＊＊＊揤遮就會當看著無亂碼的文章
聽講足早以前，佇台灣的某一條河流內底蹛著一个水鬼仔，伊為著欲早日離開彼的冰冷的水底，通轉世投胎，逐工攏想盡辦法，欲搝一个活人淹死踮水裡做伊的替身。但是彼的所在真偏僻，真少人經過，伊一直揣無替身。雖然，有一个討海人，時常踮遐掠魚，但是伊真機警，水鬼仔就是掠伊袂著。
聽講足早以前，佇台灣的某一條河流內底蹛著一个水鬼仔，伊為著欲早日離開彼的冰冷的水底，通轉世投胎，逐工攏想盡辦法，欲搝一个活人淹死踮水裡做伊的替身。但是彼的所在真偏僻，真少人經過，伊一直揣無替身。雖然，有一个討海人，時常踮遐掠魚，但是伊真機警，水鬼仔就是掠伊袂著。
水鬼仔總算想著一个辦法，佇討海人拋網掠魚的時，暗中共魚仔趕走，討海人拋規工的網，猶掠無魚，天色漸暗的時，水鬼仔就趁討海人頕頭看網無小心的時，用力一下搝，共討海人搝落水，紲咧閣用力共揤踮水裡。過一站仔，水鬼仔看討海人袂振袂動矣，歡喜甲大聲叫起來：「哈哈哈！我總算掠著替身囉。」水鬼仔趕緊共身上的鬼仔牌插踮討海人身上，然後歡歡喜喜走去閰羅王遐交數。誰知討海人精通水性，只不過是假死而已，等水鬼仔一咧走開，伊就紮著彼枝鬼仔牌轉去。
水鬼仔走到閰王府，喙笑目喙對閰羅王講：「我總算揣著替身矣，這馬我會當順利去投胎囉！」無想著閰羅王煞開喙大罵：「你這个糊塗鬼，予討海人騙甲玲瑯踅猶毋知，趕緊去共你的鬼仔牌討轉來！若無這世人免想欲投胎做人。」水鬼仔聽一下掣一趒，就生生狂狂趕轉去水裡，毋過討海人早就紮著伊的鬼仔牌轉去矣。
六神無主的水鬼仔揣到討海人厝，用可憐的目神對討海人講：「求求你，討海人大哥。請你共鬼仔牌還我，若無我會永遠無法度投胎轉世矣，求求你！」水鬼仔那講那哭。討海人聽著水鬼仔的哭聲心落軟，就講：「好啦！我共鬼仔牌還你，但是你愛對共我搝落水這項代誌做補償，以後你著愛逐工共魚仔趕來我的魚網仔內底才會使。」水鬼仔感激萬分，連聲講：「好好好，我一定逐工共魚仔趕入去你的魚網仔內。」按呢，討海人才開門共鬼仔牌還予水鬼仔。
從此以後，討海人出去拋魚的時，水鬼仔就會踮河裡四界泅，共魚仔趕入去魚網仔內底，予漁夫滿載而歸。討海人看著水鬼仔逐工孤單踮河裡生活，心內也艱苦，他就定定準備一寡酒菜，請水鬼仔到厝裡來吃飯開講，日子一久，煞變成好朋友。
有一工，水鬼仔忽然來佮討海人相辭：「明仔載有一个老阿婆會來河邊，我想欲掠伊做替身。」討海人勸水鬼仔講：「老阿婆年歲大矣，哪好予伊死踮水裡？而且咱感情遮爾好，你走矣，誰會當幫我拋魚！」水鬼仔感覺嘛有道理，就決定等三冬後才閣講。
過了三冬，水鬼仔又走來共討海人講：「明仔載有一个查埔囡仔會來河邊耍水，我準備掠伊做替身，你袂使閣勸我，水內的生活毋是遐好過咧！」第二工討海人佇河邊拋魚時，果然看著一个古錐活潑的查埔囡仔，欲落去耍水，討海人不忍心伊去予水鬼仔掠去，就趕緊共伊趕走。
彼暗，水鬼仔來到討海人厝開喙就罵：「討海人大哥，你嘛傷無夠朋友，為啥物欲破壞我的好事？」討海人早就想著水鬼仔會生氣，準備了一桌酒菜向伊賠罪講：「水鬼仔老弟，我也無想欲看你一直做水鬼，但是一看著查埔囡仔天真活潑的模樣，我就是不忍心伊死踮水裡，所以才共伊叫開，你莫怪我。」水鬼仔想想咧，氣也慢慢消矣。
又過了幾冬的某一暗，水鬼來到討海人厝，表情凝重講：「討海人大哥，這回我是真正愛來走囉。你愛多多保重！」討海人著一驚，問伊原因，水鬼應講：「張大嫂佮翁冤家，明仔載會來跳河自殺，這回我會當掠伊做替身囉。」討海人聽了驚一趒，張家是伊的厝邊，哪會當見死不救！討海人心內真是左右為難。第二工，討海人實在不忍心，猶是趕去河邊，遠遠就看著張大嫂那哭那對河裡行去，討海人趕緊傱去共搝咧，救伊上岸。
這一暗，水鬼仔閣來矣。討海人見著水鬼仔，心內感覺非常抱歉。水鬼仔恬恬無講話，規半工才開喙：「你的心肝好，不忍心看人落水淹死。咱既然是朋友，我也袂怪你。」就按呢，閣做伙掠魚，做伙食飯啉酒開講，過著平靜的日子，水鬼仔也無閣想欲害人，掠替身囉。
這一工暗時，水鬼仔來揣討海人，這回是歡頭喜面來佮討海人相辭：「討海人大哥，這回我真正欲離開矣！」討海人著驚講：「你佇遮過了好好，哪欲走？」水鬼仔應講：「玉帝知影我這十幾冬來攏無害過人，決定封我做本地的城隍，我明仔載就欲上任矣，所以今仔日特別來相辭。」水鬼仔提出幾塊銀兩送予討海人講：「若毋是你幾落遍阻止我害人，我哪有今仔日？這馬我袂當閣替你趕魚仔，遮的銀兩是我的一點仔心意，你提去做小生理，袂閣掠魚矣。」討海人聽了，也替水鬼仔歡喜。彼下昏暗，就歡歡喜喜吃飯啉酒開講，天咧欲光時，水鬼仔才起身相辭：「討海人大哥，毋通袂記得來廟裡看我，我會好好招待你。」
第二工討海人特別去城隍廟，果然看著進前的水鬼仔已經變成城隍爺，城隍爺也特別出來迎接，兩个兄弟快樂食一頓腥臊了後，討海人向新的城隍爺的神像拜三拜，然後快快樂樂轉去。
沒有留言:
張貼留言