這馬咱攏知影海水是鹹的，因為海水內有真濟鹽份。其實，海洋拄形成時，海水佮江、河、湖水仝款，攏是汫的，只是後來雨水共岩石佮塗壤沖到江裡、河裡、湖裡，閣繼續沖去大海。遮的岩石佮塗壤內的鹽份就按呢積佇大海，使海洋中的鹽份一直增加；另外，海裡的水份予日頭曝甲漸漸消蝕，也予海水的鹽份愈來愈重。這兩个原因才致使這馬的海水變甲鹹篤篤，這是科學的見解。毋過，有關海水是按怎變鹹的，咱台灣嘛有流傳一段真有意思的故事。
真久真久以前，台灣某一个庄頭，蹛有兩个兄弟，阿兄叫做安鴻，誠兇惡、上痟貪，小弟叫做安仁，卻真仁慈、誠善良，阿兄時常欺負小弟。兄弟佇阿爸過身了後，咧分家的時，阿兄共厝內所有的物件，攏分予家己，干焦留一枝斧頭，予小弟。從此以後，小弟就靠彼枝斧頭為生。
安仁逐天攏帶著斧頭去山頂剉柴，閣共剉好的柴，擔去城裡賣，換轉來一寡鹽、米、醬、醋通過生活，生活過了誠艱苦。有一工，伊剉柴剉了忝矣，就覆踮石頭頂睏去，煞做一个夢。伊夢見一个頭毛白蔥蔥的老神仙，對伊講：「我是石神，我知影你做人真仁慈、真老實，閣安貧樂道，所以我欲幫贊你變做一个好額人。你愛詳細聽：佇這粒山的山頂，有一个山洞，裡面蹛有幾个妖怪。山洞頭前有一扇門，你若喝講：『石頭門，拍開！』門就會主動拍開。毋過你愛會記得，欲入去山洞進前，愛準備一籃仔的紅龜粿，送予洞內的妖怪食，食飽，想欲報答你時，你毋通痟貪別項物件，只要講你愛洞裡的一个石磨就好了。彼个石磨是寶貝，你想欲挃的物件，伊攏會使磨出來。欲愛物件的時，只要喝講：『石磨！石磨！磨一寡XX予我！』，伊就會共XX磨出來；磨了有夠矣，只要喝講：『有夠矣』，石磨就會自動停止。對洞裡出來的時，愛會記講：『石頭門，關門！』石頭門就會家己關門。我的話講了矣，你愛緊記在心。」
安仁精神了後，才知影家己原來咧做夢，伊半信半疑，想講明仔載來共試看覓，就趕緊轉厝做一籃仔的紅龜粿。第二工，天猶袂光，伊就捾著彼籃的紅龜粿，行到山頂揣石門。果然揣著一个山洞，洞口有一塊大石枋封牢咧。安仁連忙喝講：「石頭門，開門！」彼个大石枋就慢慢拍開，露出一个大山洞。安仁真歡喜行入去，洞愈來愈大，最後連到一間富麗堂皇的宮殿。宮殿內有獨角的、三眼的、紅毛的、青面的，十花五色的妖怪。看著生份人入來，就將伊團團圍住，對伊生狂喝咻，若親像欲共伊拆食落腹。
安仁一點仔都無驚惶，伊緊共紮來的紅龜粿，分予食，妖怪真歡喜提去食，食了，就問伊：「多謝你的紅龜粿，真好食，阮想欲送你一寡金銀珠寶。」「我無愛珠寶，只愛一个石磨。」安仁講。妖怪聽了愣一下，參詳一陣，就答應伊。妖怪去搬出一个石磨予安仁，伊向妖怪說多謝後，就共石磨揹起來行出洞口，喝一聲：「石頭門，關門！」彼个石頭門就自動關好門。
安仁轉到厝，感覺腹肚真枵，就對石磨講：「石磨！石磨！磨一寡飯佮酒菜予我！」石磨果然開始轉振動，好食的飯佮山珍海味的酒菜，一道、一道紲咧磨出來，擺滿規桌頂。安仁看看有夠矣，就講：「有夠矣！」石磨就停咧無閣遨矣。伊閣叫石磨磨出誠濟的白米佮金錢，通提去救濟村裡的艱苦人家。自按呢，伊欲愛啥就有啥，家己也漸漸變做一个大好額人。
阿兄聽著這个消息，也怨妒也欣羨，就揣一工半暝，偷偷鑽入去安仁厝裡，看著安仁提出石磨，喙內唸：「石磨！石磨！磨一寡白銀予我！」石磨馬上就轉起來，磨出源源不絕的白銀，過了一睏，安仁喝講：「有夠矣。」石磨就停咧無閣遨矣，白銀也無閣流出來。紲咧，小弟閣叫石磨磨出真濟白米。阿兄看了，知影這个石磨是寶貝，就將叫石磨磨物件的咒語，記踮心頭，開始想方法欲共偷提到手。
第二工，安仁帶著遐的白銀佮白米，去救濟村裡的散赤人。阿兄趁這个機會，共石磨偷提出來，共伊搬去囥佇海邊的一隻小船仔頂，閣馬上駛著彼隻小船離開。船隻咧航行時，阿兄那想：「欲按怎馬上發財？」伊想著鹽是人人需要的物件，若用這个石磨磨出無窮盡的鹽，一定會當發大財！」
阿兄就大聲喝講：「石磨！石磨，磨寡鹽予我！」果然鹽就一直對轉動的石磨內流出來，真緊規隻船內攏是鹽。毋過，痟貪的阿兄猶無滿足，繼續予石磨一直磨，最後船實在載袂落了，阿兄才心不甘情不願的欲共石磨叫停。毋過，伊一下緊張，煞共叫停石磨的咒語放袂記得，只會當目睭金金看著石磨繼續磨鹽，最後，鹽超過船隻的載重量，阿兄就連船做伙沉到海底。
阿兄淹死矣，但是沉佇海底的石磨猶閣繼續磨鹽。就是按呢，這馬海水才會變甲遮爾鹹。
沒有留言:
張貼留言