＊＊＊揤遮就會當看著無亂碼的文章
清朝咸豐年間，彰化蹛一个姓張的員外，有錢有勢，交往的朋友毋是好額人就是大官虎。伊有三个查某囝，號做淑玉、淑蘭佮淑芳，攏生做真媠。張員外一心一意想欲予共伊的查某囝嫁入去有錢有勢的富貴人家，因為伊認為有錢才會當予查某囝幸福。張員外雖然真疼惜彼三个媠查某囝，但是有錢煞養成伊驕傲的個性，無容允別人共伊批評。
清朝咸豐年間，彰化蹛一个姓張的員外，有錢有勢，交往的朋友毋是好額人就是大官虎。伊有三个查某囝，號做淑玉、淑蘭佮淑芳，攏生做真媠。張員外一心一意想欲予共伊的查某囝嫁入去有錢有勢的富貴人家，因為伊認為有錢才會當予查某囝幸福。張員外雖然真疼惜彼三个媠查某囝，但是有錢煞養成伊驕傲的個性，無容允別人共伊批評。
淑玉佮淑蘭大漢了後，也傳著阿爸的個性，誠重錢重勢。淑芳就無仝，除了較有家己的想法以外，對人嘛較和氣，看袂出一點仔富家女的驕氣。
有一工，食暗頓了，張員外佮三个查某囝坐佇大廳開講，隨口問講：
「查某囝矣，時間過了真快，一目𥍉仔恁攏大漢矣，對家己未來的幸福，有啥物拍算，敢會使講來予阿爹聽看覓咧。」
淑玉歹勢歹勢講：「查某囝的終身大事，當然嘛是由爸母做主。」淑蘭紲落講：「我嘛佮大姊仝款，爸母全權處理就好。」員外聽了真歡喜，就問淑芳：「曷你咧？」淑芳考慮一睏仔，才講：「我感覺阮攏大漢矣，凡事爸母的意見固然重要，嘛需要有家己的判斷，婚姻是終身大事，尤其愛慎重，哪會使攏交予爸母去決定、去安排？我感覺肯認真拍拚的人比有錢人閣較重要，這馬散赤無一定永遠會散赤，命運畢竟愛家己創造的。」
員外聽了感覺真意外，心內無蓋爽快，彼暗欲睏的時就共某講：「哼！這个淑芳傷過狂妄，想講大漢矣，就無愛聽爸母的安排，好！我就等咧看伊欲按怎創造伊的命運。」
張員外細膩挑選了後，終於共淑玉佮淑蘭嫁出去，大囝婿佮二囝婿攏是城內數一數二的富貴人家子弟。張員外心內猶閣為著淑芳講的遐的話咧受氣，幾若擺媒人紹介有錢人的子弟，閣去予淑芳拒絕，心中更加受氣。
城內有一个沿街叫賣水雞的少年人，號做李阿土，厝裡真散，自細漢爸母攏過身，伊孤苦伶仃家己生活，逐工去田裡掠水雞到城內沿街叫賣，維持生計。但是伊做人忠厚老實，對人和氣，閣骨力拍拚，大家攏佮意伊，親切叫伊「水雞土」。
有一工，水雞土閣提一斗籠的水雞，沿街叫賣。「水雞！水雞！買水雞喔！」張員外佇厝內聽著愈來愈近的叫賣聲，探頭看著一个穿甲破破爛爛的少年人，肩舺頭擔著一斗籠的水雞。員外想：「這毋是淑芳想欲嫁的對象？」就出聲喝講：「喂！賣水雞的，你過來一下。」水雞土聽著有人咧叫，想講有人欲買水雞，就緊共斗籠囥踮塗跤應講：「員外，買水雞是毋？今仔日的水雞肥閣大隻。」員外問；「你叫啥物名？」水雞土應講「我叫李阿土，逐家攏叫我水雞土。」「喔，你結婚袂？」員外閣問。「猶袂。」水雞土回答，對員外按呢問，感覺真奇怪。「按呢我將我的查某囝嫁予你，好無？」員外說。「員外，你莫講耍笑，我家己都飼袂飽矣，哪敢娶某，加連累人欸！」「誰講我咧滾笑，除非你無願意！」員外面目真嚴肅講。
