古早時陣，佇咱台灣台南有蹛一个好額人，號做「邱罔舍」。相傳伊是鱸鰻精轉世，所以自細漢就真巧，真𠢕讀冊，甚至會曉暗唸四書五經，大漢了後，愈機竅、厚詼諧，上愛共人創治，別人愈受氣，伊愈歡喜。
一、放大炮
有一工，台南出現一个告示，全市轟動，告示寫講：「某月某日，佇台南某地，邱罔舍欲放大炮，彼枝大炮，比水缸較大。」
到彼工，人山人海攏搢來看邱罔舍放大炮，想欲看大炮有偌大聲。逐家等規半晡，就是無看著大炮的影跡。最後，邱罔舍才派人兇兇狂狂走來講：「大炮傷大枝，誠歹搬運，愛到明仔載才會運到。」
第二工，來看鬧熱的人，比前一工閣較濟，逐家攏著急咧問：「大炮運到袂？」但是三等四等，等到下晡矣，才看著十幾个查埔人扛來一枝大炮，大炮確實真大枝。逐家以為馬上著會放矣，哪知邱罔舍閣宣佈講，因為時間傷暗，毋好放炮，明仔載中晝以前一定會放。
第三工，看鬧熱的人閣比昨下昏的較濟，透早就搢滿規个場所，毋過就是無看著邱罔舍，到中晝，邱罔舍才現身，大聲講伊家己欲來點大炮。逐家攏想講大炮遮大枝，點落去一定是驚天動地，較無膽的人，早就共耳空掩密密。哪知，遐大枝的大炮，一點落去，干焦聽著「茲、茲、茲、噗」一聲細細聲仔，竟然比平時放炮仔較細聲，逐家攏真失望，氣怫怫大聲喝：「恁娘咧，創治人！」
二、過年作孽
咱台灣人的習慣，農曆過年，攏佮意好吉兆，門聯貼的，攏是吉祥的話，逐家見面嘛愛講；「恭禧發財」的好話。
有一冬新正，邱罔舍準備真濟麻衫，叫下跤手人去街仔共附近的囡仔攏叫來厝裡，問欲愛錢無，囡仔攏講欲。邱罔舍就指著遐的麻衫講：「共遮的衫穿咧，逐个人攏予恁兩箍銀。」遐的囡仔乖乖共麻衫穿好了後，邱罔舍就分予一个人兩箍銀，紲落去閣交待愛沿路行轉去，沿路哭，叫「阿娘」。
囡仔毋知影穿孝衫的意思，一路哭一路叫「阿娘」行轉去。囡仔的阿母聽到囡仔咧叫阿娘的哭聲，攏共手中的工課放落來，出來看發生啥物代誌。當看著家己的囡仔穿一身孝衫，佇新正年兜哭咧叫阿娘，攏先呸喙瀾，姦撟拍觸衰，受氣問囡仔講：「是誰叫恁穿的？」「丘罔舍。」囡仔應。「這个放蕩囝，恁娘來揣你算數！」逐个阿娘攏氣大大。
毋過，當看著囡仔手裡提著兩箍銀，囡仔的麻衫褪落來了後，看著衫後壁閣縛著兩箍銀時，氣攏消了了，細聲共囡仔講：「乖，愛會記持，以後千萬袂使閣去彼个歹所在耍。」
三、相輸
有一改，丘罔舍佮人相輸，講：「我紮二十个銀角仔出門，會使食點心、鉸頭毛、坐轎，閣會當共二十个銀角仔紮轉來。」「阮才毋信你有這个本領，若做會到，阮就輸你一桌酒菜。」朋友攏無相信講。「好啊，恁就綴踮我後壁斟酌看！」
丘罔舍講了，就大搖大擺行去街仔，行到一个麵攤頭前，共頭家點一碗麵，坐落來就食，等到欲食完的時，共褲袋仔內事先準備好的幾隻胡蠅囥入去碗裏，同時大聲叫講：「頭家仔！你嘛較好量的，哪會共胡蠅煮予我食，我欲來衙門告你。」伊那講那搝頭家看。佳哉隔壁攤仔過來解勸，包證伊十工內袂破病，閣講彼碗麵免錢，才算無代誌。
