誠久以前，佇山內底蹛著一戶人家，阿爸已經過身，賰阿母𤆬著三个查某囝，雖然無美滿，卻也過著快樂的日子。
這一工，阿母講：「明仔載是外媽的生日，阿母欲去共伊老大人拜壽。今仔日，咱就愛大無閒囉，愛準備壽桃、壽麵、。。。，乖查某囝喂，恁會曉鬥相工無？」
大姊、二姊佮上細的小妹攏同齊講：「阮會，阮會！」逐家就開始無閒起來，那做穡那開講，講佇外媽兜𨑨迌的代誌，一家人快快樂樂、有講有笑。壽桃、壽麵真緊就做好了，裝踮籃仔內。
大姊講：「我欲去，我會曉共阿母捾籃仔。」二姊講：「我欲去，外媽上疼我。」小妹仔躽佇阿母的身軀頂講：「我也欲去，我會曉家己走路呢！」阿母講：「誰也袂當去。豬仔愛有人飼，雞仔愛有人顧，厝門愛有人關。山頂有野狼、狐狸佮虎姑婆，無人看厝哪會使？」
阿母共代誌一一交代好勢了後，閣再三叮嚀講：「愛會記得，生份人來，千萬袂使隨便開門！暗時門窗愛關予好，明仔載阿母就會轉來矣。」阿母衫換好就捾著籃仔落山去矣。
阿母行一半工，感覺忝矣，就揣一塊大石頭坐落來歇跤，欶一桿薰。
附近山洞內，蹛著一隻虎精，伊遠遠看著，就打扮做老姑婆的模樣，恬恬仔行過來，真客氣講：「大嫂，借一个火好無？」火點了，虎姑婆也坐落來，講：「大嫂，你一人欲去佗位？」阿母一个人行規半工路，拄仔咧心悶，無人講話，這馬有一个伴，伊真歡喜，兩个人就按呢嗤舞嗤呲開講起來。
過了有一站仔，阿母一歡喜，就共欲去共外媽拜壽、留三个囡仔看厝的代誌，連同厝生做按怎、前埕有一欉白楊樹、。。。，攏總講講出來。無張持，一仔攑頭，看著日頭漸漸欲落山，阿母才喝講：「哎喲，影攏斜矣，我愛趕路囉。」籃仔捾咧就欲起行。虎姑婆講：「我嘛欲來去山跤的庄仔頭，咱就做陣行，路途有人做伴嘛較有話講！」
兩个人一前一後，一時仔就來到山跤，虎姑婆突然大叫講：「哎喲，你的頷仔頸有一隻大虼虱！」阿母一咧聽，趕緊共頷頸㧣出去講：「緊共捏死！予人看著就歹勢！」虎姑婆借勢一步踏進前，開喙就雄雄共咬落去，阿母疼一下煞昏昏倒落塗跤。虎姑婆共壽桃、壽麵食了了，換著阿母的衫仔褲，回頭對山頂行去。
來到山內，天色已經暗了。三姊妹拄好食過晚頓，碗盤收好，佇咧眠床頂開講，準備欲睏。虎姑婆摸著暗路來拍門，假做阿母的聲音喝講：「大姊啊，緊來共阿母開門喔！」
大姊聽了講：「莫共我騙，阮阿母明仔載才會轉來啦！」
虎姑婆閣喝講：「二姊啊，緊來共阿母開門喔！」
二姊聽了講：「袂使咧，阮阿母講袂使共生份人開門！」
虎姑婆只好對小妹仔喝講：「小妹仔，阿母的心肝寶貝，緊開門啦！阿母有紮轉來你愛食的物件喔！」
小妹仔一聽著有好食的物件，一下咧就跳落床去，三步做兩步走，走過去共門拍開，予虎姑婆入來。
大姊借著外口的月光，看著虎姑婆頭頂有毛，問講：「阿母，你頭殼頂哪有毛？」講了就欲去點燈火看詳細。虎姑婆共擋咧講：「都欲睏矣，閣咧點啥物燈火！是你外媽送我一頂皮帽仔，我共戴踮頭殼頂較燒，哪是啥物毛啊！」
