台灣話「講白賊」就是「講騙人的話」。相傳咱台灣古早，有一个人號做阿七，伊講白賊的工夫頂港有名聲、下港有出名，人人佇伊的背後攏叫伊「白賊七」。
有一工，伊閒閒無代誌，行對菜市仔口過，市場內的生理人看著白賊七仔來，攏講：「阿七仔！來！來！阮這馬無啥物生理，你來講一寡白賊予阮聽。」「講白賊予恁聽？若是無拄好得罪恁，恁若生氣欲按怎？」講：「袂啦！這馬逐家當無聊，講一寡白賊來做議量！」伊講：「可惜我這馬無閒！」「哪會無閒？」「我今仔日哪會無閒！隔壁庄王員外做六十歲的大壽，叫我來辦一寡魚、肉、菜料，我猶毋知欲去佗位買！」講：「毋免去別位買，阮遮就有魚、有肉、有菜，你欲愛的菜料，阮遮逐項嘛有，會使賣你啊。」伊講：「按呢敢好？恁敢肯車菜去隔壁庄賣？」講：「肯啊！這馬市草遮䆀，會當加減賣寡嘛袂䆀啊。」伊講：「但是我無一定愛買恁的菜喔！是恁家己欲車去賣的喔！」白賊七仔就共需要的菜量佮宴席的時間共講，閣交待：「恁愛趕會赴人做菜的時間，若無，我是會處罰恁！」遐的人聽了真歡喜，逐家就準備著所有的菜、肉，準時車對隔壁庄去。
來到王員外兜門口，煞無感覺有欲辦壽宴的氣氛。逐家想：「會送毋著位無？」問門裡的人：「恁遮是毋是姓王？」門裡的人講：「是啊！阮是姓王，王員外厝。」閣問：「恁今仔日毋是欲做壽？」伊講：「哪有？」閣問：「恁毋是叫白賊七仔去辦菜料？」伊講：「無啊！阮老爺無做生日，哪需要啥物菜料？」這時逐家才知影予白賊七仔騙去。可是，一大堆菜料，若無緊賣掉，爛去，就慘矣。真毋甘願，就共菜料車到白賊七仔兜，欲揣老母理論。
白賊七仔老母本來對伊這个囡兒就較寵倖，但是伊確實毋知影囝這改是去惹著啥代誌，就叫囝出來問話。白賊七仔講：「拜託我講白賊予聽，所以我才講白賊予聽，而且也講好是『恁家己欲去賣的』，哪會當受氣？」賣菜的想想咧：「對啊！是咱叫伊講白賊予咱聽的，結果咱煞予伊騙去。伊也講無一定愛買咱的菜，是咱家己欲車去賣的！」逐家無辦法，只好離開。
有一寡賣菜的猶是毋甘願，想：「既然投老母無效，曷無來投老師！」老師知影這件代誌了後，就處罰白賊七，罵伊講：「你按呢騙人，害逐家一大堆菜料攏爛去！」白賊七誠毋甘心，轉去厝竟然共老母使弄：「別的同學過年過節攏有送等路予老師，你攏無送，害我予老師處罰。」老母聽了真生氣：「做老師的，哪會使遮痟貪？」伊毋知影囝騙伊，就共囝講：「明仔載去共老師講：阮老母有較疏忽，毋知影著送等路，真歹勢，伊會辦一頓豐沛的飯菜，做補償！」
古早時，人平常食無蓋好，這个老師一向閣看懸無看低，一聽著白賊七兜欲請客，足歡喜。到了請客彼一工，連早頓都無食，就是欲等食中晝的腥臊。老師去到白賊七仔兜，老母真好禮講：「老師！請入來坐！你先遐坐，我來去灶跤煮菜。」然後叫白賊七：「入來幫阿母刣雞。」古早刣雞請客是真大的禮數，老師心想：「哇！這頓飯一定是真豐沛！」