丘罔舍離開麵攤，閣行入去一間剃頭店。剃頭師父問伊欲割喙鬚無。伊無意無意應講：「無割，留咧好看！？」剃頭師父聽了，以為伊無愛留，就一刀共割落去。拄割一刀，丘罔舍就大喝講；「小等咧！你哪共我的喙鬚割掉？」「你毋是講無割，欲留咧好看呢?」剃頭師父心虛應講。丘罔舍講：「哪是，我是講無愛刮，欲留咧好看。你哪會無聽予清楚就共割落，共我鬥倒轉去，若無我無放你煞！」剃頭師父再三會失禮，而且自願免收鉸頭毛錢。丘罔舍閣講：「有喙鬚出門，無喙鬚轉去，若予人看著，就見笑死，除非叫一頂轎送我轉去。」剃頭師父自認衰尾，只好倩一頂轎共他扛轉去。
丘罔舍坐踮轎內，手裹拈著用來相輸的二十个銀角，不時越頭，對著綴佇後壁的朋友，露出得意的笑容。
四、食豆腐
有一工，丘罔舍佮幾个朋友佇門□開講，看著對面田岸來一个少年查某囡仔，一个朋友就指著彼个查某囡仔講：「丘兄，你若會當佇伊的身軀頂摸一下，伊無受氣，我就真心佩服你。」
「彼有啥物難？斟酌看！」丘罔舍那講那行入去房間換一雙新鞋佮一軀衫仔褲出來，向查某囡仔行來的田岸行去。行到伊身邊時，假好心欲讓路，向倒爿閃一下，卻故意徛無在欲跋倒，兩手順勢掠著伊的手股，同時共家己的正跤踏落去水田裡，然後現出無辜的表情講：「歹勢！歹勢！佳哉有小姐共我扶牢咧，若無，真正會跋落去田裡。」
彼个查某囡仔突然間予伊搝一下，以為伊是存心食豆腐，拄欲發性地，罵伊幾句，毋過看著伊是為著欲讓路，才重耽踏入去田裏，共家己的新鞋仔舞垃圾去，氣就消欲一半，閣聽著伊連連會失禮，滿面驚惶的戇面像，煞笑出來，然後正手共喙掩咧，頭犁犁行離開。
五、雙粒卵仁
有一工，丘罔舍佇街仔，看見一个賣雞卵的庄跤人，故意問伊：「你的雞卵是毋是有兩粒卵仁?若是，我攏買。」賣雞卵的看伊問佮遐趣味，心想：「這个戇頭，兩粒卵仁是誠罕才有的，哪有可能逐粒雞卵攏有兩粒卵仁，毋過若騙伊講攏有，一來價數會使提懸，二來伊會全部買去。閣講一旦買轉去矣，拍破雞卵才發現予人騙去，也無法度來揣我理論」，就滾耍笑講：「是矣，我的雞卵攏有兩粒卵仁，你欲買無?」「買！全部買，一粒雞卵偌濟錢？」「算你較便宜的，兩文錢一粒。」
講好價數，丘罔舍共伊𤆬來厝裡，指著一張桌仔講：「咱先共卵攏囥踮桌頂，排好好，算看幾粒，我才入去提錢。」伊佮雞卵販仔就共雞卵囥踮桌頂，疊甲若一粒細粒山仝款，伊閣叫雞卵販仔雙手共雞卵山圍咧，小心細膩，毋通振動，丘罔舍共雞卵算完，才假影欲入去提錢。
丘罔舍來到後門，偷偷仔放出一隻惡狗，彼隻夠來到大廳，看著生份人，就大聲亂吠，向雞卵販仔欱去。雞卵販仔驚一趒，本能向桌邊閃開，雙手順勢煞去掰著雞卵山，所有的雞卵就按呢噗噗噗摔落去塗跤，摔甲若漉糊仔糜。丘罔舍這時才慢慢對裡面出來，假做真著驚講：「哎喲！哪會遐爾無細膩？」
「你的狗突然間向我欱過來，我就向桌邊閃開，雙手煞去共雞卵攏掰落塗跤。」雞卵販仔指著彼隻狗氣怫刜講。「今欲按怎？」丘罔舍問。「曷無算你閣較俗咧，五文錢三粒！」雞卵販仔共價數減算一寡。
丘罔舍提一个大面桶出來，共卵仁𣁳入去桶內，總共有一千二百粒，就提著一千文錢予伊。雞卵販仔無歡喜講：「若會才這屑仔錢。」丘罔舍應講：「一粒雞卵有兩粒卵仁，一千二百粒卵仁，就是六百粒雞卵，五文錢三粒，予你一千文錢，連半文錢也無減予你。」
