台灣童話故事：半屏山的傳說

古早的台灣，佇高雄北爿，有一粒圓輾輾的山頭，當地人共號做圓仔山。圓仔山跤有一庄圓仔村，村民攏咧種田，生活雖然無算富裕，但嘛會當溫飽。村內飼真濟的羊仔，囡仔下課了後就去看羊吃草，逐家攏真骨力，也過了真快樂。

有一工，村內來一个喙鬚白蔥蔥的老阿公，捒一車的圓仔踮圓仔山跤咧叫賣。伊大聲喝講：「賣圓仔喔，一碗一角銀，二角銀就隨你食甲飽，賣圓仔喔……」。村民毋分大細，攏揤倚來老阿公的圓仔攤頭前，搶咧買圓仔。逐个人一改攏提二角銀去買，按呢就會當食甲飽，吃袂完的閣會當大包小包、大鍋小鍋裝轉去。

圓仔真緊就賣了了矣，遐的無買著圓仔的村民就圍佇老阿公身邊問：「你明仔載會閣來賣無？」老仔公笑笑應講：「生理遮爾好，哪會無愛來賣，當然會閣來囉！」

第二工，來買圓仔的人更加濟；第三工，村民開始無愛落田，囡仔嘛無愛放羊，想講有俗閣大碗的圓仔通食，就會飽矣，哪需要閣種作；到了第四天，村民厝內攏予熟的佮生的圓仔窒甲滿滿，村民也食圓仔食甲起飫，但是猶是逐工咧數想彼便宜的老阿公的圓仔，無愛做穡，就按呢，田園就漸漸拋荒囉。

但是，逐家攏無注意著，自老仔公來賣圓仔了後，圓仔山煞漸漸缺角去。原來，逐暗到了更深人靜的時陣，老阿公就出現佇圓仔山跤，伊輕輕歕一口氣，圓仔山的大石頭就崩做一堆細粒石頭，老阿公閣歕一口氣，遐的細粒石頭就變成仝款大細的圓仔。原來，老仔公賣的圓仔攏是圓仔山的石頭變的。

過了幾若天，老仔公的圓仔攤來了一个對外地路過的少年人，伊撏出一角銀買一碗圓仔，食了感覺猶有一屑仔枵，就閣撏出一角銀買第二碗，食了猶是感覺無偌飽，就閣撏一角銀出來共老仔公買第三碗。老仔公看了真趣味，就開喙問：「少年仔，你哪著遮麻煩，開三角銀才食三碗圓仔。你若一改出二角銀，就會當隨你愛食偌濟就食偌濟啊，按呢毋是較會和？」想袂到少年人卻回答講：「我只要買有夠我食飽的圓仔就好矣。」

老仔公聽了撚著喙鬚大聲笑講：「我賣遮爾濟工的圓仔，今仔日總算予我拄著一个袂痟貪的人。我其實是天頂的神仙，下凡來選徒弟的，你願意佮我去修練彼个長生不老、永無欠缺閣自在逍遙的道術無？」

少年人答應綴神仙去修道了後，賣圓仔的老仔公就毋捌閣出現，圓仔村的村民這時才發覺，彼粒原本圓輾輾的圓仔山，毋知啥物時陣已經缺一大爿去，彼就時咱這馬高雄的半屏山。村民看著拋荒的田園，也才覺醒，袂使痟貪，認真拍拚才是會當好好過日子的正途。

註：故事脫胎於本原稿