老師坐踮廳裡，等到午時攏過矣，卻猶袂食著飯，白賊七仔老母佇灶跤，菜炒甲嘁嘁喳喳，燒鍋內的油煏聲比比噗噗，老師愈聽腹肚愈枵。伊無張持看著尪架桌頂囥著一寡糕仔，心想：「不如先提兩塊來止飢一下！」伊就去提兩塊來食。伊糕子拄食完，白賊七仔佮老母就出來，老母講：「老師，歹勢！菜煮了傷濟，才會煮到遮晏！」就叫白賊七仔：「來來來！來擺桌仔，通好請老師食飯。」當欲共尪架桌下面的八仙桌搬出來的時，伊假無意看對尪架桌頂的糕仔，假著驚對囝講：「七仔！你是毋是有食尪架桌頂的糕仔？」白賊七仔講：「無啊！」伊講：「戇囡仔！若是你食的，愛老實共阿母講，遐的糕仔袂食咧！」老師感覺奇怪，就問：「為啥物袂吃咧？」伊講：「彼是欲用來毒鳥鼠的！」講完，閣對白賊七仔講：「若是你食的，就緊講，我猶會當救你，你若無講，時間若久，就無救矣，你會死喔。」老師聽一下大著驚：「是我食的！我拄才傷枵，提兩塊來止飢！」老母講：「老師，歹勢，菜煮了傷久，煞害著你，這馬欲按怎？」老師兇狂對白賊七仔講：「趕緊趕緊，想辦法救我！」白賊七仔講：「救是有救，毋過干焦潘才有法度解這个毒，毋知影老師這爾有地位的人，敢會使食彼種物件？」老師講：「顧性命要緊，猶是著食啊！」老師叫白賊七仔緊去舀潘，白賊七仔假戲真做，去𣁳一寡潘來，硬共灌入去老師的喙裡，潘味臭酸甲，哪食下落？毋過老師為著活命，猶是勉強吞落腹。
老師轉厝了後，愈想愈奇怪，後來伊才恍然大悟：一定是予白賊七仔騙去。伊想：「這个死囡仔！你最好莫閣來學堂，若無一定袂放你煞。」白賊七仔三天攏無去學堂，老師以為伊毋敢來矣。毋過三工後，白賊七又閣來學堂，而且穿甲佮以前無仝款。毋知伊去佗位提著一寡看起來若黃金的物件，穿甲誠體面，閣掛甲規身軀金鑠鑠。古早時，人對金銀的物件無啥了解，所以無人知影伊掛甲金鑠鑠的飾物到底是真的抑是假的。老師看著伊，本來真受氣，可是伊一看著老師，就馬上提出一个金仔共老師講：「這个送你！」這个老師本來就較痟貪，看著伊送物件，氣就消去，閣看伊穿甲遐時行，掛甲振振噹噹，就問：「七仔，你是毋是抾著金仔？哪三工無看，規个人攏無仝？」白賊七仔講：「我毋但抾著金仔，閣抾著一个挖袂完、提袂了的財庫。」老師好玄問伊原因，伊應講：「彼一工，我佇阮老母面前講你的歹話，阮老母誠氣你，才會騙你，害你以為家己吃著鳥鼠藥，我感覺家己的行為真毋著，後來閣有真濟人去投阮老母，阮老母就罵我，我心內艱苦，一時想袂開，行到海邊欲跳水自殺。佳哉龍宮的水族共我救起來閣𤆬我去龍宮，海龍王真佮意我，共查某囝嫁予我，我就按呢做了海龍王的囝婿。本來我想講對不起逐家，想欲永遠蹛龍宮，無愛閣轉來，可是若想著對不起老師，心內就礙虐，所以想講來𤆬老師去龍宮耍一逝，做補償。龍宮誠媠，內面啥物寶藏都有，你欲提偌濟，就會當提偌濟。今仔日隨手紮幾項來予老師看，順便邀請老師來去龍宮參觀。到遐，看老師欲愛啥，我攏送你。」老師真歡喜講：「好矣，按呢我就來去龍宮看一下！」白賊七仔講：「蓋好！毋個我是海龍王的囝婿，會使自由出入，你是外人，袂當隨便出入，所以我愛佮遐的水卒仔先聯絡一下，看按怎才會使予你入龍宮。」白賊七講白賊，若像真的，伊就佮老師約定：「我安排好，三工後𤆬你來去。」
