一、翁婿棄世
清朝末年的時，佇咱臺灣臺南赤崁城西南爿的一个庄跤，蹛著一个媠閣少年的寡婦，號做「李昭娘」，伊的翁婿「陳明通」是一个成功的生理人。有一工渡海欲去中國做生理時，因為海湧傷大，反船死佇黑水溝（古早臺灣海峽風湧險惡予人稱做黑水溝）。翁婿死後，李昭娘獨身撫養一个九歲的查某囡仔、一个五歲佮一个三歲的查埔囡仔，靠著翁婿生前留落來袂少的遺產，母仔囝的生活卻也過了真四序。只是李昭娘花前月下，定定會想著溫柔體貼的翁婿，佮過去兩人恩恩愛愛的日子，暗暗流目屎。
二、重燃愛情
「周亞思」是陳明通的同業，猶袂成家，陳明通生前伊時常來厝講生理。這一擺對中國汕頭老厝來到台灣，想講先去拜訪老朋友，順紲講生理。一入門就看著李昭娘身穿素服，著驚問：「嫂仔，厝裡是啥人棄世？」「明通去矣！」李昭娘傷心講。「陳大哥是啥物時陣過身？是按怎過身？」「頂禮拜，欲去唐山做生理時，海上風湧傷大，船隻反落去黑水溝，墜海而死。」李昭娘目屎㴙㴙滴。「嫂仔，莫傷心，人死不能復生，你愛家己保重，扶養囝兒要緊。我佮明通，交往遮濟年，情如手足，以後有啥物代誌，做你吩咐，只要我做會到，我一定會相共。」周亞思安慰伊講。李昭娘聽著遮的話，感覺真安慰，對周亞思一時也生出好感。
周亞思對李昭娘的美色，數想誠久矣，這馬拄著遮爾難得的機會，就逐工往厝裡走。見看著伊悲傷艱苦、孤單無伴的時，就更加溫柔體貼，處處關心、問熱問寒。嘛時常買一寡糖仔、𨑨迌物仔送予遐的囡仔，或者是𤆬去踅街。遐的囡仔，拄才失去老爸，受著周亞思親切的照顧，也非常佮意佮周亞思親近，共伊當做家己的阿爸仝款。
李昭娘佮周亞思經過一冬的交往，感情漸漸燒烙，由好感變愛慕，由愛慕變思念，一工無看，就會寂寞、艱苦。有一工，周亞思當著李昭娘的面，哀聲吐氣，李昭娘問：「亞思，是按怎吐氣？」周亞思講：「唉！講起來氣死人，自從陳大哥死後，我定定來嫂仔遮，本來是念著佮陳大哥生前的一點仔情份，共嫂仔鬥相共，想袂到卻引起別人的閒仔話，講我佮嫂仔，一定有啥物不可告人的祕密，你講我哪有袂受氣。」李昭娘聽了，歹勢面紅，過一陣仔才講：「別人的閒仔話，咱管袂了，莫插。」「你講了無毋著，別人的閒仔話咱是插袂了，但是都攏按呢講矣，咱規氣假戲真做，達成的願望！按呢就算有閒仔話，嘛較無冤枉。閣講人非草木，誰能無情？咱做伙一冬，敢講你對我無感情？」周亞思那講那共李昭娘搝去眠床頂。李昭娘畢竟是一个軟汫的查某，閣守寡冬外，嘛真向望有一个真正的愛情，擋袂牢心中對愛的衝動，早就四肢酥軟，任由周亞思的擺佈。
一夜春宵了後，李昭娘卻又煩惱起來，拭著目屎講：「亞思，我的名節，已經予你破壞矣，以後人按怎講，我管袂著，干焦希望你會當永遠愛我，毋通放捒我。」「嫂仔！我毋是彼種負心的人，毋免煩惱，我向天咒誓，以後我若放捒你，我就無好死。」周亞思就攑手對天咒誓。狀此，兩人雖然無正式結婚，但宛然是一對翁仔某，李昭娘也沉醉佇愛河裡。
三、騙財騙色
