佛教講「善有善報，惡有惡報，毋是無報，時辰未到。」新約聖經馬太福音也講：「善樹結善果，惡樹結惡果。」人若行善，運途較按怎䆀，攏有上天咧保庇。
話講清朝光緒年初，咱台灣汐止有一个秀才名叫「李明」，伊為著欲參加三年一次的鄉試，謀取功名，逐工認真讀書。這工，鄉試的日子欲到矣，伊就依依不捨佮美貌的嬌妻「張氏」相辭，出發去福建參加鄉試。
無疑誤天不從人願，十載的寒窗苦讀，卻是換來「名落孫山」。看看身上的所費嘛欲開完，伊就決定冗早轉去，等待三冬後才閣來拚輸贏。當船佇台北淡水港靠岸了後，李明為著欲省所費，也無坐車，就對淡水港行轉去汐止。
這一工，李明來到一片稻田邊的樹蔭跤，感覺真忝，就坐落來小歇一下，涼風慢慢吹來，精神也漸漸恢復。伊目睭掠稻田四界看，煞看見一隻田螺，拄慢慢爬出來，踮水田裡，開始生田螺仔囝。這時，突然傱出一隻大田鼠，擘開大大的喙，欲食彼隻田螺佮遐的田螺仔囝。李明一時不忍心，就出手共田鼠趕走。人講：「田螺吐囝為囝死」，這隻田螺生囝了後，本來是會死矣，毋過伊卻佇欲死進前，佇田裡的漉糊仔糜頂頭，彎彎曲曲咧爬來爬去，最後才爬入去一蓬稻草死亡。李明一時好玄，就行過去看田螺爬過的痕跡，竟然若像是一寡歪歪斜斜的字，伊斟酌共看，敢若是：「龜橋不夜宿，油身不洗身；胡蠅踅筆頭，八堵康三辰。」伊雖然無啥知影其中的意思，猶是共彼二十字加唸幾遍，記佇心頭，才起身上路。
彼一暗，李明來到一个庄頭，叫做「龜橋」。伊本來想欲踮遮蹛暗，但忽然間想起彼隻田螺的詩句「龜橋不夜宿」。想講田螺既然會曉寫字，就罔共聽。佳哉天猶未足暗，伊就緊趕路，一直趕到隔壁庄頭才停落來過暗。伊一醒甲天光，透早起來，就聽著規庄咧喊，講昨昏暝一場大雨，龜橋因為山洪暴發，規庄攏予洪水淹去，村民佮精牲攏沖甲無影跡。伊聽一下，大喝一聲：「佳哉，有聽田螺的話，才無遭受著橫禍。」
隔轉工，李明繼續趕路，閣經過兩工的路程，終算轉來到汐止。伊行到厝時，天色已經暗，張氏馬上替伊燃一大桶的燒水，共燒水桶捾去後爿的浴間仔，欲予好伊洗身軀，共旅程的坱埃攏洗清氣，共旅程的疲勞攏洗挕捒。
李明拄咧褪衫準備洗身軀時，無張持共掛佇壁頂的番仔油燈挵倒，規身軀沐甲攏番仔油，伊掣一趒，煞想著田螺的第二句詩句：「油身不洗身」，就馬上共衫仔褲穿轉去，行轉去正房，對張氏講:「下昏暗傷忝，無想欲洗。」
毋過，艱苦人家，想著遐大桶的燒水，抨掉拍損，張氏就講：「你毋洗曷無我來洗，才袂糟蹋彼大桶的熱水。」伊那講那提欲替換的衫仔褲，入去浴間仔洗身軀。
過了誠久，佇正房的李明想著張氏入去浴間仔遐久矣，猶無出來，心內起疑，喝講：「喂，曷你是洗好矣袂？」伊連紲喝幾若聲，攏無人應，感覺奇怪，就攑著鼓仔燈，衝衝碰碰行去浴間仔看覓。一入去浴間仔，伊驚一下險破膽，原來張氏毋知是按怎赤身裸體，倒佇塗跤，後腦必一大巡，鮮血流甲滿四界。
無過半个時辰，這个消息就傳遍規个縣城，衙門嘛聽著風聲。知縣馬上派捕快前來，共李明押走。認為伊一轉來，張氏就死，一定是伊謀害的。毋過無證無據，李明也一直毋肯認罪，後來因為袂勘得酷刑，想講橫直攏愛死，就規氣共罪認認咧。
知縣看李明認罪矣，心內真歡喜，就提毛筆，搵墨汁，準備欲寫判決書。就在這个時陣，一隻紅頭大胡蠅飛過來，佇筆頭一直踅，致使知縣無法度下筆。知縣只好正手攑筆，倒手空出來搧胡蠅。哪知胡蠅一搧開就閣飛倒轉來，就是無法度共紅頭大胡蠅趕走。拄著這種代誌，知縣嘛感覺真奇怪。
跪踮案前的李明，看在眼裏，就共知縣講伊佇轉來的路上，曾經救過一隻田螺的代誌，並將彼四句詩句寫出來。前二句予伊會當避過災禍，第三句「胡蠅踅筆頭」，佮這馬的情形仝款，只是上尾句「八堵康三辰」，毋知是啥物意思？
知縣聽了，感覺李明所講的，也有道理，即時命令捕快到隔壁庄的八堵，調查看有人叫做「康三辰」無？過了一工，捕快回報，果然有一个刣豬的，叫做康三辰，毋過伊的品行無講蓋好。知縣就交代捕快，將伊押轉來。康三辰口口聲聲嚷冤枉，毋過最後擋袂牢酷刑，猶是共所有的代誌攏講講出來，認罪畫押。
原來這件代誌的起因，是康三辰早就數想張氏的美色，兩人也早就互相意愛，只是苦無機會做伙。等到李明去福建參加鄉試的時，康三辰就不時送豬肉予生活艱難的張氏，自按呢開始明來暗去，後來甚至三不五時就去張氏厝裡過暝。毋過，若欲過暝，伊攏會選佇入暗之後才去，天袂光就離開，因此，厝邊隔壁，攏無人看出來。
這工康三辰聽著李明轉來，就心生惡念，想欲趁李明彼暗洗身軀時，共伊刣死，啥知佇烏暗中，刣毋著人，煞刣死著張氏。知縣審知實情，就判康三辰死罪。
康三辰死了，留一个媠某，而李明某張氏也死了，知縣就好人做到底，共康三辰某配予李明，共康三辰的財產攏判做嫁妝。這對翁仔某同病相憐，也特別珍惜這个姻緣，恩恩愛愛過了一世人。
沒有留言:
張貼留言