「桃花女鬥周公」是中國的民間故事，內底有講著咱傳統婚禮上的真濟儀式，佮道教鬥法的法術，遮的物件佇咱台灣民間嘛猶有咧流行，因此，講是咱台灣的民間故事嘛會使。
古早古早，佇中國洛陽城的東爿，蹛一个卜卦先生，號做「周乾」，人攏叫伊「周公」。周公精通易經，卜卦真準，名聲透京城。伊的相命館門口，掛著一副金字對聯，頂聯：神準千里讚聲；下聯：無靈十兩賠銀；橫批：周公再世。三十冬來，毋捌失誤，周公家己嘛真驕傲。
周公仝鄉有一个青年，號做「石宗輔」，時常出外做生理，有一改，延了傷久猶袂轉來，阿母心中掛念，毋知影伊是毋是出代誌，就去周公遐問卦。周公卜著大凶，算定這个人下昏暗三更一定會硩死佇一間破厝內底，石阿婆聽了，滿腹悲傷轉去。
仝村任太公，有一个查某囝，媠甲若桃花，逐家攏叫伊「桃花女」，伊也精通易經卜卦。這一工，伊欲繡花時，才看著欠幾枝針，想起石宗輔是做生理的，一定有繡花的針線，就去石家借。一入門，看著石阿婆啼啼哭哭，一下問，才知影周公卜卦講石宗輔出外大凶的代誌。桃花女講：「阿婆，我也共你卜一下看覓，凡勢石大哥會當逢凶化吉。」
一下卜，仝款是凶卦，毋過伊知影破解的方法，就對石阿婆講：「下昏暗三更左右，你坦敧身坐踮戶橂，頭毛用予鬖掖掖，攑柴做的桸仔佇門扇頂敲三下，一面大聲叫三聲「我囝石宗輔」，他就袂死矣。」石阿婆就佇三更時分，照按呢去做。
話講石宗輔做好生理了後開始轉來。這一工下晡，行到荒郊野外，忽然間風雨大作，一時揣無所在通覕，路邊干焦有一間破窯，伊就緊入去窯仔內覕雨。三更時，忽然聽著外口有人喝三聲「我囝石宗輔」，伊感覺奇怪，就行出窯仔外，欲看聲音是對佗位來。才踏出門，突然間伊後壁浪浪一聲，規个破窯攏崩落來，石宗輔著一驚，手摸佇心肝頭，一直唸：「佳哉！佳哉！」煞抾著一條命。石宗輔轉到厝，石阿婆真歡喜，閣加趁一條橫財，得著周公的十兩銀，因為伊算了無準。周公聽著石宗輔無死，嘛驚一趒，因為這是自伊開始卜卦以來，第一擺無準，伊懊惱兼受氣，暗想一定有人佮伊做對，只是毋知是誰？
過了無偌久，周公替伊的下跤手人「彭剪」卜卦，講：「後日三更會有惡鬼來討你的命。」伊予彭剪一寡錢，叫伊欲死進前盡量去食去耍。彭剪聽了真傷心，失神行佇路頂，合該伊命不該絕，佇路頂拄著石阿婆，彭剪知影頂改石阿婆的囡仔是予高人所救，但毋知影彼个高人是誰？伊共周公講伊後日三更會死的代誌講予阿婆聽，哀求伊救伊，阿婆看伊可憐，就共桃花女救活囝的代誌講出來。彭剪聽了真歡喜，趕緊走去桃花女兜，求桃花女救伊。
彭剪佮任太公是世交，任夫人因為無囝，平時上惜這个彭剪，在了解情況後，也要求桃花女設法解救伊。桃花女聽了彭剪的說明，就講：「阿兄，周公算的卦是對的，但猶是有辦法救命。明仔載七月十五暝，南北星君總共八位，會聚集東山廟，你去買八份芳花、水果、魚仔肉佮清酒供奉踮桌頂，家己覕踮桌跤，等到三更時，八位星君下降，領受你的供奉時，你就對桌跤爬出來，懇求延長你的壽命，按呢你就袂死矣。」
彭剪就按照桃花女的交代去辦，家己也恬恬覕踮桌跤等星君。無偌久，八位星君攏降臨東山廟，有講有笑，也無客氣，大方享受著桌頂的供奉。當伊吃甲津津有味時，彭剪對桌跤跳出來，搝著其中一个星君的手䘼，哀求講：「星君，救我。」星君問伊原由，彭剪才講：「後日三更，閻羅王會派惡鬼來討我的命，請星君延長我的壽命。」八位星君帶念伊備辦遮豐沛的供奉，就答應伊。逐个人攏幫彭剪延長一百歲的壽命，其中有一个星君看伊有緣，閣加五十歲予伊，總共拄好替彭剪延長八百五十歲。彭剪就是咱這馬講的「壽星」「彭祖」。