周亞思真輕可就得著李昭娘的身軀，紲落來就是欲騙伊的財產。有一工，周亞思興𧿳𧿳對外口轉來，開喙就講：「昭娘，外面咧傳講香港這馬咧搶買樟腦，這種貨真好趁，我真內行，一改趁二萬兩銀誠簡單，毋過做這種生意，資本愛誠厚，可惜我鬥袂齊有夠的資金，若無做一逝生理就會當好好享受一生。」周亞思那講那吐大氣。「你講資本愛厚，是愛偌濟？」李昭娘問。「起碼愛一萬兩銀，我這馬手頭干焦有三千兩銀，差袂少。」周亞思講了閣吐一大氣。
李昭娘看伊一直吐氣，心內不忍，暗想：「家己身軀攏予伊矣，錢是身外之物，規氣提出來予伊做本錢」，伊就講：「我遮有四千兩銀，咱兩人敆起來就有七千兩，干焦差三千兩，你閣去共人借一下，就會當鬥一萬兩。」「我佇遮，無親無情，朋友閣散赤，欲共誰借？陳大哥是在地人，生前閣好客，我看猶是你去借較妥當。」周亞思應講。「但是萬一生意做失敗，無錢還人，欲按怎？」李昭娘講。「恁查某人就是見識淺薄，做代誌驚東驚西，我做遐濟擺生意，佗一擺失敗過？趁錢的機會毋是定定有，這馬有機會，袂曉把握，等機會走去，欲趁嘛袂赴矣。買賣樟腦我上內行，一必一中，若趁著大錢，咱就會當搬去城裡，你也會使享受少奶奶的生活。」李昭娘畢竟是一个查某人，又沉醉佇愛河裡，聽著周亞思的花言巧語，信以為真，就去共親情朋友借錢，這个借五十兩、彼个借一百兩，閣共厝提去抵押，向錢莊借一千兩，總共鬥出三千兩來。
周亞思提著一萬兩的本錢，就開始採購樟腦，臨別時李昭娘含著目屎講：「亞思，我的身軀、財產攏予你矣，你這擺去香港做生理，愛較早轉來。」「嫂仔，你放心，我會真緊轉來，台灣到香港，來回只要七、八工，加上賣貨的時間，十二、三工內我就會轉來矣。」周亞思輕輕摸著李昭娘的手講。「毋過聽說香港是一个繁榮的所在，遐的小姐，濟閣媠，迷惑人的功夫一流，真濟查埔人貪著的美色，一去就無轉來，所以我才會擔心。」李昭娘驚周亞思變心，若一去不回，毋就人財兩失。周亞思心內也知影，但猶是假仙假獨講：「你放心，我周亞思毋是好色之徒，我佇遮閣再共你咒誓，我若變心，願受上天上嚴厲的處罰，我會袂好死，按呢你相信呼！」李昭娘聽伊按呢講，才放心。彼工，周亞思就押送著樟腦，坐「勝利號」貨船，開往香港。
四、一去不回
日子過了真緊，晃一下就是一禮拜，但李昭娘卻感覺是經過七、八冬遐久。她規工咧計算周亞思的行程，祈禱上天保佑伊，趁大錢轉來。終算二禮拜過去矣，周亞思出門時，搭胸坎保證上慢十二、三工就轉來，但是今仔日已經是第十四工矣，猶無看著周亞思的形影，伊心內愈來愈不安，心想：「莫非開往香港的貨輪拄到風颱，反過矣，曷無哪猶袂轉來。」想到遮，愈驚惶、愈煩惱，就走去安平港碼頭探望。伊到安平港時，看著港內船隻出出入入，人聲嚇嚇叫，碼頭工人拄咧裝卸貨物，就問伊：「請問兩禮拜前開往香港的勝利號貨船轉來袂？」「前工就轉來矣，那爿碼頭卸貨的貨輪就是勝利號貨船。」工人指著對岸的一隻船隻講。
李昭娘趕緊走到對岸的碼頭，果然看著勝利號貨船，伊就問船員講：「請問敢有看著周亞思先生，伊兩禮拜前坐這隻貨船去香港。」船員講：「喔，周亞思，伊到香港共貨賣完，聽講趁了一筆橫財，就坐船轉去汕頭老厝矣。」李昭娘聽著這个消息，一陣頭眩，就昏死佇塗跤。船員緊共救醒，伊絕望行轉厝，連紲哭幾若工，可是周亞思按怎也無閣轉來矣。
無偌久，消息傳出去，債權人紛紛來討債，李昭娘無錢予還，逼甲伊無辦法，只好共一寡值錢的金銀珠寶、綾羅綢緞、家具器材，攏提去變賣，還予債主，最後家己的厝也落在錢莊的手裡。
