台灣童話故事：濁水溪的傳說

＊＊＊揤遮就會當看著無亂碼的文章

濁水溪是咱台灣上長的一條河，全長170公里，對彰化出海。遮爾清氣的一條溪水，是按怎會號做濁水溪？

傳說講，這條溪發源於能高山，原本號做清水溪。能高山真懸，戴瓜笠仔徛踮山跤攑頭看山，瓜笠仔落落去塗跤猶看袂著山頂！

　　

古早的時，山跤蹛著一个獨身仔的少年號做索雅。伊定定受歹頭目的欺壓，生活真艱難。有一工，伊踮山跤剷草，天氣傷熱，就倒佇樟仔跤的草欉歇跤。忽然間，一隻金錢豹咬著一隻白兔仔跳過來，停踮一欉細欉樹仔邊，共兔仔囥落來，準備欲食。索雅看了不忍心，就恬恬仔起身，揤到細欉樹仔後面，鋤頭攑懸懸就相真真對彼隻豹的尻川共撼落去，豹大哎一聲，予這个突如其來的偷襲驚著，緊共兔仔抨掉越頭就走。　　

　　

索雅行過來，看著兔仔倒踮塗跤，腹肚猶咧膨一下凹一下的，一蕊目睭噗出來，血流甲滿四界，一肢腿折斷去。伊趕緊到樹林仔邊薅一寡藥草，用喙哺予幼幼，輕輕糊佇兔仔的斷腿頂，又閣拆一橛衫，用來共伊的腿縛予好。歇一睏了後，兔仔慢慢起來，擘開半爿目睭看索雅，感激甲頕幾个頭，一跛一跛行入去樹林。

又閣是一个炎熱的日子，索雅佇山跤作穡，伊舞甲大粒汗細粒汗，喙足焦，可是無水啉。伊攑頭看能高山，干焦看著荒草佮杉仔，吐氣講：「若準有酸甜仔酸甜的果子通食毋知偌好咧。」話拄講完，忽然間，耳空邊響起著歌聲：

「送你紫珠仔一粒子，埋佇塗裡用力捶；滿山滿嶺藤連藤，一喙酸來一喙甜。」

索雅拄咧感覺奇怪，一陣風剾來，突然間看著一个獨眼的老阿桑，跛一下跛一下行到伊的面前，共一粒圓輾輾的紫珠仔擲佇塗跤，然後白雪雪的衫影搧一下就無去矣。索雅以為家己咧做夢，但是看著塗跤，卻真正有一粒紫珠仔，伊就共紫珠仔埋踮塗裡，用跤蹔蹔的，才轉去。　　

　　

第二工，索雅照常夯著鋤頭欲去作穡，來到田裡煞予面前的景象驚愣去：葡萄藤連藤，連甲滿能高山，葡萄像一串串的紫珠仔掛踮藤仔頂。伊起去挽來食，酸甜仔酸甜，滋味真讚！毋過伊欲落來的時，無小心衫煞予葡萄藤割破一大橛，伊順手提草索仔來共衫縛咧，那吐氣那對葡萄藤講：「你毋知影我是一个獨身仔，無人會替我紩衫，你哪通閣共我的衫割破！」　　

　　

食了酸甜的葡萄，索雅愈有精神作穡，真緊伊就做好，會使轉去厝裡。當伊遠遠看著家己的破草厝仔時，心內起疑：「厝頂的煙筒哪會有火薰？猶有姑娘咧唱歌？」伊三步做兩步，傱到厝，拄好看著一个身穿白衫白裙的美麗姑娘咧煮飯。索雅愣愣徛佇門口，真久了後才歹勢歹勢問講：「你是誰？」姑娘共頭殼頂的汗拭拭咧講：「你毋是救過阮阿母？你毋是對葡萄藤訴苦？阮阿母叫我來的，我號做阿碧。」講了微微仔笑一下。　　

　　