彭剪無死，閣驚著周公，周公逼伊講出原因，彭剪毋敢隱瞞，就將桃花女的解法一一說出，連石宗輔死裡逃生的代誌，也講講出來。周公一連兩次予桃花女落氣，賠了二十兩銀，閣予人共伊的金字對聯拆落來，真正氣憤，就想出一个毒計欲陷害桃花女。
周公有一个囝叫做「周增福」，年歲二十一，猶未娶某。周公吩咐彭剪，提紅酒佮禮物去任家，講欲娶桃花女做新婦。彭剪到任家，毋敢講是周公欲娶新婦，假講遮的禮物是伊感謝桃花女救命的謝禮，任太公就歡喜收下禮物。無偌久，媒人婆上門來，講任太公已經收受周公的送定，這件婚事就按呢定矣。任太公大怒，毋肯答應，桃花女心內知影是周公設的圈套，一點仔都毋驚，反倒轉勸阿爸答應婚事。
婚事既定，周公特別選一个大凶的日子迎親。佇迎親的前一暗，周公閣細算隔工凶神所徛的方位，確定有四絕、四滅徛東北，哭喪徛北，天羅、地網徛東，井木犴、鬼金羊、昴日雞、星日馬徛東北角。保險起見，伊閣設案做法，請黑煞、喪門、弔客、白虎等四凶神相助，就是欲予桃花女佇上轎、落轎、入門佮入洞房時，攏無地通覕，共桃花女澈底除掉。
迎親彼工，周家媒人婆𤆬著花轎鼓吹樂隊，向任家而來。桃花女知影周家來意不善，事先就想好對策，閣到石阿婆厝，借石宗輔來做伴娶，吩咐伊綴踮身邊，聽候指揮。只聽著外口一隊鼓樂之聲，花轎已經來到門前，媒人婆入門催促新娘上轎。桃花女屈指一算，知影這个時辰正沖著日遊神佮金神七煞（二十八星宿中「角亢奎婁牛鬼星」為七金神），非死即傷。桃花女就共準備好的鳳冠戴踮頭殼頂，並吩咐石宗輔手提一个米篩閘佇伊的頭殼頂，沿路陪行。
當桃花女行出大門時，拄蹌著金神七煞欲下殺手，誰知桃花女頭殼戴的鳳冠，珠光寶氣，射出滿天金條，金神看袂清楚，毋敢下手。日遊神也巡來到遐，準備行兇，卻看著石宗輔手提米篩閘佇新娘的頭殼頂，米篩代表著千眼神，是日遊神的剋星，伊也趕緊閃避。桃花女總算閃過煞氣，安然起去花轎內。這就是咱傳統婚禮上，新娘仔攏愛戴鳳冠，閣愛用米篩閘踮頭殼頂的由來。
花轎起行，桃花女一算，這時太歲當頭，沖犯者死。即時吩咐石宗輔，叫轎夫共花轎先向後退三步，閣共手巾仔崁踮頭面。花轎退後，方位改變，手巾崁頭面，就避開了太歲的煞氣，桃花女又閣闖過一關。
花轎來到周家，周公問彭剪:「新娘這馬按怎？」彭剪講：「真好矣！」周公聽著新娘無代，氣怫怫，屈指一算，就交代彭剪叫新娘愛佇某一个時辰落轎，因為伊算好矣，彼个時辰是黑道凶日黑道罩地的時刻，新娘若佇彼時踏著塗跤，一定愛死。桃花女一聽著彼个時辰，就知影又是周公的詭計，伊就吩咐石宗輔，提兩塊清氣的草蓆，鋪踮塗跤，新娘跤踏草蓆行，行一步鋪一塊，一直輪換，按呢跤就袂去沐著塗跤。桃花女就按呢對花轎停的所在，一直行到大門口，這叫做避黑道凶日行黃道吉日。這也是咱傳統婚禮上，新娘仔攏愛行踮紅毯（代替草蓆）的由來。
桃花女欲迒過戶橂的時陣，知影馬神當值，若迒起去無小心去傷著馬神的尻脊骿，會予伊回馬踢，蓋危險。伊就叫石宗輔提一副馬鞍囥踮戶橂頂頭，伊就連馬鞍做一伙迒過，馬神有馬鞍保護，就安安靜靜，伊也安然無事入去大門。
入大門後，愛閣入去內院，院內有鬼金羊、昴日雞當值。桃花女提出一面照妖鏡，吩咐石宗輔提出紮來的碎草、米佮染成五色的銅錢，綴伊的跤步，沿路行沿路掖。羊神看著掖落來的碎草就去食，雞神看著掖落來的米就去啄，囡仔看著掖落來的銅錢就爭去抾，桃花女就趁這个空縫，攑鏡照路，輕輕行入內院。這就是咱傳統婚禮上，掖米、掖糖仔（代替五色銅錢）的由來。
