「七爺八爺」也就是逐家較熟似的「黑白無常」。是上有名的「鬼差」，是閻王佮城隍的部下，手提跤鐐手銬，負責掠陽壽已盡的人的鬼魂。
各地的城隍爺是玉皇大帝派駐人間的地方官員，照顧彼个地方的百姓佮孤魂野鬼。城隍廟內，通常攏有二尊神像，一尊身懸丈外，身形瘦躼，目眉對兩邊若八字垂落來，喙舌伸甲長長，面色若白銀，白鑠鑠，彼就是七爺，姓謝；另外一尊身懸無夠七爺的一半，面色若烏火炭頭，烏趖趖，身形矮拄矮拄，彼就是八爺，姓范。
因為的造型較恐怖，咧迎神遊行時，囡仔看著往往會著驚，或是嘛嘛吼，所以大人攏較無愛予囡仔去看。雖然生做古怪，但佇猶未做神進前，卻有一段真感動人的故事。
以前，佇某一个衙門，有兩个差役，一个姓謝，生做懸閣瘦，像一枝竹篙，另外一个姓范，身材矮閣肥，若一跤水桶。兩人是結拜兄弟，感情真好，雖然無蹛佇仝一个庄頭，毋過定定會約做伙𨑨迌。
有一工，奉縣老爺的命令出差，原本天氣誠好，日頭溫溫仔曝，風涼涼仔吹，誰知行到半路，天氣突然變䆀，烏雲密佈，風大雷霆，看起來若欲落雨。這時兩人拄好走到一板橋頂，姓謝的講：「咧欲落雨矣，咱猶有一段很長的路愛行，曷無你暫時覕踮橋跤避雨，阮兜較近，我轉厝提雨傘，馬上轉來。」「好啊！這是好辦法。」姓范的欣然答應。姓謝的就傱對兜轉去，轉到厝捎著兩枝雨傘，咧欲出門，煞看著雨勢變粗，風也變大，雨水真緊就積甲規个門口埕，閣開始淹過戶橂，淹入去厝內。
姓謝的想講：「雨落甲遮爾粗，范的應該會離開橋跤，去附近較安全的所在避雨才著？」「袂！袂！范的是一个真守信用的人，伊講欲佇遐等我，一定會守佇橋跤。我著趕緊送雨傘來予伊，毋免予伊淋甲澹糊糊！」姓謝的心頭一掠定就毋顧一切，衝出大門，搢著大風大雨，向橋頭走去。
毋過這時的路況，已經佮伊拄才轉厝的時無仝，彼陣路況平順，這馬卻是處處積水，塗崩石流，伊跋一倒受傷，毋過，馬上起來，一心一意想欲緊趕去橋跤。因為路況遮䆀，轉厝時只要半點鐘的路途，這馬過點外鐘矣猶行無一半。
這時，姓范的猶佇橋跤相等，雨愈來愈粗，河水也漸漸漲懸，但一直等無生謝的的影跡，心內拍算講：「算算時間，謝的也應該到了，敢會是雨落了傷大，伊想欲等雨較細咧，才出門。」「袂！袂！謝的既然答應欲來，就一定會遵守約定，我若離開橋跤，謝的來揣無我，一定會真著急。」姓范的堅信姓謝的一定會來，伊就一直徛踮橋跤的一粒大石頭頂等。
雨愈落愈大，原來焦燥的河床，這時已經做大水矣，無偌久，河水開始淹著姓范的跤目，閣過一陣仔，河水愈漲懸，就咧欲淹著伊的跤頭趺，這時，一下無張持，一陣大湧沖過來，就共姓范的沖對河裡去。
姓謝的佇大風大雨中，沿路跋，沿路行，最後終算趕到橋邊，這時雨較細矣，河水也開始咧退矣，但是就是看無姓范的。伊大聲喝講：「范的，我來矣，你佇佗位？」但是毋管伊按怎喝，就是聽無姓范的應聲，干焦聽著滾滾的流水聲。看看雨欲停矣，姓謝的只好帶著失望的心情慢慢行轉厝。
第二工，有人佇河岸看著姓范的屍體，規面烏趖趖。聽講姓范的面容會變甲遮歹看，是因為予大水沖去時，佇水裡大力滾躘，怨慼姓謝的無守信用所致。彼个人去𤆬姓謝的來河邊看，姓謝的看一下心內真艱苦，傷心佮昏昏死死去。等伊精神起來，知影是伊誤著姓范的，就「噗」一聲跳入去河裡。毋過這陣河水已經退矣，伊的身材閣懸，根本淹袂死。姓謝的上河岸，徛佇岸頂，四界看，慢慢行向一欉大樹，敨開腰身的腰帶，袚起去樹頂，家己吊脰死亡。以為是吊脰死的，咱這馬看著的七爺，面容攏白鑠鑠，喙舌攏伸甲長長的。
城隍爺知影姓謝的佮姓范的的友誼後，心內真感動，就共這件代誌稟報予玉皇大帝，並且上奏講：「希望玉帝會當答應我，予做我的部下，協助我管理人間。」玉皇大帝聽了應講：「姓謝的佮姓范的會當互相體諒，堅守信用，實在真罕哩！有鬥相共，你確實若虎添翼咧，真好啊，准奏。」
城隍爺本來就有六个部下，加上姓謝的、姓范的，變成八个。姓謝的排第七，因此號名謝將軍或是七將軍；姓范的排第八，就號名范將軍或是八將軍，毋過一般人攏稱呼七爺八爺。
七爺心肝軟，人若做毋著代誌，只要向伊誠心懺悔，伊就袂計較，所以伊閣有一个外號叫做「謝必安」，說多謝就平安。八爺性地暴躁，對於做錯事的人，伊絕毋容允，所以伊的外號叫做「范（犯）無救」，犯錯了，就愛受罰。
沒有留言:
張貼留言