「一粒雞卵哪會有兩粒卵？我是佮你講滾笑的，實際上，一粒雞卵干焦有一粒卵仁爾。」卵販仔苦笑講。「我買雞卵也是講滾笑的，遮个雞卵我無愛矣，你提轉去。」丘罔舍指著面桶內的雞卵講。雞卵販仔痟貪想欲騙丘罔舍，反倒轉中計，自認衰尾，就忍疼共遐的雞卵俗俗仔賣予丘罔舍。
六、賣柴的人
有一工，丘罔舍穿著新衫，當得意佇街仔四界踅，佮一个賣柴的人相閃身，無張持衫煞予伊割破，心內真受氣，就共賣柴的叫停，問伊偌濟錢一擔，價數談好後，就共伊𤆬到一間厝的後花園的門，假意叫幾聲，閣敲幾下門，看無人來開門，就假受氣講：「遮的下跤手人真可惡，攏死去佗位！」隨就越頭對賣柴的講：「若對大門入去，愛行較遠的路，無方便，我看按呢好無：你共柴對遮擲入去，我對大門入去，叫人來遮搬。這馬我先予你錢。」講完，錢予伊就走了。
食好做輕可是人之常情，賣柴的聽丘罔舍按呢講，正是求之不得，何樂而不為？就共柴一塊一塊對牆仔頂擲入去。擲甲當興的時，突然間聽著牆仔內有人咧罵：「是佗一个毋成囝佇外口亂擲物件。」「是我。」賣柴的以是丘罔舍來開門矣，那應那假繼續擲柴。
「可惡，猶閣咧擲！」門一打開，行出兩个高長大漢的查埔人，一手就共賣柴的㨑著，共伊拍甲半小死。「唉喲！恁哪會遮爾無講理，一見面就起跤動手。」「阮無講理？你擲入去的柴，共我花園內的花坩拍碎了了。」講了閣共賣柴的揍一回。「是丘罔舍叫我擲入去的。」賣柴的誠委屈講。「丘罔舍叫你去死，你欲去死無？你入來看覓，攏愛賠我！若無，到衙門告你」那講那共賣柴的搝入去後花園。
賣柴的來到園仔內一看，只看著花坩攏予家己的柴摃甲東倒西歪，只好向頭認罪，共丘罔舍予伊的錢提出來賠。園主嫌錢少，毋肯罷休。賣柴的人哭講：「先生，你可憐可憐我，我實在是中著丘罔舍的計，伊買我的柴，叫我對牆仔共擲入來，實在毋知影是你的花園？」「帶念你無知，予人創治去，就饒你一遍！」園主講。賣柴的，提著扁擔，喙內踅踅唸，那罵那轉去。
七、青盲算命仙
有一擺，丘罔舍無意間聽著幾个青盲的算命仙咧講伊的歹話，心內罵講：「遮的青盲的竟然敢烏白搬話，無共恁修理一下毋知我的厲害！」就叫下跤手人共遐的青盲的攏叫入來，集中做伙，講：「今仔日共恁請來，是想欲叫恁替我算一个命，看誰算了較準，算準的人賞二十箍，算無準干焦會當領五十仙。我的八字是：壬寅、丙寅．庚寅、甲寅。」
遐的青盲仔聽了，嘴角攏浮出痟貪的笑容，恬恬屈指咧算。忽然間一个年歲較大的青盲仔就講：「喔，這是貴人的命，將來一定大富大貴，囝囝孫孫毋是成將就是拜相。」
另外一个較少年的算命仙恐驚酬金予彼个老的提去，馬上反駁：「莫亂扶啦，這个先生的年、月、日、時全相虎，是一个敗家的孤𣮈命，猶想欲會大富大貴，有囝孫？」「亂講！這个先生的命足好！你莫亂濺！」老歲仔人嘛毋認輸。「你才烏白講咧！干焦會曉扶尻川，一點仔命理都毋捌，根本是諞仙仔！」
丘罔舍看開始冤家，就攑一枝棍仔對少年算命仙的頭殼掔一下，少年算命仙予人掔一棍，以為是彼个老歲仔拍伊，就罵：「恁娘咧」，一枝拐仔也攑懸懸向對方撼落去，拄拄撼著老歲仔左爿的肩胛。老歲仔罵講：「猴死囡仔，你敢拍我！」也一棍摃過去。兩個青盲仔你一棍，我一拐，拍甲難分難解。
