古早古早，有一隻鹿仔、一隻狗仔佮一隻雞仔踮溪岸咧開講，破豆到欲中晝的時，喙焦，就相招去溪仔邊啉水。鹿仔向頭看著水裡狗仔的倒照影，看著伊頭殼頂徛的兩枝角，實在有夠媠，有夠飄撇，心內有夠欣羨。
鹿仔逐工想：「我頭殼頂若有仝款的兩枝角，毋知欲偌好咧。」愈想愈流喙瀾，一直想空想縫欲共狗仔借彼兩枝角，就算借來戴一下嘛甘心。經過真久，伊總算等著機會，借著講欲去宗親遐食新娘酒，愛妝好媠，佮狗仔參詳：「中晝我欲去食喜酒，你的角是毋是會使借我，予我風神一下，人若問我講角是佗來，我會講是共你借的，你嘛有光彩，我食飽就會奉還！」狗仔雄雄聽著伊欲借角，心內無啥主張，就應講：「袂使！袂使！借你，你若毋還我，我是欲按怎？」鹿仔講：「免驚啦！我是老實人，絕對講話算話！曷無，我請雞仔做證，替我做保，保證我會共角還你。」
雞仔因為時常予鹿仔請，也定定收伊的禮物，閣時常予伊叫大仔，想講逐家攏是破腹獻心肝的兄弟，這款代誌哪會使無鬥相共，就阿莎力答應：「好！我做公證，有問題我擔當。」
狗仔面皮薄，想講逐家做陣若換帖的，看鹿仔人平常時嘛老實老實，閣有雞仔做保，若無借人顛倒會予人議論，供體講凍霜、苛頭，就姑不而將，共伊的角借予鹿仔。鹿仔馬上將角戴踮頭殼頂，看起來果然加真飄撇，就三跤趒兩跤跳，歡歡喜喜去食新娘酒囉！
酒宴頂，人便看著，就共呵咾：「哇！你頭殼頂的兩枝角，佮你高強的漢草佮梅花點的媠皮誠四配，看起來更加勇壯、更加有氣魄、更加緣投。若是狗仔配彼兩枝角，就若胡蠅戴龍眼殼，崁頭崁面，一點仔貴氣都無。你就無仝，一戴咧就若王子咧，一表人才，無人比你會著！」鹿仔聽人按呢褒，心涼脾土開，就緊走去照鏡，一下看，都著咧，有夠英雄氣概。伊心內想，狗仔遐粗魯，哪有啥資格戴這兩枝角，一時起痟貪，就想欲走去他鄉外里的山裡覕起來，予人揣無，決心無欲共兩枝角還狗仔。
狗仔看鹿仔無共伊原來媠噹噹的角還轉來，懷疑是欲共伊霸佔去，就四界揣，毋過任伊按怎揣攏揣無鹿仔的影跡，真凝心。心一下凝就大聲吹狗螺，吐大氣；行著路嘛頕垂頕垂，無元氣。彼工看著雞仔，才想著伊是連保，事主揣無掠公證坐數，就向雞仔討伊的角。雞仔嘛真無奈，彼當時搭胸坎掛保證，哪知這馬提無角還人，心內嘛真歹勢，毋過揣無鹿仔的下落，伊嘛無法度。狗仔鬱卒轉受氣，便看著雞仔就欲拍伊出水，逼甲雞仔看著狗仔就拚性命走，走甲心驚膽嚇，正港是「雞犬不寧」！一直到這馬，狗仔看著雞仔就起跤逐，就是欲討回伊的角。雞仔嘛知影理虧，逐工天若拍殕光，就四界大聲啼：「咕咕咕！咕咕咕！鹿角還狗哥！」就是咧四界叫鹿仔，叫伊愛還狗的兩枝角。
雞仔因為傷信任鹿仔，舞甲若「苦瓜燖鰱魚」--可憐，若「攑耙柫家己摃額」--自作自受，若「啞口硩死囝」--艱苦無人知，久來煞染著憂鬱症，定定戇神戇神踅踅念。唸啥貨？唸「嘓嘓嘓！毋通人做保！嘓嘓嘓！毋通人做保！」。
鹿仔覕踮深山林內，日子嘛無好過，平埔族的人定定會牽狗仔入山去拍獵掠鹿仔。狗仔是好鼻獅，拄好勢來追蹤鹿仔的下落，一旦揣著鹿仔，就若冤仇人見面目空赤，一直大聲吠、大步逐，逐甲鹿仔驚甲半小死！
鹿仔一面驚狗來逐，一面嘛驚兩枝角予人搶去，逐工過著提心吊膽的日子，後來煞變做深山林內上無膽的動物，風一下吹，草仔一下動，伊就驚甲咇咇掣，後來台灣野生的梅花鹿差一點仔就絕種，這敢會是做虧心事得來的報應咧！
沒有留言:
張貼留言