「黃阿祿嫂」是「黃姜」的新婦。黃姜是福建泉州晉江人，對晉江的潘湖移民到艋舺，於清朝嘉慶庚辰廿五年（1820年）五月七日生「黃昭祿」，又名「黃阿祿」。黃阿祿雖然生了巧閣有力，但是規工閒閒無代誌，干焦愛佮人冤家相拍。
清朝道光年間，艋舺是一个水陸碼頭，佮中國間的航運真頻繁，因此，生理人攏愛聚集到遮來，真緊艋舺就變成一个台灣物產外銷的大港口。佇這个繁華的大港口，自然會有一寡大生理人，規工絞盡腦汁，想空想縫欲趁錢，有時為著一屑仔利純，嘛爭甲你死我活。暗來，遮的生理人，攏會想欲放輕鬆，改換心情。大生理人有這个需求，自然就有人會提供相所需要的服務。因此，離龍山寺無蓋遠的所在，就開始出現歌樓、舞廳、酒店，提供遐的大老爺需要的刺激。彼時，黃昏一到，艋舺街頭燈紅酒綠、十花五色、挨來捒去、歌舞通霄，真正是紙醉金迷。
咱單講其中有一間酒店，駐有一个紅牌酒女，號做小萍，姿色真出眾，接接人客真有手段，只要佮伊啉過酒的，誠少無去予伊煞著，佮意伊的生理人，濟甲窒倒街。其中有一的姓林的生理人，因為太佮意伊，就倩三个鱸鰻，共伊顧牢牢。若有別人去叫小萍坐台，伊就會想盡辦法予人知難而退。老娼頭見看彼三个鱸鰻，目頭就結結，驚影響著生理。
有一工暗時，一个蹛佇淡水廳的黃姓富商，大概是錢趁傷濟矣，無地通開，就坐船渡過淡水河來艋舺揣刺激，由老鳥𤆬路，來到彼間酒店，揣小萍坐台。這聲害囉，林姓大生理人知影了後，就放刁欲予伊好看。伊叫彼三个鱸鰻，張踮江仔翠，等黃姓富商離開酒店，欲轉去厝，經過江仔翠時，共伊拍死，按呢林姓生理人就會當獨佔小萍。老娼頭聽著風聲，大驚一著，想講若鬧出人命，生理就免做的，就暗中吩咐彼時佇酒店做保鑣的黃阿祿，一定愛保護黃姓富商平安轉去厝。
黃姓富商佇酒店佮小萍花天酒地，食甲半暝，總算欲轉去矣。老娼頭就緊叫黃阿祿陪黃姓大老爺轉去。當經過江仔翠時，彼三个鱸鰻忽然間對路邊的草欉傱出來，拳頭捏甲欲出汁，想欲當場共黃姓富商拍死。黃阿祿奉命保護黃姓富商，哪敢怠慢？馬上就閘踮富商的頭前，佮三个鱸鰻拍起來。黃阿祿高長大漢，跤手猛掠，無幾回合就共對方拍甲東倒西歪，起跤拚性命走。黃姓富商就按呢有驚無險平安轉到厝。伊真感謝黃阿祿的保護，就予伊一百兩銀，做為報酬。
黃阿祿白白趁著這一百兩銀，一時煞毋知欲按怎用。伊想講這遮爾難得，而且一百兩銀也毋是一个小數目，一定愛好好仔利用才會使。經過多方的詢問，黃阿祿就綴一个黃姓鄉親，做樟腦油出口佮福州杉進口的生理。對臺北三峽、大溪、新店等等所在剉樟仔、製作樟腦油、運到福州，然後購買福州杉轉來台灣賣。聽講，彼時，臺灣巡撫劉銘傳當咧鋪鐵路，伊所用的枕木，攏是黃阿祿提供的。由於對朝廷的貢獻，黃阿祿得著朝廷的封賞，對奉政大夫封起，最後封到正二品資政大夫。
當然，黃阿祿的收入毋但按呢，伊猶佇妓院佮筊間做保鑣或者是收保護費，所以，干焦三、五冬的時間，黃阿祿就變成地方上的一个小財主。拄好彼時艋舺有一間製作樟腦油的加工廠，因為薪水發袂出去，頭家管袂牢工人，無想欲做矣。黃阿祿聽著這个消息，就提出一寡本錢，共彼間工廠買落來。伊共欠工人的薪水還清，予工人會當安心綴伊作穡。幾年落來，佇黃阿祿佮某的拍拚經營下，這个樟腦工廠也替伊趁袂少錢。
用錢趁錢果然較緊，無偌久，黃阿祿又閣開拓一項新事業，彼就是佇這馬萬華的環河南路，新起一座大樓，叫「萬順料館」，做木材加工的業務，生意嘛誠興旺。
彼時，黃阿祿佇艋舺會當講「喝水會堅凍」，有任何糾紛，伊一句話往往就會當解決。真可惜，當伊事業正紅的時，竟然佇同治丙寅五年（1866年）四月廿七日，染病死亡，享年47歲。
黃阿祿過身了後，囝兒猶細漢，一時無法度傳事業，只好交予某「黃阿祿嫂」接班。佳哉，黃阿祿嫂猶少年，身體勇健，頭腦閣好，做事業的企圖心無輸翁。自伊開始打理樟腦工廠佮木材料館的生理後，事業也做甲真順手、真順序。
黃阿祿嫂予人上欽佩的所在就是伊𠢕管理工人。伊一面提拔有能力的員工，共分級，去管理工廠，一面厚待屬下，予會當安心踮工廠做工，因此，所有的員工對伊攏口服心服、呵咾甲會觸舌。聽老大人講，伊彼陣手下有十八名的工頭，逐个攏是武藝高強、生理誠精的人才，人稱「十八王爺」。佇逐家同心協力下，萬順料館的規模佮生理，竟然比黃阿祿在世時，更加興旺。
黃阿祿嫂真濟代誌嘛攏親力親為，逐改上山剉樟仔、運送樟仔，伊攏親自坐陣。伊佮員工盤山過嶺，去精選樟仔材，製作出來的樟腦，攏是上品，外銷市場愈拍愈闊，黃家的產業也愈做愈大。艋舺彼時有三大碼頭，黃家擁有大溪口第一水門邊的第一碼頭，稱霸一方。多年來的用心經營，終算予黃家變成艋舺數一數二的大富豪。
黃阿祿嫂是一个了不起的企業人才、女中豪傑。伊的精神毅力，超過翁。伊的得力幹部「十八王爺」，有半數佇山地，半數佇工廠，共樟腦油的整個生產流程，對高山剉樟仔、運送到平地、入料到工廠、工廠加工、成品出貨，攏一貫化、制度化，黃阿祿嫂只要掌握流程的進度，「十八王爺」自然會共工廠管理甲好勢好勢。伊經營彼站，台灣獨有的樟腦油品質優良，自然逐冬攏大趁錢。
黃阿祿嫂佮翁仝款，熱心公益，時常救濟散赤人。彼時的黃氏宗祠，聽講攏是伊一个人捐建的。黃阿祿嫂活甲1900年才棄世，伊佮翁留落來的樟腦事業，後來予日本人充公了後才沒落。
註：故事脫胎自本原稿
註：故事脫胎自本原稿
沒有留言:
張貼留言