台灣俗語故事：第三好馬俏哥

＊＊＊揤遮就會當看著無亂碼的文章

較早台灣俗語講艋舺有三寶：「第一好張德寶，第二好黃阿祿嫂，第三好馬俏哥。」「張德寶」是艋舺首富張秉鵬的商號，咱講過伊的故事（台灣民間故事：第一好張德寶）；「黃阿祿嫂」是「黃阿祿」某，是艋舺企業界的大姊頭仔，咱嘛講過伊的故事（台灣民間故事：第二好黃阿祿嫂）；這馬咱就來講第三好「馬俏哥」。

「馬俏哥」本名是「王則振」，小名「馬俏」。伊是「王義德」的囝。「王義德」是泉州晉江人，原任五品官，因故辭官，於嘉慶17年前後，渡海來台灣發展。伊成立「王益興商號」，做泉州佮艋舺兩地的對口貿易生理（彼時叫做「郊商」），變成船頭行的富豪。王義德真注意地方的社會福利佮治安維持，並因此得著清朝封賞二品頂戴花翎，伊過身時閣追封奉直大夫。

王義德的大囝「王則樹」早死，王義德過身了後，馬俏哥繼承家業。伊做人豪爽、有義氣、有老爸的風範。伊看著當地無後嗣的人曝屍荒野，於心不忍，就聯合幾个較有名的郊商設立「同仁堂」，專門替無後嗣的人抑是散凶人做安葬的代誌；看著飢荒的時，老百姓面黃肌瘦，攏無通食，就設立「義倉」，救濟飢荒，也通捐米予散凶人；看著賊偷橫行、族群械鬥，就設立「隘門」，來防範賊偷佮隔開族群，以保障居民的安全；看著無錢人挕捒的飼袂起的紅嬰仔，就設立「育嬰堂」，專門收養棄嬰或者是散凶人的紅嬰仔。遮種種的義行，對艋舺社會是一項真大的貢獻，佇地方上得著真好的名聲，因此，有「第一賢，馬俏哥」的美名。

馬俏哥阿嫂「黃叫娘」，二十八歲時就喪夫，夫死守寡四十六年。馬俏哥為欲替寡嫂爭取節孝牌坊，透過地方官上奏，總算佇光緒 8 年（1882年）奉旨興建節孝牌坊。牌坊原來佇臺北府城東門內，日治時代徙到臺北新公園（這馬的二二八和平公園），這馬是臺北市市定古蹟，古蹟名稱：黃氏節孝坊。

馬俏哥除了急公好義，嘛真厚詼頦。囝欲娶「吳源昌商行」主人（小名「吳阿抄」）查某囝時，伊就故意共吳家創治。話講，吳家真重視這个婚禮，備辦誠豐沛的嫁粧，牛車陣拖袂了。馬俏哥嘛無認輸，送出一个誠大跤的沈香柴箱做聘金，包裝甲媠噹噹。誰知吳阿抄拍開了後，內底竟然干焦囥一个較細跤的柴箱，嘛包裝甲媠噹噹，吳阿抄繼續拍開落去，猶有第三層、第四層。。。拆開到最後，才看著一跤細細跤仔的柴箱，內底囥一圈佛頭銀幣。吳阿抄看一下大怒，氣怫怫走到王家問罪。馬俏哥趕緊會失禮，提出早就準備好的黃金、白銀、翡翠、瑪瑙等頂真正的嫁粧，哈哈大笑講：「親家莫受氣，佮你滾耍笑的。」後來，艋舺就出現一句俗諺：「氣死吳阿抄，笑死王阿老」（王阿老也是馬俏哥的小名），來供體愛創治人的人。又因為一圈佛頭銀幣價值無夠一兩銀，閣流傳一句孽譎仔話：「吳源昌的千金---無價值一兩銀」，供體無價值的物件。

馬俏哥王家傳到這馬已經第七代，徛佇艋舺頂新街（這馬的西昌街）的船頭行王益興商號，原來是五進的大厝，日治時期道路拓寬，改做「恆安醫院」，干焦留第二進的柴門斗佮外牆。這馬由臺北市政府登錄為「歷史建築」保存，開放民眾參觀。歷史建築名稱：艋舺王宅二進遺構。

註：故事脫胎自本原稿

＊原稿一　＊原稿二