周公的如意算盤一直擉無成，就吩咐彭剪共新娘𤆬入第三重門，因為伊有請喪門、吊客把關。桃花女知影危險，就叫石宗輔提弓箭來，講：「等我欲入去第三重門時，你就對天射三箭。」石宗輔等桃花女行到第三重門口時，就用力搝開弓箭，對天射三箭。弓搝開若像月眉，箭射出去若像流星，拄好會當避開喪門、吊客的煞氣，桃花女也安然進入第三重門。
彭剪共遮的舉動攏看在眼內，忍袂住對周公恥笑，周公氣甲講袂出話。停一睏，伊才想著，佇新娘房內，猶有伊請的白虎星䖙佇床頭歇睏，只要外口鼓樂一響，共白虎星拍醒，就會傱出來共新娘咬死。伊就暗中吩咐下跤手人，等新娘進入新房，坐踮床頭時，就即時拍鼓吹樂，共白虎星引出來。
桃花女行入新房，四圍看看咧，回頭對彭剪講：「阿兄，我小寡會驚，周家有啥細漢囡仔無？會使揣一个來佮我做伴。」彭剪毋知影這是桃花女的計謀，回身就共周公的細漢查某囝阿梅請來，叫伊入房來陪阿嫂。彼个查某囡仔才拄十三歲，苦袂得欲看阿嫂，就歡歡喜喜走入來。桃花女提出一領對厝裡紮來有刺繡的媠衫仔褲，對伊講:「多謝你來陪我，這領衫送予你，你踮遮穿，我來去後壁換衫，連鞭轉來。」桃花女才一下行開跤，外口就鼓樂大作，共白虎星驚醒，兇狂傱出來，共阿梅咬落去，阿梅大聲喝救人。
周公聽著慘叫聲，趕緊入房，看著家己的查某囝予白虎星咬一下賰一口氣，放聲大哭問講：「哪會按呢？」桃花女笑笑講：「你欲害人顛倒害著家己，是你請白虎星來的，哪顛倒咧問我。」周公心內反悔，拜託桃花女救查某囝。桃花女講：「欲救阿梅，就趕緊去提清水、柳枝，我通好做法共阿梅的三魂七魄喚轉來。」阿梅救轉來了後，周公表面上佮桃花女講和，但是心內猶咧怨恨，時時刻刻想欲加害桃花女。
這一工，周公提出桃花女的生辰八字詳細看，算出明阿載桃花女沖犯著黑煞，是上好加害伊的日子。伊就叫彭剪去桃花園遏三枝桃花枝，縛踮一隻黑狗母身上，三更時陣，喙裡那唸咒語，手那攑棍仔共狗母拍死，埋踮桃花園角落。
隔轉工，桃花女突然間心頭咇噗筅，目睭皮掣咧掣咧，凊汗㴙㴙流，卜一下卦，知影是周公欲陷害，就請彭剪來參詳：「阿兄，周公欲害我，伊用桃花枝鏨斷我的命星，你愛救我。」彭剪問：「欲按怎救？」「我死了身軀猶有芳味，七工內你會使攑一枝桃花杖，大力敲大門門扇三下，叫三聲『桃花女速速醒來，不可延遲』，按呢我就會醒起來。」桃花女講了，大叫一聲口吐鮮血而亡。周公知影桃花女死矣，喙笑目笑，一面踅踅唸：「死賤婢，三番兩次，破害我的名望，死有餘辜。」
周公買好棺柴準備欲安葬桃花女，做七的期間，暫時囥踮大廳門邊。人講斬草愛除根，狼毒的周公，閣心生一計，共家人講想欲共桃花女一把火燒掉，永除後患。周公厝內的人聽了，攏真著驚，款勸周公著想予詳細，一下無小心，恐驚會燒著厝邊隔壁。彭剪看情勢危急，就緊照約束來到大門，用桃花杖連紲敲門扇三下，並大聲叫：「桃花女速速醒來，不可延遲。」三聲喝完，桃花女就褫開目睭，對棺柴內出來。周公看一下掣一趒，愣一陣才回神，攑起手中的寶劍，就對桃花女刜落。彭剪趕緊共手中的桃花杖擲予桃花女，桃花女就用桃花杖共周公拍甲難分難解。桃花女的功夫總是較懸，周公一下無留神，予伊一杖摃昏在地，桃花女想欲趁勝追擊，共周公摃死時，阿梅走出來，跪佇塗跤，求情講：「桃花女你心地善良，請留阿爹一命。」
周公醒起來，一點仔反悔都無，桃花女真受氣講：「可惡的畜生，枉費恁查某囝替你求情。」兩人繼續大戰，對塗跤戰到天頂，最後，周公猶是較輸面，閣予桃花女摃昏去。毋過，阿梅又苦苦哀求，桃花女只好閣放周公一條生路。
這改周公醒起來，反省著家己過去對桃花女的所做所為實在無應該，就誠心誠意反悔，從此以後，做一个好大官，一心疼惜桃花女這个好新婦。
沒有留言:
張貼留言