五、林投自盡
李昭娘手頭空空，𤆬著三个幼囝，佇台南街頭流浪，無通食，無通穿，親情朋友因為伊守寡期間，去鬥著契兄，攏共呸痰呸瀾，無願意收留，無偌久，寒人來，伊的查某囝佮六歲的查埔囡仔攏凍死。這時，伊後悔、伊怨恨，想講家己的名節予人破壞，財產予人騙去，四界予人罵予人詈，猶閣有啥物面目活踮這个世間？伊灰心喪志的時，拄好行到台南附近的林投樹林，先共四歲的細漢囡仔捏死，家己才慢慢仔拍開腰身的布帶，絕望講：「這是我解脫的唯一辦法，周亞思你這个負心漢，我做鬼也袂饒赦你！」講完，李昭娘就共腰帶縛起去林投樹頂，吊脰自殺。
自從李昭娘佇遐自殺了後，彼搭的林投樹林，一到暗時，就傳出陣陣的啼哭聲，因此攏無人敢倚近。
六、林投姊廟
有一工，一个賣肉粽的，擔一擔肉粽不知不覺行來到林投樹林，大聲喝賣：「肉粽，燒唿唿的肉粽喔。」突然間有一个婦人人叫講： 「喂！賣肉粽的！擔來這爿！」賣肉粽的聽著林投樹林那爿有人叫伊，就共肉粽擔仔擔過去，看著一个查某人，雖然小可有年歲，但猶美麗動人，就問：「欲買幾粒？」「攏買！」婦人人講。賣肉粽的一聽伊欲攏買，誠歡喜，心想：「今仔日交著好運矣，會使較早收攤，轉厝啉酒囉。」心內一歡喜，真緊就共肉粽包好，提予彼个婦人人，婦人人也提出一疊錢予伊。賣肉粽的收了錢，說多謝後，就提來算看偌濟，伊目睭斟酌一下繩，煞掣一趒，因為手中的錢竟然攏是銀紙。
彼个婦人人提著肉粽拄欲走，賣肉粽的趕緊共喝停，婦人人停落來，越過頭來，只看著伊頭鬃鬖掖掖，兩蕊目睭含著血絲，現出哀怨的眼光，喙舌伸甲二、三寸長，有夠恐怖，賣肉粽的驚一下大唉一聲，肉粽擔仔抨咧，越頭就拚性命走，走到厝裡，四肢痠軟無力，干焦賰一口氣，自按呢開始破病，個外月才好起來。
後來閣有二、三个人拄著這个女鬼，蹛踮台南府城的人，攏共林投樹林彼搭看做險途，毋但暗時，甚至青天白日，嘛真少人敢對遐經過。經過一段時間，為著欲安搭李昭娘的靈魂，也欲予附近的人較安心，一寡慈善家就募集了一筆錢，佇彼个所在起一間廟，供奉李昭娘的香火，尊稱伊「林投姊」，廟號做「林投姊廟」，從此以後，人就改叫伊林投姊。
七、算命先生
有一工，有一个算命先生，經過這个林投樹林，突然間落大雨，伊只好走入去林投姊廟避雨，毋過到暗矣，雨猶落袂煞，伊就疊跤坐落來閉目養神。突然間一陣冷風剾來，伊褫開目睭一看，一个中年女子，徛佇伊的面前講：「周先生！你毋免驚，我是一个吊脰死的女鬼，佇遮等你真久矣，我有一件代誌想欲拜託你，也只有你才辦會到，別人是辦袂到的。」林投姊就共周亞思按怎用花言巧語破壞伊的名節，按怎騙伊去借錢貸款來奪取伊的財產，舞甲伊身敗名裂，最後行到自殺這途，哭予算命先生聽。閣講：「我知影你叫做周天道，你佮周亞思是仝鄉，做人義氣，所以我才會踮遮等你，請你幫助我報這个不共戴天的冤仇。」
周天道聽了，若有所悟講：「我捌這个周亞思，伊這馬佇阮家鄉算好額人，原來伊紮轉去的錢攏是對你遮騙去的，伊閣另外娶一个細姨。可恨的是，伊騙我講，臺灣錢淹跤目，按怎做按怎趁，我聽伊的痟話，才走來台灣，舞甲我四界流浪，三頓食無兩頓。我拄才想欲揣伊算數，你欲報仇，我絕對相共。只是伊這馬人佇汕頭，我家己都無法度轉去，欲按怎幫你？何況咱陰陽異途，我欲按怎𤆬你過去彼爿報仇？」