水雞土想講員外的查某囝是毋是生了歹看無人愛，才想欲做予伊，就綴員外入房間去看新娘。見著淑芳，煞掣一趒，無想到竟然是一个嬌滴滴的美人。伊有一點心虛問講：「但是我付袂起聘金。」「聘金？誰欲愛你的聘金？今仔日算你好運，我共查某囝白白送予你，聘金一仙錢都免。」員外講。「員外，你毋是咧騙我！遮爾媠的姑娘，怎樣聘金一仙錢都無愛？」水雞土應講。「是真的，阮查某囝無佮意榮華富貴，伊佮意肯拍拚的散赤鬼。」員外講。水雞土歡喜甲若咧做夢，想講毋知是佗一世積的德，這世才會當娶著張員外的媠查某囝，就爽快答應。這時張員外某傱出來，真生氣咧反對，講家己疼惜甲的查某囝，遮爾乖巧、遮爾捌代誌，哪會使嫁予一个沿街賣水雞的散赤囝。毋過，員外心意已定，不容改變，伊存心欲予三查某囝食一頓苦頭，才會知影爸母對伊的重要。
雙方當日就講好嫁娶的代誌，最後由水雞土選一个好日子，到張家共張淑芳娶轉去。水雞土自細漢就無爸母，一个人蹛佇山邊的破草厝，嫁娶彼工，他共草厝仔簡單佈置一下，上街倩一頂轎仔，就到張府共張員外的三千金娶過來。兩人踮草厝仔外口，敬拜天地，就算成親，也無宴請親情朋好。成親了後，水雞土仝款逐工去掠水雞，提去城內賣，而原本嬌滴滴的張淑芳，無半句怨言，佇厝裡洗衫、煮飯，兩人真艱苦咧日子。
有一工中晝，水雞土揹著斗籠去掠水雞，無想到，揣半工，一四界攏掠無。真緊日頭就欲落山了，他猶踮田裡來來回回揣水雞。伊拍開斗籠一看，一隻水雞都無，心內開始煩惱：「今害矣，今仔日歹過日矣。」
水雞土行到大榕仔跤小歇跤，那欣賞寧靜的暗頭仔美景，心裡那為著家己坎坷的命運吐大氣。突然間伊看著草欉內有一隻兔仔，想講無掠著水雞，掠這隻兔仔來拄數也袂䆀。伊就起跤傱去掠彼隻兔仔，沒想到兔仔的跤手比伊較快，「噓」一下，一直往深山林內走去，水雞土想著這隻若煮熟的鴨仔飛去仔，誠毋甘心，就一直綴後壁逐，逐啊逐啊，最後逐到一个山洞，兔仔軁入去山洞內，水雞土嘛綴入去。內面烏趖趖，兔仔已經無看矣，但是塗跤有真濟黑色的磚仔，水雞土順手抾二塊黑磚仔，毋知是啥，相摃看覓，閣會發出金鐵交鳴的聲音，伊就共這兩塊黑磚仔紮轉去。
轉到厝裡，淑芳問伊，今仔日掠水雞的成果按怎，伊吐大氣講連半隻也掠無，就將逐兔仔抾著的兩塊黑磚仔提出予淑芳看。某接過來斟酌看一陣，突然間跳起來講：「這哪是黑磚仔，頂面是別人刁工共漆黑的，實際上是如假包換的金仔矣」，某用手指甲小心共黑磚頂頭的油漆剾掉，顯出金鑠鑠的金角，提予水雞土看。（原來山洞內的金角所以是黑色，是上天為著防止人來偷提，故意共伊變成毋值錢的黑磚仔。）水雞土聽一下歡喜甲跳起來，共某講。「是金仔！彼山洞內有一大堆，咱緊來去共搬轉來。」伊就提著布袋，𤆬著某即刻衝去山洞。
