攏稱予伊「義賊」。
台灣廖添丁廟有三位，毋過猶是以臺北縣八里鄉訊塘村內的廖添丁廟上有名。八里鄉民真早就因為敬慕關公的忠義精神，建有關公廟一間，但是日本時代不准鄉民祭拜關公，致甲關公廟年久失修。民國時代，鄉民重建關公廟時，因為廖添丁的義行真感人，伊閣死佇八里，就共伊奉祀入去關公廟，改名做漢民祠。日後，廖添丁的香火愈來愈興，鄉民就改建漢民祠，正名為「廖添丁廟」。這馬的廟是三層樓，一樓主祀廖添丁，二樓關聖帝君，三樓玉皇大帝，廟邊猶有一座花園，會使予民眾歇睏。
沒有留言:
張貼留言