較早台灣俗語講艋舺有三寶：「第一好張德寶，第二好黃阿祿嫂，第三好馬俏哥。」其中，「張德寶」是艋舺首富「張秉鵬」的商號。張秉鵬自少年時對福建泉州單身來到艋舺，佇船頭行學師仔，20歲時有儉一寡本錢，開始投資做進出口生理，佇海上予海賊掠去，到最後家己創業，累積真濟財產，這个致富的經過，實在是真神奇，咱這馬就來講伊的故事。
話講清朝咸豐年間的福建泉州，張秉鵬因為爸母早死，無留啥物財產，只好踮街頭流浪，忝的時，就轉去土門街的關帝爺廟，䖙佇廟前的石獅歇睏。
有一工，伊佇街頭拄著一个相命先生，伊那想：「家己羅漢跤一個，散甲欲予鬼掠去，哪毋請伊相看覓？看啥物時陣才會當出脫！」那摸橐袋仔，發現猶有三个銀角仔，就歹勢歹勢問講：「先生，我干焦賰三个銀角矣，毋知會當請你替我算一个命無？」「好矣！」相命先生共伊的面斟酌看一陣，講：「予我看你的倒手。」張秉鵬共倒手伸出來，相命先生共伊的手詳細看一站仔，講：「你的命真好，可惜有財無庫，正手趁入來的錢，倒手就開出去。你若會曉儉，你的財產，會真驚人喔！」
「唉！」張秉鵬吐一口大氣講：「敢有啥物補救的辦法？」「有是有的，只驚你無願意。」相命先生應講。「我啥物攏願意，只要會當發財。」張秉鵬一點仔都無躊躇隨應講。「我有一个查某囝，伊的命拄好佮你相反，有庫無財。你若肯做我的囝婿，一个有財，一个有庫，趁來的錢守會牢，財運就順矣。」
張秉鵬做夢也想袂到相命先生竟然欲愛伊做囝婿，伊當然願意，會當了結孤單的生活，閣會當免受枵受凍的苦楚，這種好空，實在是求之不得！張秉鵬就按呢做了相命先生的囝婿，蹛佇相命先生的厝裡，無閣四界流浪，食會飽，閣有某陪伴，伊感覺真滿意。
成婚無到一個月，丈人對伊講：「你的發財命，毋是佇家鄉，是佇他鄉，踮厝裡是無前途的，錢袂家己對天頂落落來。」「佇他鄉發財？」張秉鵬一百个無願意離開這馬的安適生活，就按呢問。「是啊，你愛去他鄉才會發財，而且是去南爿。」丈人講。「南爿？南爿毋是海？」張秉鵬應講。「是矣，就是佇海彼爿的台灣。」丈人鐵口直斷講。「去台灣愛坐船？我毋敢坐船。」張秉鵬毋願去。「你欲發財，一定愛去！」丈人真生氣講。張秉鵬毋敢違背丈人的意思，只好收拾行李，放下新婚的嬌妻，坐船來到這个遍地是黃金的台灣。
伊佇艋舺上岸，予人介紹到一間商行做廚子，煮飯予商行十幾个人食，一個月的薪水是兩箍銀。張秉鵬第一改出外做工，有食閣有蹛，逐個月閣會當領兩箍銀，伊感覺若發財仝款，心內真歡喜。因為伊忠厚老實，工課認真，誠得著商行主人的信任，薪水也就慢慢提懸到四箍銀。張秉鵬一個月干焦需要幾仙錢的所費，因此月級差不多攏賰落來，三、四冬了後，伊就儉一大筆錢。彼時，有寡朋友，來往天津、北平、台灣做生理的，看伊有錢，就鼓舞伊投資，伊就共數年來的粒積，攏提出來投資。
彼時，中國沿海一帶海賊橫行，其中尤其是蔡牽，實力上大，時常佇台灣海峽出沒，誠少有船隻會當逃過伊的手頭。因此，只要會當對中國成功運回貨物的，彼就大趁。張秉鵬投資的彼批貨物，真好運無予海賊搶去，因此利純真懸。伊第一擺投資就趁誠濟，愈增加伊的投資興趣，就繼續佮朋友合股，做進出口的買賣，本錢也愈來愈粗。
商行主人看張秉鵬骨力閣拍拚，除了信任以外，閣加器重佮愛護，共伊升做行員，逐改去天津、北平辦貨的時陣，攏會𤆬伊做伙去，增加伊的經驗佮歷練。
有一改，商行主人欲去天津買貨，船隻攏準備好，拄欲出發時，主人突然有別的代誌愛辦，袂當啟行，就對張秉鵬講：「這改我拄好有代誌，袂當去，予你全權負責，我相信你會做甲真好。」張秉鵬接受著行主的委託，押著空船向天津出發，一路提心吊膽，驚若出代誌，會去辜負著行主所託。毋過，當買好貨轉來，佇欲靠近虎尾港時，竟然予蔡牽的部下發現，幾若隻賊船逐過來，把張秉鵬的船劫去，張秉鵬佮船員攏變成俘虜，關佇大屯山跤的賊窟。
張秉鵬佇賊窟裡，心情真痛苦，尤其是當月娘正圓，四界寂靜的暗時，伊就望月吐氣，想著這改是受行主重託，煞袂當共貨物順利運轉去，忍袂住兩逝目屎滴落來，怨恨講：「唉！想袂到我張秉鵬會辜負著行主的重托，按呢哪有啥物面目轉去見行主。」想袂到伊這聲絕望的吐氣聲竟然引出了一个救星，改變了伊的命運。
原來，蔡牽某因為思念泉州的爸母，拄仔𤆬著查某囝佇外口散步解悶，聽著張秉鵬的泉州口音，就入來看詳細，一下問咧，才知影張秉鵬是後頭厝的遠親。彼晚，伊就共原由講予翁知。蔡牽一聽著彼个船主是家己的內孫仔，當然袂使劫伊的物件，就共張秉鵬佮所有的船員攏放出來，送還的船佮規船的貨物，同時提出一枝黃旗對張秉鵬講：「以後佇海上航行，只要共這枝旗子插踮船頭，就無人敢來攪擾你。」
張秉鵬以後佇海上行船，若拄著海賊，就共彼枝旗子提出來擛兩下，遐的海賊看著伊擛的是蔡牽的旗，越頭就走，無人敢閣來共伊。「哎喲！真正得著寶。」張秉鵬大聲喝。從此以後，伊就無閣叫張秉鵬，改叫「張得寶」，轉音做「張德寶」。
由於佇海上通行無阻，張德寶就愈捷佇天津、北平、台灣之間，做進出口生意，生理也愈做愈大。後來張德寶就辭去行員的職務，創立「張德寶商號」，獨家經營，幾年爾爾，就變成艋舺的首富。
張德寶的發跡，雖然有一寡稀奇，但主要猶是靠伊家己忠厚、老實閣骨力、拍拚，才有機會出脫，彼才是值得咱少年人學習的。
註：故事脫胎自本原稿
沒有留言:
張貼留言