「莫拍啦！」有一个青盲仔看著兩个同伴冤家起來，想欲為排解。丘罔舍知影有好戲通看，就共排解的人摃一下。「毋知好歹，好心解勸，煞連我嘛拍落去。」排解的青盲仔予人摃一棍，風火大發，也一拐摃倒轉去。
邱罔舍看著猶有兩个青盲仔無振動，就踮个頭殼攏掔一棍，彼兩个青盲看著戰火燒甲家己身上，也無閣徛中，加入戰場，一時仔，棍拐飛做伙，一片混亂。
按呢過了一陣，邱罔舍才大聲喝講：「好矣，我毋是請恁來相拍的，我的命無愛算了，毋過看恁這齣武齣搬了袂䆀，逐个攏賞一百箍，以後袂使閣講我丘某的歹話，這改是予恁小教示。」 講了就提錢予。
「咱攏予邱罔舍騙去矣！」」青盲仔提過錢出去，異口同聲講。
八、表兄
邱罔舍毋但創治別人，也會創治家己的表兄。佇一个誠燒熱的熱人，表兄看伊愛創治人，就叫伊來面前共講：「罔舍，你是名聲透京城的創治專家，我想欲看你會用啥物方法來創治我。」
「表兄，你若欲看，我就做予你看！」「好，你做予我看覓。」「毋過…」邱罔舍躊躇一下講：「表兄愛答應我一个要求。」「你講啊！」「請表兄先共這領皮裘穿起來。」「啥物？遮熱，欲共我翕死。」「表兄，你若無答應，我就無辦法創治你矣。」表兄為著欲看伊咧變啥蠓，只好答應。邱罔舍就攑一張椅仔囥佇門口日頭跤，講：「表兄，你來坐佗遮，等我變予你看。袂使起來行喔，曷無就無靈矣。」講了，家己就坐佇樹蔭啉茶。
． ，
表兄好玄所致，也無顧日頭焱，任由表弟擺佈。可是，過一陣仔，就熱甲擋袂牢，連忙叫講：「罔舍，緊攑葵扇予我，我欲熱死矣。」「表兄閣忍耐一下，就緊矣。」表兄聽著這句話，只好繼續忍耐，雙手一直擛額仔頂的汗滴。
過了誠久，表兄猶是無看著邱罔舍有啥物行動，就閣催伊：「罔舍，較緊開始啦！哪會干焦坐佗遐啉茶納涼？」「表兄，我創治了矣。」丘罔舍講。「啥物？我哪無看著?」表兄應講。「表兄，我問你，天遮熱，穿皮裘、坐遐曝日頭，敢會爽快？」丘罔舍微微仔笑問。「曷使講！無穿皮裘，天遮熱，坐咧曝日頭，也袂爽快啊！」這時表哥才發現去予表弟創治去，家己竟然猶毋知影。
九、傳奇尾聲
丘罔舍的財產雖然是台南上濟的，但也真奢華、開錢若開水、放蕩、厚詼諧，對人生也看甲真開，伊的死嘛真有趣味性，佮伊一生的做為閣真呼應。
丘罔舍因為𠢕開閣毋討趁，幾十年內就共所有的財產敗欲了，伊感覺閣活落去已經無啥趣味，就想欲自殺解脫，這真正符合俗諺所講的「用盡、開盡、自盡」。
丘罔舍雖然變散，毋過伊身軀猶有三百兩銀，彼也是一筆袂少的財產，但這馬伊已經無啥想欲活，閣留遮的錢嘛無啥意義，不如送予別人。經過一番思考，伊終算想出一个辦法：誰若會當臆著伊的心事（「自殺」），就予伊這三百兩銀。
丘罔舍離開厝欲去揣會當臆著伊心事的人。伊向河邊行去，一路上拄著人就問：「這馬我欲去佗位，你敢知?」遐的予伊問的人，哪臆會著，有的凊彩應一下，有的共當做痟的，無欲插伊。揣真久，終算予伊拄著一个伊捌創治過的婦人人，拄無閒咧擔水轉厝。丘罔舍行上前，笑咪咪共問：「阿桑，我欲去佗位，你知無？」彼个阿桑擔水擔甲當忝，忍不住風火著，氣怫怫講：「你欲去死！」
沒有留言:
張貼留言