二姊看著虎姑婆一跤踏入來，跤腿攏是毛，就問講：「阿母，你的跤腿哪攏毛？」「濫糝講！是你外媽送我一領皮褲，我共反過來穿，哪是啥物毛！緊起去眠床頂睏！行規天的路，阿母嘛忝甲跤腿攏麻去矣。」
小妹仔綴佇虎姑婆的後壁，大聲叫講：「阿母，你尻川哪有尾？」「你咧烏白講啥，這是你外媽送予我的一蜷膨紗，我縛佇腰身紮轉來，加一節拖佇後面！莫閣囉嗦，今仔日誰欲佮我睏？」
「我毋敢佮你睏！」大姊講。
「我無愛佮你睡！」二姊講。
小妹仔想著有好吃的物件，就覆佇虎姑婆的身軀，司奶講：「我欲佮阿母睏！」虎姑婆就親熱共攬咧，做伙蓋一領綿襀被睏。
半眠仔，大姊佮二姊聽著「咯咯叫」的聲音，攏精神起來，斟酌一咧聽，原來是虎姑婆咧食物件。大姊問：「阿母，你咧食啥貨？」虎姑婆講：「三更半眠，腹肚枵，對外媽兜紮轉來的索仔條，提兩條出來食！」二姊講：「我嘛欲食！」「擗」一聲，虎姑婆擲一个物件過來。
大姊佮二姊抾起來一看，哎喲，哪是啥物索仔條，是一枝手指頭仔骨！想講：「小妹看起來是無命囉，這个阿母一定是虎精變的虎姑婆。」兩个人驚甲攬絚絚，覕踮綿襀被內底毋敢出聲。
大姊佮二姊細聲參商著偷走的辦法，參商好矣，兩个人攏講：「我欲去放尿！」
虎姑婆講：「放踮塗跤就好！」
「袂使咧，塗跤有土地神！」
「曷無放踮大灶內！」
「嘛袂使咧，大灶內有灶神！」
「曷無放踮門後爿！」
「彼愈袂使咧，門神爺會受氣！」
「好啦好啦去外口放啦！愛趕緊轉來喔！」
大姊佮二姊趕緊對門口衝出去。毋過，外口暗眠摸，欲走去佗位？佳哉，門口有一欉躼躼懸的白楊樹，姊妹兩个就趕緊起去樹仔頂。虎姑婆等一晡，無看入來，就落床，行出門來揣。
天已經拍殕光矣，大姊佮二姊看清著虎姑婆的模樣，假做毋知影，講：「阿母，阮佇樹仔頂啦！樹仔頂有靈芝草，阮知影阿母昨昏趕路真忝，想欲挽落來予你食，食著靈芝草會長歲壽喔！」
虎姑婆聽了講：「真好啊！難得恁有這份孝心，我嘛欲起來看覓咧！」
大姊想想咧講：「樹仔真懸，驚你袂起來。你去灶跤提豬油罐仔，共豬油抹踮跤底，按呢才較好起來！」
虎姑婆跤底抹著豬油，滑溜溜，規半工也袂起去。
大姊佮二姊看著虎姑婆中計，毋敢笑出聲。大姊閣講：「阿母，我看你老矣，袂起來矣。你去提一跤較大的斗籠仔佮草索仔，你坐踮籠仔內，阮共你搝起來，較省力！」
虎姑婆坐踮籠仔底，姊妹兩人佇樹頂用力搝。搝啊，搝啊，搝甲足高足高，突然間放手，「科嚨」一聲，共虎姑婆摔一个吭跤翹。
虎姑婆疼甲徛袂起來，大細聲喝：「疼死我！疼死我！」。二姊講：「阿母，歹勢啦，阮傷無細膩，你毋通受氣，閣來一改，一定會成功的。」虎姑婆忍著疼，又閣入去籠仔內。兩个人佇樹頂閣用力搝，搝到半空中，一放手，閣共伊摔落去塗跤。試一改摔一改，虎姑婆終於摔甲袂振袂動囉。
沒有留言:
張貼留言