來到山洞前，煞看著一个七尺外懸、滿面金光的壯漢，擋佇洞口無欲予入去。水雞土問講：「是按怎我拄才會當入去，這馬袂當？」彼壯漢講；「我是山神，奉命看守遮的金角，拄才化身做兔仔，引你來山洞，是因為你是一个忠厚老實閣骨力拍拚的人，但是你命中干焦會當提兩塊金角，賰的攏歸李門環所有，啥物人攏袂使提。」水雞土翁仔某誠失望轉去，但是有這兩塊金角了後，的生活就開始改善，日子過了比以前好誠濟。
時間過了真緊，水雞土某終於生了一个查埔囡仔，生做古錐乖巧，人見人愛，但是猶未號名。佇伊度晬彼工，翁仔某𤆬伊做伙轉去後頭厝，去見外公，外公看著嘛喜歡，想欲共抱，哪知彼个囡仔予外公一抱，煞嘛嘛吼，外公提真濟囡仔物唌伊，攏無效，外公無奈只好共伊抱出去厝外行行咧。有一站仔，水雞土翁仔某無聽著囡仔咧哭，就走出去看覓，看著外公抱囡仔咧耍門圈仔，囡仔耍甲笑嘻嘻。外公看著水雞土翁仔某，就問這个囡仔號名袂？水雞土講：「猶未。」外公就講：「既然猶未號名，共號做李門環按怎，看伊遮愛耍門圈？」翁仔某聽著掣一趒，想起山神講彼的山洞內金仔攏是李門環的，也就是囝的，心內暗暗仔歡喜。
轉到厝，就趕緊走去洞裡搬金角，這擺山神無共阻擋，就順利共所有的金角攏搬轉來。水雞土翁仔某好運得著這筆意外的財富了後，就提桸的錢來做生理，逐工攏真骨力拍拚，生意煞愈做愈大，毋過生活攏無奢颺，所以表面上看起來，猶是過著佮以前仝款的日子。又因為遐的錢是李門環的，咧幫助別人時，攏用李門環的名義，所以親情朋友攏無人知影實際上的情形。
時間真緊就過了五冬，這一冬拄好水雞土丈人的七十大壽，翁仔某參詳欲按怎替丈人祝壽。為著欲予老丈人一个驚喜，他踮較早貯水雞的斗籠內囥了一千兩的白銀，頂頭崁一寡草，身軀頂閣紮兩張五千兩的銀票，驚講臨時愛用錢，然後就穿著上樸素的衫仔褲，歡頭喜面轉去外家。
這工張府點燈結綵，非常鬧熱，彰化所有的大好額人，攏前來祝賀。
張員外看著水雞土干焦提一斗籠的水雞來，氣甲無啥欲插。嫁予有錢人的大姊佮二姊也攏轉來矣，這馬愈奢颺，現出不可一世的姿勢，看袂起的模樣。
壽宴開始，水雞土佮兩个姊夫坐佇仝桌，幾杯燒酒落腹，大囝婿用輕視的眼光看著水雞土，故意講：「阮兜的田傷濟囉，收租的時跤手攏無夠，誠麻煩，想欲賣掉一寡。」二囝婿嘛紲落去講：「是啊！阮兜也是，不如早日共田賣賣，較清閒。」李阿土聽了講：「我卻感覺，田地愈濟愈好，我當咧想欲買一寡田地，恁無愛的，會使攏總賣予我。」全部的人聽了，攏哈哈大笑，咧想水雞土是毋是散甲起痟矣，才會痴人講夢話。大囝婿佮二囝婿聽了見笑轉受氣，就那寫契約那講：「若按呢我就共價值一萬兩的田地，用半價五千兩賣予你，你買會起無？」二囝婿也講：「我也共價值一萬兩的田地，用半價五千兩賣予你，你欲無？」
水雞土講：「太好了！我攏買落來，口說無憑，咱請丈人來做證。」
水雞土簽約了後，就提出紮來的兩張銀票，分別提予兩个姊夫，閣共囥佇斗籠的一千兩銀仔提出來，當做丈人做證人的謝禮佮祝壽的壽禮。在座的人攏驚一大趒，啥人嘛毋敢相信這是事實，損失上傷重的就是兩个姊夫，原來想欲共水雞土創治一下，煞無想著會害著家己，啞口硩死囝，欲哭無目屎。
沒有留言:
張貼留言