「這點你免擔心，鬼魂上驚日頭照射，你只要替我做一个神主牌，用雨傘閘咧，一路上，若欲上車、落車、上船、落船、過橋、上山、落山，著叫我的名，我就隨你而去。」「遮我攏做會到，可是我身無分文，欲按怎轉去汕頭？」周天道講。林投姊講：「這點你也毋免顧慮，我早就考慮著矣，廟前上大的彼欉林投樹，樹跤埋有五十兩的紋銀，你共挖出來，當做旅費！」
八、渡海到汕頭
周天道按照林投姊的吩咐，走去彼欉林投樹跤，挖出五十兩的紋銀，先買一枝烏雨傘，閣做一个神主牌，提來廟裡，燒香祭拜，然後叫林投姊的名講：「李昭娘小姐，咱欲出發矣，出發來去汕頭矣。」由台南的安平港出發到汕頭，一路上攏按照林投姊的吩咐，上船、落船攏有叫伊的名。
經過一段誠長的旅程，總算到了汕頭，落船的時，周天道閣細聲講：「李昭娘小姐，咱到汕頭囉，咱來落船！」落船後，揣一間客棧歇暗，周天道對林投姊講：「你踮遮歇睏，我先來探聽周亞思的近況。」無偌久，周天道就轉來，對林投姊講：「周亞思這馬是汕頭上好額的，明仔載是伊的第二个囡仔滿月，會大宴賓客，咱會當假做賀客入去。」林投姊一聽，目屎煞輾輾遨，傷心講：「遮濟年矣，伊竟然有兩个囡仔，而我三个囡仔卻攏死矣，我怎樣袂怨恨？」
九、周亞思起痟
周亞思第二个囝兒滿月彼工，府內、府外點燈結綵，來祝賀的人真濟，周天道攑著雨傘閘林投姊的神主牌，來到周亞思的府上。當欲行入去周亞思的大厝宅時，拄䢢著周亞思。
「天道兄，你當時轉來，遮拄好今仔日是小犬滿月，請你啉一杯喜酒。」周亞思看著周天道就按呢講。「是啊！恭喜！恭喜！我順紲𤆬一个查某朋友來看你。」周天道按呢應。「真好！真好，曷伊佇佗位？」周亞思問。
林投姊看著周亞思，多年的恨火，一時衝起來心頭，就急急現身。周亞思看著林投姊徛佇周天道的後壁，大驚失色，大舌問講：「你！？按怎是你！你是按怎來到遮矣？」伊那講那越身，想欲走入去厝內，林投姊哪會當放伊走，就緊綴踮後面，咬牙切齒講：「你為啥物欲放捒我？若毋是你，我哪會落到遮爾淒慘的地步，賠你的命來！」大廳的人客，攏看袂著林投姊，干焦看著周亞思人咇咇掣、四界硞硞傱，有一寡人客想欲共搝咧，卻攏予周亞思掰開。
周亞思傱甲跤痠手軟，行袂振動，就愣愣佇大廳，過了有一站仔，才大聲哭起來，真自責講：「我周亞思是一个狼心狗肺的人，破壞李昭娘的名節，騙走伊的財產，害伊身敗名裂，自盡而死。我家己卻走轉來故鄉享福，娶某生囝，像我這種喪盡天良的歹人，真是該死！」那講那用雙手搧家己的喙䫌，隨後閣去灶跤攑一枝菜刀，欲刜家己。某看著，欲共阻擋，周亞思反過來菜刀攑懸懸大力共某刜落，講：「賤人，揣死！」拄好共某的頭殼鏨斷。人客看著這種慘劇，攏驚走了了，只賰伊兩歲才拄滿月的囡仔猶佇眠床頂大聲吼，伊走去眠床邊也將鏨死，最後才家己割頷仔頸，氣絕而亡，這敢真正是伊進前咒誓無好死的報應。
「善惡到頭終有報，只爭來早佮來遲！」周天道喙內喃咧喃咧。從此以後，台南府城，就無閣再看著林投姊的冤魂囉。
沒有留言:
張貼留言