咱台灣南投有一个真媠的風景號做「日月潭」，日月潭有一个真美麗的傳說。傳說中，蹛佇大清溪附近的邵族中有一對翁仔某，查埔的號做大尖兄，查某的號做水社姊，兩人感情恩愛、閣骨力種番麥，生活過了猶袂䆀。
這一工，翁仔某照常佇大日頭跤作田，忽然間，地動山搖，紲落來天地變甲暗趖趖，逐个人攏大細聲喝起來：「今是按怎，日頭哪會無去？」逐家等了閣等，猶是等無日頭的影跡，心內攏慢慢驚惶起來。一直到彼暗，月娘出來矣，眾人才趁著月色，緊共日時未做完的工課做做咧，毋過，不幸的代誌猶閣發生了，一陣天搖地動後，月娘也拍無去矣。
「哪會按呢？日頭佮月娘攏無去，稻仔、果子真緊就會死了了，按呢欲按怎生活！」族裡為著這件大代誌，特別召開會議，看欲按怎處理。討論真久，逐家才勉強按照大尖兄翁仔某的提議，先逐位去揣看覓咧，總比踮遐憂頭結面較好。
翁仔某就揹著簡單的食物，紮著火把，開始走揣日頭佮月娘的艱苦旅程：盤過濟濟的懸山，軁過密密的樹林，渡過兇險的掣流。這一工，上一粒大山了後，總算佇遠遠的一个大水潭看著日頭佮月娘。毋過行近一看，竟然有兩隻五彩巨龍，提著日頭佮月娘佇水裡耍。一時攏看愣去，毋知欲按怎才會當對這兩隻巨龍手裡搶回日頭佮月娘。
當咧煩惱時，一个予巨龍掠來鬥作穡的老阿公，共講一个方法。原來佇阿里山山頂藏著一枝金鉸刀佮一枝金斧頭，若會當揣著這兩項寶貝，就會當收服巨龍。毋過欲揣著這兩項寶貝毋是遐簡單。
聽了老阿公的話了後，翁仔某就兇兇狂狂紮著黜仔直衝阿里山。來到阿里山山頂，就無顧一切開始挖塗，一寸一寸慢慢挖落去，經過誠久的時間，終算皇天不負苦心人，去予挖著這兩項金鑠鑠的寶貝。即時帶著寶貝傱轉來大水潭邊，共兩項寶貝攏擲落去潭內，只看著潭水開始絞滾，兩隻巨龍佮金鉸刀佮金斧頭佇遐大捙拚，經過一段時間，澹水才慢慢靜落來，等潭水坐清時，清清楚楚看著兩隻巨龍已經死佇潭裡。
紲落來翁仔某就開始傷腦筋欲按怎共日頭佮月娘送轉去天頂，想規半晡嘛捎無頭摠。當咧煩惱的時，彼个老仔公閣出現矣，除了恭喜除掉大害，閣共講只要共巨龍的目睭食落去，身軀就會變足大漢，按呢就會當共日頭佮月娘囥轉去天頂。大尖兄翁仔某即時跳落大水潭，挖出巨龍的雙眼，翁仔某一人食一粒，一目𥍉仔，兩人攏變成巨人。就捀起日頭佮月娘，試欲共幌起去天頂，可惜一直落倒落來，經過幾若擺的試驗，終算共日頭佮月娘送轉去天頂正確的所在，天地也馬上恢復正常的運轉，日月也按時輪流放光明，人也恢復了正常的生活。毋過，為著欲預防日頭佮月娘閣落落來大水潭裡，翁仔某就一直恬恬守踮潭邊，最後煞變做兩粒雄偉的大山。
邵族後代的人就共這个大水潭號做「日月潭」，共彼兩粒大山號做「大尖山」佮「水社山」，而且為著欲感念守護佇潭邊變成兩粒大山的大尖兄翁仔某，逐冬攏會踮潭邊舉辦「托球舞」。
沒有留言:
張貼留言