咱這馬攏知影雷公佮電母是做伙出現的，雷公霆雷進前，一定有一道閃電爍過。毋過，古早以前並毋是按呢！
古早時，干焦雷公一个人負責霆雷，因為霆雷進前無一點仔影跡，人踮田裡作穡，定定袂赴覕，去予雷公摃死。電母是佇雷公誤殺一个查某囡仔了後，才出現的，咱這馬就來講這段故事。
傳說足久以前，有一个真歹命的查某囡仔，出嫁了無偌久，翁就過身，兩人無留下一男半女，伊猶是無閣再嫁，專心咧侍候年邁的大家，兩人相依為命。彼陣的日子真艱難，但是伊真儼硬，無暝無日作穡，總算會當勉強過日，無去予枵死。
有一工，大家破病，喙裡嫌無味，想欲食肉。已經真久無食過肉矣，厝裡散甲欲予鬼掠去，哪有錢通買肉。伊共規厝內反透透，也揣袂出一件值錢的物件通變賣，今欲按怎？伊急甲大力拍一下大腿，這下煞提醒著伊，家己身軀頂猶有肉，毋過身軀摸摸，長期營養不良下，早就瘦卑巴，哪有賰偌濟肉。
這个新婦牙根咬咧，殘殘對家己的大腿割一塊肉落來，伊疼甲昏昏死死去。過一大段時間了後，才精神起來，趕緊共家己的腿傷包予好，共塗跤的血拭清氣，驚大家看著會傷心。收拾好矣，即刻共肉囥落去鍋仔內𤉙。毋過，人肉真歹𤉙，誠久猶𤉙袂爛，伊驚大家等傷久會煩惱，只好先捀猶袂爛的肉給予大家食。
老仔婆這个歲數，喙齒早就落了了矣，哪哺會振動？年歲大，頭腦嘛較糊塗矣，想講好肉是毋是攏予新婦食食去矣，賰遮的晡袂爛才予伊。伊坐佇眠床邊，愈想愈風火，最後氣袂過，徛起來高聲詛懺，叫雷公共這个不孝新婦摃死。
講鬼鬼到，彼時雷公拄對遐過，半空中聽見老仔婆的哭訴，就生生狂狂對準彼个新婦的頭殼共摃落去。可憐彼的新婦，猶咧外口替大家洗衫咧，煞按呢不明不白死去。
新婦死了後，厝邊隔壁攏過來鬥相共。彼時有一个規矩，人死了愛洗清氣，因為出生時清氣來，死了也愛清氣轉去。厝邊咧替伊洗身軀時，發覺伊的大腿有一塊肉予割去，傷口猶咧流血，看著會膽寒。老仔婆聽說了，知影家己冤枉著好人，竟然共割肉予伊食的好新婦害死，後悔甲想欲𢯾頭舂壁。伊覆踮新婦身軀頂，心肝一直捶，目屎一直流，大聲嘛嘛吼，想講哪無愛予伊家己死死咧較快活。可惜，已經袂赴市矣，世間哪有咧賣後悔藥的？
老仔婆規工用淚洗面，早暗兩枝香，跪咧雷公神相頭前，哀求雷公超度家己的新婦。雷公才知影家己誤殺好人，心內嘛誠後悔。伊想著冤死的新婦實在可憐，就走去共玉皇大帝報告代誌的經過。
玉帝聽了雷公的報告後，深深同情冤死的新婦，為著欲避免以後閣發生這種不幸的代誌，就封新婦做電母，而且要求從此以後，雷公霆雷進前，電母一定愛先閃爍爁，通通知世人緊覕起來。
沒有留言:
張貼留言