三工後，他來揣老師，講：「我已經聯絡好了，丈人講：『本來袂當予外人來，但因為伊是你的老師，特別允准你𤆬伊來遮見識見識。為著利便分別，恁一个人坐醃缸，一个人坐柴桶。』」白賊七仔繼續講：「老師坐醃缸，我坐柴桶，用摃缸仔聲佮摃桶仔聲做信號。摃缸仔聲表示老師來矣，摃桶仔聲音表示𤆬路的人來矣。你愛綴我摃喔！我若細聲摃，你也愛細聲摃，我大聲摃，你才會使大聲摃。」
聽著白賊七仔欲𤆬老師去龍宮的消息，一寡好玄的人攏揤來海邊看。老師真正坐佇醃缸，白賊七仔真正坐佇柴桶，兩人浮佇海面，用手輕輕仔掰水，慢慢仔前進。過一陣仔，白賊七仔講：「來！欲摃第一聲喔！」他踮桶仔邊輕輕摃一下，發出「叩」的聲音，老師也綴咧踮缸仔邊輕輕摃一下，發出「鏘」的聲音。白賊七仔又講：「這馬欲摃第二聲囉！毋當傷大力也袂使傷細力！」他坐的桶仔毋驚摃，但是老師坐的缸子，佇摃第二下時，就差不多欲必開矣，只是老師坐踮缸仔內毋知影。白賊七仔閣講：「好！第三聲愛大力摃。摃了，水卒仔就來矣，龍宮的人就會踮門口迎接。」結果第三下一摃落去，老師的醃缸就破去，開始進水，無偌久就沉落。老師開始食水。海邊看熱鬧的人大聲喝：「趕緊喔！救人喔！老師跋落海裡矣！」逐家趕緊共老師撈上岸。
老師問白賊七仔：「我若會落水？」白賊七仔連忙解釋：「你摃了傷大力啦！咧摃的時出力愛站節，曷無會共水缸仔摃破去，這馬遐的水卒仔攏驚走了了矣！」老師猶毋想著是予白賊七仔騙去。白賊七仔閣假好心，共老師講：「老師，你規身軀澹漉漉，驚會寒著。我去你兜提衫仔褲來予你換！」
白賊七仔來到老師兜，共師母講：「老師傷急，摃破醃缸，跋落海底，淹死矣。本來想欲叫人共屍體扛轉來，但是我身軀無錢。老師死了衫仔褲澹漉漉，著緊提一領壽衣予伊換。」師母就提幾百兩銀予伊，講：「恁查埔人跤手較猛，你先走去買一具棺柴佮一領壽衣，壽衣予老師換好，貯入去棺柴，倩人共伊扛轉來，我隨後就去！」白賊七仔提著錢，就旋甲無看人影。
這爿師母沿路走沿路哭，欲去海邊，彼爿老師等白賊七仔轉去提衫仔褲，等規半晡，猶無看著人，等了起𤺪，就穿著澹漉漉的衫仔褲，家己沿路行轉去。兩人佇半路仔相拄，師母講：「曷你毋是死矣？」老師講：「哪有！我若死，哪會叫白賊七仔轉厝提衫仔褲？」師母講：「喔！曷這改毋著閣予彼的白賊七仔騙去！伊講你死了，我提幾百兩銀予伊，通好去買棺柴佮壽衣，結果攏是假的！」苦憐，兩个人予白賊七仔騙甲玲瑯踅，白賊七仔早就毋知走甲佗位去矣。
沒有留言:
張貼留言