話講真早以前，有一个人叫做豬屎公，因為伊是咧抾豬屎的。伊有三个查某囝，攏真佮意花蕊。豬屎公逐工抾豬屎了後，就去挽鮮花，紮轉來予遐的查某囡插踮頭頂。
這一工，豬屎公抾豬屎了後，閣順紲去挽一寡鮮花。當咧挽鮮花時，攑頭看著蛇郎君徛佇遐。蛇郎君問：「你為啥物逐工來我遮挽鮮花？」豬屎公應講：「我有三个查某囝，攏真愛鮮花。」蛇郎君就講：「你逐天來挽我的鮮花，愛賠償我的損失。你既然有三个查某囝，著愛選一个嫁予我，若無我就欲予你死。恁查某囝生做按怎？」
豬屎公想著人欲嫁予蛇就感覺真恐怖，毋過情勢所逼，也只好凊彩應講：「上大的，面圓圓的，有一屑仔貓仔面；第二的，小寡戽斗；第三的，瓜子仔面、喙細細的。」蛇郎君閣問：「佗一位欲嫁予我？」豬屎公應講：「你揣媒人去講看覓。」蛇郎君就講：「好啊！」
蛇郎君就變做一隻蜜蜂，飛到大查某囝的面前講：「嗡、嗡、嗡，嫁予我好無？」大查某囝拄咧煮飯，予伊纏甲心嘈，就用飯匙拍伊。
伊飛開，飛到二查某囝面前，也按呢講：「嗡、嗡、嗡，嫁予我好無？」二查某囝拄咧紩衫，嘛予伊纏甲心嘈，就用針鑿伊。
伊閣飛開，飛到三查某囝面前，也按呢講：「嗡、嗡、嗡，嫁予我好無？」三查某囝應講：「這件代誌，由阿爹做主。」
蛇郎君飛倒轉來豬屎公面前，變回原形，對伊講明一切，豬屎公只好答應將三查某囝嫁予蛇郎君，豬屎公也因此做了蛇郎君的丈人。
嫁娶彼工，蛇郎君派出足豐沛的嫁娶陣頭，充分展示出伊的財富佮權勢。豬屎公慶幸第三查某囝嫁對人矣，但是大查某囝、二查某囝卻是幾腹肚的怨妒佮後悔。
豬屎公數念三查某囝，就揣一工去囝婿兜，看著蛇郎君的厝若像皇宮，後壁有一个大花園，厝內的家具攏是金做的，碗、箸攏是銀做的。伊忽然間想欲放屎，就共蛇郎君討通拭尻川的屎桮，蛇郎順手提一條金條給伊，伊看一下毋敢用，緊共收起來，紮轉起厝共兩个查某囝展寶，大查某囝聽了心內更加怨妒，就想欲謀害伊的三妹，奪取蛇郎君。
大查某囝藉機會去蛇郎君兜欲探望三妹，拄好蛇郎君無佇咧。伊就共三妹講：「咱來做化妝比賽，看誰畫了較媠？」三妹講：「好啊！」兩人就開始化妝起來，化妝好，大姊就煽動三妹行到古井邊來照看畫了有媠無，然後趁三妹無注意時，就大力共捒落去古井底，活活淹死。
幾工了後蛇郎君轉來，看著化妝的大姊，掠準是某，問講：「你的面若會有貓仔斑？跤是按怎變遮爾大？聲音閣變甲遮爾粗？」大姊應講：「你出去了後，天氣焦燥，我只好逐工去擔水，跤才會變大；擔水毋細膩，跋一倒，面才創一下貓去。閣得著感冒，聲音就變甲較梢聲。」蛇郎君聽了，半信半疑。
彼工，蛇郎君心血來潮，想欲家己去古井邊擔水，煞看著一隻鳥仔歇佇樹頂，吱吱喳喳咧叫：「蛇郎君無目睭，共大姨認做恁家後。」 蛇郎君聽了真奇怪，就講：「你若是阮某，就飛來徛踮我的扁擔頂。」鳥仔聽了，果然飛來徛佇扁擔頂，綴蛇郎君轉去。
蛇郎君拄入門，這鳥仔就大聲喝；「大姊羞！羞！羞！抹我的化妝品，睏我的新娘房，用我的新蠓罩。」大姊聽了真受氣，就共鳥仔刣死，煮予蛇郎君食。
鳥仔佇鍋仔內猶閣咧講話：「蛇郎君食著的是肉，大姨吃著的是骨。」果然，蛇郎君所食的攏是肉，而大姨所食的攏是骨，大姊氣甲共骨頭攏擲出牆仔外。
無偌久遮的骨頭大成一簇竹仔，拄好蛇郎君想欲做椅仔，就將這簇竹仔剉落來，做成椅仔。椅仔做好煞會講話：「蛇郎君坐著穩觸觸，大姨坐咧吭跤蹺。」果然，蛇郎君坐甲誠四序，大姊一坐就跋倒。大姊氣甲共這隻椅仔擲入去大灶燒掉。
這時，拄好隔壁阿婆過來借火種，大姊講：「家己去提啦。」阿婆行入去灶跤，看著灶內有一塊紅龜粿，阿婆就問大姊：「為啥物灶內有一塊紅龜粿？」大姊講：「哪有？若有，就送予你啊。」阿婆就共紅龜粿提轉去，囥佇棉襀被內。囝轉來的時，阿婆共囝講：「我的好囝喂，棉被內的紅龜粿予你食。」囝掀開棉被一看，干焦見著一个美麗的查某囡仔，緊走去共阿母問：「阿母仔！棉被內哪有啥物紅龜粿，是一个查某囡呢！」阿母嘛掣一趒，緊佮囝做伙入去看，果然棉被內有一个查某囡仔，生做非常美麗，原來就是三妹變的。
這層代誌最後傳到蛇郎君的耳空，伊就來到阿婆兜，欲討回這个查某囡仔，毋過，大姊嘛欲來相爭予蛇郎君做家後。蛇郎君無法度，想出一个辦法講：「恁莫相爭，遮有一个大跤斗，內底貯有滿滿的雞卵，恁誰會當跳過這个斗，就是我的家後。」三妹輕輕仔就跳過矣，但是彼个較肥的大姊，卻按怎也跳袂過，閣共規斗內的雞卵攏踏破了了。最後猶是由三妹做回蛇郎君的家後，過著幸福快樂的日子。
註：故事脫胎於本原稿
註：故事脫胎於本原稿
沒有留言:
張貼留言