從此，阿碧佮索雅就蹛做伙，去作穡時唱歌，去挽葡萄時唱歌，逐家攏為兩人的幸福歡喜。可惜好景不長，有一工，索雅咧挽葡萄時又閣割破衫，阿碧先挔轉去補，索雅褪腹裼繼續作穡，做規半工也無看著阿碧倒轉來，伊著急就鋤頭夯著轉去厝看覓。轉到厝也無看著阿碧的影跡，索雅急甲強欲吼。忽然間，聽著一陣爍爍顫的歌聲：　　　　　　　　

「紅紅的霞清清的溪，阿碧的歌聲眾人迷；歹頭的心腸蛇遐䆀，可憐的阿碧目屎垂。」

　　

一陣風剾來，彼个獨眼老阿桑又閣跛著腳來到索雅的面前，擲落一雙草鞋，一越頭，白雪雪的衫仔褲擛一下又閣無去。索雅共草鞋穿咧，向清水溪走去，伊知影歹頭目蹛佇溪仔對面岸真遠的所在。伊行到溪仔邊一看，唉喲喂啊，溪水當咧大流，水掣湧懸，是有一隻無人的柴船，但是是停佇對岸，今無船欲按怎過溪？忽然間，「嘩啦」一聲，兩條若碗公遐粗的葡萄藤，對能高山落落來，像兩條軟索仝款，幌對對岸去，聖聖共兩岸連做伙。索雅看機不可失，就馬上起去葡萄藤，手搝予絚，跤拑予牢，牙根咬咧，一節一節爬過去。到對岸了後，伊伐大步，順著彎彎曲曲的小路行去。拄落一个崎，煞看著一个白喙鬚的老大人，跋踮路邊的湳塗，大氣小氣喘袂離，袂出來。

　　

索雅趕緊走入去湳塗內，共老大人抱起來，一跤深一跤淺行出來，兩个人規身攏漉糊仔糜，像塗人仝款，老大人叫索雅共伊揹的竹籠仔佮斧頭提落來。老大人就慢慢爬入去竹籠仔內，跔佇內底講：「你來偝我行轉去阮厝！照我手指頭仔比的所在行。」索雅揹起竹籠仔大步向前行，到一个三叉路口，老大人講：「囡子，你的阿碧就佇頭前彼間細粒山跤的石頭仔厝受苦！這个籠仔佮斧頭你有路用，你揹去。」一陣風剾來，白喙鬚的老大人就對籠仔內消失去。

索雅揹著竹籠仔向石頭仔厝走去，走到厝邊，就馬上對竹籠仔內攑出斧頭向石牆仔刜落去，「吭」一聲，刜出一大空。伊軁入去，看著阿碧規身軀烏青倒佇塗跤，不省人事。索雅心內艱苦甲大粒目屎直直輾，目屎滴著阿碧的身上，阿碧煞清醒起來，索雅緊共伊扶入去竹籠仔內，共竹籠仔揹起來速速走離石頭仔厝。　　

歹頭目發現阿碧走無去，即刻𤆬一陣下跤手人，攑著光映映的刀追趕。索雅走到清水溪邊，起去葡萄藤，歹頭目佮伊的拍手，也綴咧起去藤仔。藤仔佇空中㽎咧㽎咧，現現就欲予逐著矣，阿碧就對索雅講：「你藤仔搝予牢！」伊伸手入去竹籠內，攑出斧頭，向伊後面的藤子大力鏨落去，連紲鏨九刀，藤仔才「叭啦」一聲斷去。歹頭目佮伊的拍手一个一个「噗噗噗」跋落溪底。索雅共藤仔絚絚搝咧，勻勻仔起去山頂，阿碧才對竹籠仔內跳出來，佮索雅手牽手，笑微微來到溪邊。這時遐的歹人猶閣咧水底噗噗泅，毋過，任按怎泅嘛泅袂上岸，只是共本來清氣的溪仔水，舞甲濁濁濁。　　

後來人就共這條清水溪改名號做「濁水溪」，能高山這段的溪仔灣號做「斷藤灣」。從此以後，索雅佮阿碧以及當地的百姓，就過著平安的生活，能高山跤逐工都充滿著快樂的歌聲。

註：故事脫胎於本原稿